荒島日記（新手、後宮甜）（不定期更新）: 分享

我地繼續躲係舊石後面，觀察左幾分鐘後，確認鬣狗逃跑後無再返嚟，於是我決定走出去。

達叔伸手捉住我。
「東哥⋯就咁行出去？」

雪兒翹住我著手，然後同達叔講。
「來福係我地既同伴，唔洗驚喎。」

「但⋯但係⋯除左來福之外⋯總有其他狼係到⋯」
達叔一邊講，一邊指住其他野狼。



「來福係佢地既首領，我諗來福應該會保護我地三個既。」
說罷，我同雪兒便走出去。

「但係⋯⋯」
達叔諗諗下都係跟住我地兩個。

我地從舊石旁邊走出，慢慢咁行過去，而原本躺係地上休息既狼群，見到我地三個既接近，都即刻起抬頭望住我地。

「er⋯東哥⋯」


達叔俾狼群既目光嚇到腳有啲軟。

周圍充滿著濃郁既血腥味，而且眾多野狼嘴巴沾滿鮮血，一般人見到依個情景都會嚇到調頭跑。

天上有十數隻禿鷹迴響，雙眼一直緊盯地上既鬣狗屍體，但見到周圍有咁多野狼，佢地唔敢貿貿然衝落嚟搶食。

「無事既無事既，冷靜啲，唔好嚇到佢地就得啦，我地要表現出無惡意就得既啦。」
我拍一拍達叔既膊頭。

「但係⋯佢地個樣好似唔友善⋯」



愈嚟愈多狼望向我地，幾秒後，佢地起返曬身，目光一直望住我地，然後慢慢咁一步一步咁走過嚟。

「東哥⋯」

我轉個頭望向達叔。
「無事既，冷靜啲，記住唔好嚇親佢地就得啦。」

狼群開始加快腳步咁行，同我地之間既距離愈嚟愈近。

「東哥⋯我覺得唔對路⋯」
達叔停低左腳步。

「無事既無事既，只要⋯⋯」
我仲未講完，最頭既野狼對住我地三個吠叫，然後周圍野狼聽到吠叫，即刻跑向我地依邊。



「我都話唔對路既啦！跑⋯跑啊！」
達叔即刻調頭狂奔，我都拖住雪兒向後跑。

「發生咩事啊！」
雪兒驚訝咁望我。

「唔好理，快啲跑！」
我捉住雪兒隻手狂奔。

狼群見到我地向上跑，於是一邊吠一邊緊追住我地，我聽到個吠叫聲愈嚟愈近我地，死啦⋯啲野狼跑既速度太快⋯就快追得上我地⋯

「點解⋯啲狼會當左我地係目標㗎⋯」
雪兒一邊跑一邊問。



「啊！仲洗講！得來福一隻識你地！其他狼同你地根本就唔熟！依家見到我地，未當我地係敵人囉！」
帶頭跑既達叔說到。

「唔好講啦⋯快啲跑上去⋯然後搵棵樹爬上去避一避先啦！」

達叔一邊跑一邊回頭，表情變得十分驚恐。
「死啦死啦⋯啲狼就嚟追上我地啦⋯」

嗷嗚！

後面傳來極大既狼叫聲，所有狼聽到後就即刻停低腳步，無再追住我地三個。

「達叔！唔洗跑啦！佢地無再追啦！」
我大聲呼喊前方仲跑咁既達叔。



達叔聽到我既叫聲後，佢便停低腳步，然後回頭望向我地，確認狼群無再追我地便鬆了口氣。

「呵⋯呵⋯咁樣俾佢地追一追⋯命仔都短幾年啊⋯」
達叔邊講邊用手抹走額頭上既汗水。

全部野狼都回頭望去，來福就係依個時候加速咁奔跑上嚟，穿過狼群，跑向我地既身邊，佢個樣就好似狗仔見到主人，條脷擺到一邊。

來福跑返到我地身邊，然後就好興奮咁圍住我地三個不停咁跑。

我即刻捉住來福令佢停低，然後雙手用力咪佢塊面，不斷咁搓揉。
「早啲叫啊嘛！差啲就俾你啲同伴食左落肚！死來福。」

來福係咁擺柴犬既招牌笑容，搓左一陣，雪兒就推開我，然後佢好溫柔咁掃來福背隻啲毛。
「人地啱啱先打完交，身上仲有傷㗎⋯你仲玩佢！」



「唔係啊，佢個樣幾享受啊。」

「享你個頭！」
雪兒用拳頭敲左我頭一下。

過左一陣，來福就帶我地行返去，然後就見到成群野狼，達叔見到咁多野狼，諗返啱啱俾佢地追殺，嚇到躲係我後面，而雪雪兒同來福並排行，對於遠處成群既目光，佢並無害怕。

周圍既野狼望左我地幾眼後，便繼續躺下休息、梳理自己既毛髮同同伴玩耍，無一隻走去食鬣狗既屍體，睇嚟無來福既批准，佢地唔會擅自走去食嘢。

嗷！嗷！

行在最前既來福吠左兩聲，然後就見到有幾隻野狼快速向前跑去，無幾耐，就見到六隻狼拖住鬣狗屍體跑嚟我地依邊。

野狼將鬣狗屍體拖到我地面前放低後便離開，來福微笑咁望住我同雪兒。

達叔對於依個行為感到奇怪。
「發⋯發生乜嘢事？」

雪兒蹲下身，伸手溫柔咁撫摸來福個頭。
「來福既意思係分享食物俾我地啊，來福真係乖，多謝你啊。」

「東哥⋯東哥⋯」
達叔細細聲叫到，但實在太細聲，所以我完全唔知佢叫咁我。

達叔邊R頭邊唔好意思咁講。
「其實⋯我唔係想打攪你地相聚時刻⋯但我想講呢⋯我地係依到咁耐⋯係唔係趁個天未黑趕返去呢⋯⋯」



待續