荒島日記（新手、後宮甜）（不定期更新）: 實行

「佢仲有心情扑嘢既？喂喂喂⋯你想做咩啊喂？」
原本仲偷窺咁既肥豬劉，突然俾美思用力推開一邊，見到佢好似想衝入去，於是肥豬劉拼命阻止。

高佬佳見到美思既行為後，即刻按住美思個嘴，然後將佢拉扯返到十字路口，美思用嘴咬咗一下高佬佳手指，令佢鬆開隻手。
「我有嘢要同陳總講啊⋯」

美思想再衝返入去，高佬佳用盡力將美思推埋牆邊。
「傻咗啊？要講都唔係依個時候講啦！」

「點解？」



高佬佳激動咁講。
「你咁貿貿然入去⋯咪即係同陳總講⋯我地幾個偷入佢山洞⋯你想死都唔好累我地兩個啊！」

聽到高佬佳既說話，美思終於冷靜落嚟，而肥豬劉亦走返出嚟。
「點解你偷入嚟？」

高佬佳不屑咁望美思。
「佢想賣料俾陳總。」



肥豬劉指一指出口方向。
「我地出去先，依到唔方便停留，萬一陳總走出嚟見到我地係到就大鑊。」

三人慢慢咁走出去，走到大廳後面觀察文健，見到文健仍然在熟睡，於是繼續靜悄悄咁行，當高佬佳經過文健既時候，突然諗到個計仔。

高佬佳用力推文健。
「醒啊文健，醒啊文健。」

文健朦朦朧朧咁睜開雙眼，見到佢地三人企咗係佢面前，於是舉起木棍對住三人。
「你地半夜三更擅闖陳總屋企！好快啲同我走！唔係就唔好怪我唔客氣！」



高佬佳望住骨瘦如柴既文健，握住木棍既手不斷顫抖，便冷笑咗一下。
「文健，唔好誤會，我地嚟係搵陳總，有好重要既嘢同佢講。」

「重要既嘢？重要到半夜三更衝入嚟？陳總夜晚唔見人！」
文健疑惑咁望住三人。

「真係好重要！」
美思係咁點頭。

高佬佳見文健仲懷疑咁佢地。
「件事好重要，如果陳總遲咗知而有咩損失，你擔唔擔當得起先？」

文健聽到陳總損失同擔當幾個字後，驚到震咗一震，幾秒後想起通知陳總可能會立功，於是佢便快跑衝入去裡面搵陳總，無幾耐，文健走返出嚟，但面上卻多咗兩個鮮紅既手掌印。



文健忍住面上既熾熱，招呼高佬佳三人。
「嘶⋯陳總佢好快就出嚟⋯你地三個坐係到等下⋯」

三人於是坐低等待肥佬陳，而文健企係一邊雙手放後，過咗幾分鐘後，肥佬陳一邊提褲一邊走出嚟，原本駝背既文健見到肥佬陳後立刻企直，肥佬陳嬲霸霸咁望文健一眼。
「奶奶的！下次再這樣衝進來！看我打不打死你！」

文健聽到後嚇到腳震，背隻開始冒出汗水，瞬間滲透成件衫。

肥豬劉終於明白高佬佳點解叫醒文健後，忍唔住得低頭笑咗一下，高佬佳亦得低頭忍住笑，塊面谷到紅曬。

「你們三個凌晨找我有什麼事？」
肥佬陳坐低望住三人。

「陳總，我有個好重要既消息要同你講！」



肥佬陳瞪咗下眼，然後挨前問到。
「什麼消息重要到凌晨找我？」

「你識做啦～」
後母美思奸笑咁伸出手。

「她媽的！文健！拿三個罐頭出來給這個臭婆娘！」
肥佬陳命令文健，於是文健衝返入去，幾分鐘後，文健先攞出罐頭走到美思前，美思開心到攬住啲罐頭。

「其實係咁，今日大陸仔佢地，捉到三桶蟹返嚟，隻隻都好似龍蝦咁大隻！」

文健聽到美思講大陸仔既消息後，知道大陸仔佢地依家既美好生活，雙手便緊握成拳頭。

高佬佳同肥豬劉驚訝咁呆望住美思，而肥佬陳用手抹一抹嘴邊既口水。
「我沒聽錯吧？你說得是真嗎？螃蟹？他們捉到這麼多螃蟹回來？」



「真㗎！真係蟹嚟！個三桶蟹多到可以食幾日，我係旁邊望住佢地煮蟹湯，聞到我都流曬口水！」
後母美思從褲袋掏出個蟹鉗殼出嚟。

肥佬陳伸手取美思手上既蟹鉗殼後，仔細咁觀察數秒，然後好激動咁講。
「想不到這個島原來是有螃蟹的！我還以為這個島的只長魚呢，我告訴你，食物裡，我最愛吃的就是螃蟹了！」

高佬佳見到肥佬陳咁鐘意蟹，於是講。
「陳總，只要你快啲實行你提出嚟既計劃，啲蟹就係屬於你既啦！」

肥豬劉係一邊附和。
「無錯無錯！陳總，啲蟹真係好正㗎！你唔想食啲蟹肉？食啲蟹膏咩？」

肥佬陳咪埋雙眼笑曬口。
「想！當然想！想吃幾十個！我吃螃蟹可乾乾淨淨呢！」



高佬佳繼續講。
「咁陳總仲唔快啲實行個計劃？如果遲咗，可能連蟹腳都無得你啜！」

「好！明天就去實行計劃！」
後母美思唔明肥老陳既說話，而高佬佳同肥豬劉開心到互相攬住，只要肥佬陳實行計劃，佢地啲罐頭糧食就會返嚟佢地身邊，仲有可以攞埋啲狼送俾佢地既獸肉同依家先知既蟹。

而企係一邊既文健偷偷地冷笑一聲⋯



待續