荒島日記（新手、後宮甜）（不定期更新）: 人質

達叔對住我講。
「東哥，我啱啱好似聽到佢講辣椒妹。」

雪兒亦點著頭。
「我都聽到，話咩唔俾飽飯佢食。」

我指住肥豬劉。
「肥豬劉！你將辣椒妹秋儀佢地收埋係邊！好同我放返佢地出嚟！」

達叔亦都好緊張咁問到。


「我兩個老婆仔係唔係俾你捉咗？老婆！老婆！」

無幾耐，山洞傳來達叔女伴既聲音。
「阿達？阿達！係唔係你啊？阿達！你返咗嚟啊？太好啦！阿達！我地係裡面啊！快啲嚟救我地啊！阿達！」

達叔聽到把聲後便肯定係佢兩個女伴，於是達叔同肥豬劉講。
「師兄！我同你無仇無怨！做咩捉咗我兩個老婆仔？你好快啲放咗佢地！」

肥豬劉完全唔放我地在眼內，無視我同達叔既說話，佢轉個頭，然後不慌不忙咁同佢女伴講。
「你，快啲去搵阿佳過嚟，你，幫我去叫醒陳總佢地，總之要快。」



「好！」
兩個肥豬劉女伴匆匆忙忙咁跑去高佬佳同肥佬陳既山洞。

達叔想趁依個時候衝入肥豬劉既山洞，點知肥豬劉兩個女伴攞住火把擋係洞口前，點都唔肯讓開。

達叔好憤怒咁望住肥豬劉兩個女伴。
「好快啲放咗我兩個老婆仔！！！」

肥豬劉理直氣壯咁講。


「佢地係幫兇！辣椒妹同秋儀犯咗法！禁錮傑少係山洞裡面，仲要虐打佢，所以佢地一定要受到應有既懲罰！我地係唔會幾咁放走佢地既！」

「MK傑？我唔信佢地會做啲咁既事！」
我地三個想直接衝過去，旁邊一把粗獷既聲音令我地停下腳步。

「你們三個！當我們營地是什麼地方啊！現在還想私闖民宅啊！」
肥胖既陳總出現係我地右手邊，佢一如既往咁咬住雪茄。

肥佬陳揮一揮手，所有營地既女仔都走到肥豬劉山洞前，每個人伸出火把對住我地，唔俾我地靠近。

「所有人！前進！！！」
肥佬陳大喝一聲，所有女仔便向前走上幾步，將我地驅趕到空地上，離肥豬劉既山洞愈嚟愈遠。

肥豬劉見到肥佬陳出嚟幫手，嘴角微微上揚，個樣非常得戚，高佬佳無幾耐都出現係人群之中。



我雙眼死盯著佢地三個。
「我唔信辣椒妹秋儀會做啲咁既事！一定係你地陷害佢地！我要見佢地！」

肥佬陳望向肥豬劉問到。
「這到底是發生什麼事？竟然要把我叫出來。」

高佬佳搶住回答肥佬陳既問題。
「陳總！要你休息時間出嚟真係唔好意思⋯其實係咁樣既！佢其中一個女朋友勾引傑少！傑少寧死不屈，點知辣椒妹將傑少綁架到山洞裡面，再虐待傑少！」

我恨不得將高佬佳煎皮拆骨。
「你老味！死矮仔！唔好係到含血噴人！我要見秋儀！我要見辣椒妹！我要當面問清楚！我絕對唔信佢地會做啲咁既事！」

肥佬陳諗咗幾秒後。
「好，就讓你們當面說清楚，那些女生在哪？日生，把她們放出來問問。」



「陳⋯陳總⋯」
高佬佳似乎唔多想辣椒妹佢地被放出嚟，但佢唔敢違抗肥佬陳。

「好，我依家叫人帶佢地出嚟。」
肥豬劉講完，便轉身同佢女伴講咗幾句，女伴們隨即走返入山洞裡面。

兩分鐘後，肥豬劉女伴引領辣椒妹秋儀佢地走出嚟，見到佢地所有人被綑綁雙手，我心中既怒火早已沖天。

辣椒妹見到我地三個後，便大聲講。
「大陸仔！係佢陷害我地！我地係無辜㗎！佢地搵埋所有人打我地！」

高佬佳即刻反駁。
「兩個死姣婆！係你地勾引傑少，傑少唔食你地個套，你地就綁架佢！」

我指住高佬佳講。


「你唔好亂講嘢啊！你親眼見到佢地勾引MK傑咩？你無證據就咪亂咁講嘢！好快啲放咗佢地！」

高佬佳知道自己證據不足，所以反駁唔到我既說話，一時之間唔知點算好。

肥豬劉細細聲係肥佬陳耳邊講。
「陳總，依家佢地人質係我地手上，今日係對付大陸仔佢地既最好時機！你都唔想以後日子俾大陸仔破壞你營地既地位㗎。」

高佬佳連忙和應。
「係啊係啊陳總，你唔係好想對付大陸仔既咩？解決做大陸仔，佢旁邊個女仔以後就係屬於你既啦。」

肥佬陳聽完肥豬劉同高佬佳既說話後，便望向我旁邊既雪兒，淫笑幾秒後，便點點頭同意佢兩個既說話。

有肥佬陳既絕對支持，高佬佳便囂張咁同我地講。
「陳總既說話就係依到法律！陳總話佢地有罪就有罪！係絕對唔會放佢地走！有本事就同我地全營地既人鬥！」



我不屑咁望佢地三個。
「咁你依家即係人多恰人少姐。」

肥豬劉非常得戚，用個鼻哥窿對住我講。
「係啊！！吹啊！！有種就衝入嚟救人啊！！！」

肥豬劉講完，高佬佳便揮一揮手，所有營地女仔都令火把頭對住我地，唔俾我地衝入去救辣椒妹佢地。

「好！你唔好怪我地，達叔！！」
我轉個頭望達叔。

達叔點一點頭，便伸手入心口到掏出吊掛係頸鍊上既小笛子，然後達叔用力一吹，小笛子發出響亮優美既聲音，營地眾人對達叔既行為不解。

高佬佳指住我地恥笑。
「哈！哈！個傻仔吹喇叭想嚇我地啊？」

嗷～嗚！！！

突然山個方向傳來狼群叫聲，營地既人俾狼叫聲嚇到緊縮埋一齊，不久便聽到山個方向傳來萬馬奔騰既聲音，個聲音愈嚟愈近，營地眾人開始感到驚恐萬分。

高佬佳驚恐咁望四周
「發⋯發生咩事⋯」



待續