荒島日記（新手、後宮甜）（不定期更新）: 危機

———荒島———


我地三個跟住來福跑左成分鐘，但來福實在跑得太快，我地三個根本追唔上佢，慢慢望住來福既身影係密密麻麻既樹林中消失。

「來福！來福！」
雪兒不停咁大嗌，但來福並無回頭搵返我地。

「來⋯⋯」
雪兒想繼續大嗌，我伸手按住佢個口，唔俾佢發出聲音，雪兒便瞪大雙眼望我。



「噓，唔好嗌啦雪兒，你咁樣大嗌，會引到森林既猛獸嚟我地依到。」
雪兒聽到我咁講後，便冷靜返無再大嗌，但來福就咁跑走左，令到雪兒有啲唔開心。

「東哥，咁依家點啊？死啦，我地咁貿貿然跑入個森林裡面，我地會被困係依到，永遠都出唔返去㗎⋯」
達叔講完，便擺出一副吶喊既樣。

「我啱啱有攞把軍刀係沿途既樹落記號，可以沿住記號返去。」

「東哥果然厲害！」


達叔一邊講一邊拍我膊頭。

「噓，唔好講咁大聲。」

達叔連忙點點頭。
「係⋯係⋯」

於是我地三個慢慢咁行，細心聆聽周圍既聲音，但狼群無再叫，令到我地唔知行邊個方向好⋯

呀！呀！



頭頂上既天空飛過一隻禿鷹，佢往兩點鐘方向快速咁飛去，幾秒過後，五六隻禿鷹亦都飛向依個方向。

班禿鷹知道個到會有嘢食，所以飛曬過去，之前係佢地引領我地去搵達叔，依家肯定引領我地去搵來福。

狼群、野豬王、鬣狗群，佢地將會係個到有場大戰，肯定死傷眾多，禿鷹飛過去隔岸觀火，等到大戰完就收漁翁之利。

我指住天上飛咁既禿鷹。
「達叔，雪兒，我地跟住禿鷹飛去既方向，相信好快會搵到來福。」

「嗯。」

於是我地三個人跑去禿鷹既方向，一分鐘後，我地停低左腳步，因為我地跑到斜坡邊，而天上既禿鷹飛到前方後，係一棵高大茂盛既樹頂停留。

達叔轉個頭問我。


「東哥⋯隻狼真係係下面？我地真係要落去？我地咁樣會唔會送羊入虎口⋯」

「個斜坡唔係好斜，我地上落都好輕鬆，我相信來福就係前面。」

嗷～嗚！

突然傳來強烈既狼叫聲。

「大陸仔，個叫聲係下面傳過嚟㗎。」
雪兒對住我笑，並且好興奮咁捉住我隻手fing嚟fing去。

雪兒講得無錯，狼既叫聲確實係來自斜坡下面，可以確定來福就係斜坡下面。

我望住個斜坡，然後同佢地兩個講。
「我地慢慢行落去，小心啲啊，雖然個斜坡未算好斜，但一失腳，都足以令你地直接碌落去，到時唔死都重傷。」



「好。」
達叔深深吸了一口氣，然後就戰戰兢兢咁一步一步慢慢行落去，而雪兒捉住我隻手，都好小心咁行。

禿鷹群係天上不斷迴旋，我地仲開始聞到一陣陣血腥味，愈靠近個邊，血腥味就愈強烈，雪兒都頂唔順陣味，皺曬眉頭。

「好臭啊⋯」

「東哥⋯依啲腥味⋯唔會係血啊嘛⋯」

「er⋯總之大家小心啲啦⋯」

我地三個繼續慢慢行落去，隱約聽到動物既叫聲，睇嚟我地愈嚟愈接近佢地，過左一陣，我地終於行落到平地，然後見到前面有舊大石。

依舊大石完全將我地三個遮住，佢表面十分光滑，形狀似足鈍角三角形，我地三個小心翼翼咁走到舊大石後面。



「噓，我睇下咩情況先。」
講完，我便抬頭觀察前面既情況，尋找狼群同鬣狗既身影。

抬頭一眼就望到佢地，佢地正正係我地前面既空地。

所有鬣狗個邊滿地鮮血，而所有鬣狗滿嘴都係口水同鮮血既混合物，而隻野豬王早已死去，成身都係鬣狗咬既傷口，有啲位置仲深到見骨。

隻野豬王旁邊有兩隻倒地不起既鬣狗，兩隻鬣狗都係開肚破腸，身體輕微咁抽搐，應該就快死去。

我估係野豬王跑到落嚟依到，見無辦法逃跑到，於是就同班鬣狗死過，發狠咁撞傷其中兩隻鬣狗，但時間一耐左，力量開始下滑，再加上成群既鬣狗，最後都係寡不敵眾。

狼群係十米外怒視班鬣狗群，原本隻野豬王係佢地既獵物，但依家俾鬣狗搶左，仲要見到佢地食得津津有味，更加火滾。

來福從狼群中走出，然後對住鬣狗群怒吼，其他狼見到後亦都跟住怒吼。



雖然有兩隻鬣狗重傷就死，但鬣狗群完全無害怕來福佢地，反而繼續啃咬野豬王啲肉，完全無視狼群吼叫。

飢餓既狼群一直望住鬣狗啃食野豬王，口水就快流到地下，有唔少狼仲回頭望住來福，好似在等待啲咩。

達叔感覺到依場大戰準備發生，嚇到塊面都青埋，然後口窒窒咁講。
「東哥⋯東哥⋯我地走啦好嗎？我驚等陣佢地會傷及無辜⋯」

雪兒捉緊我隻手，怒視住達叔。
「唔得，來福係我地既同伴嚟，我地唔可以就咁走。」

「sor⋯當我無講過⋯」
達叔無奈地望返前面。

嗷～嗷！

來福怒吼一聲，然後帶頭衝向鬣狗到，狼群亦都跟住來福，瘋狂跑向鬣狗個邊，而鬣狗們都停止進食野豬，發狠咁向來福個邊跑。

唔夠兩秒，狼群同鬣狗群便進入混戰，同來福決鬥既鬣狗係鬣狗群裡面最大隻，應該係鬣狗個邊既大佬。

雪兒緊張地捉實我手臂，雙眼一直望住來福，害怕來福係依場大戰會出咩意外，但來福經驗老到，狠狠攻擊對方之餘，亦有閃避對方既攻擊。

雖然狼群既數量比鬣狗群數量多接近一倍，但依鬣狗既強壯程度，要佢地一隻打兩隻狼，都唔成問題。

密集既群毆令我地眼花瞭亂，好在來福既毛髮係銀白色，令我地仍然可以搵到佢。

一開始狼群優勢比較明顯，以二對一咁攻擊鬣狗，但過左五分鐘左右，狼群既體力開始下滑，攻勢變得緩慢，來福都一樣，閃避既速度都變慢起嚟，開始係咁承受鬣狗既攻勢。

有數隻野狼傷重到倒地不起，鬣狗們雖然都有唔少傷，仍繼續攻擊其他未死傷既狼群，士氣高昂。

雪兒見到狼群節節敗退，變得著急起嚟。
「大陸仔⋯點解會咁㗎⋯」

「來福既狼群雖然數量多好多⋯但普遍都好瘦⋯而班鬣狗就隻隻都咁強壯，而且本身戰鬥力就勁過狼，又大隻過佢地，只要時間一耐左，來福佢地就唔夠鬣狗鬥⋯」

嗚！

鬣狗既大佬見來福速度愈嚟愈慢，突然用力用頭撞去，將來福撞倒一邊⋯⋯



待續