荒島日記（新手、後宮甜）（不定期更新）: 潛入

到左第二日，條腰同大腿既酸痛感消失得七七八八，唔洗再搽跌打酒，今晚潛入肥佬陳個山洞係最適合不過。


於是我好似以往咁背住開山刀同弓箭走入森林個邊，一嚟係穩定返啲食物儲備，雖然依家有咁多鰻魚乾，夠我地食兩個星期，但始終都係愈多愈好。


二嚟好似以往咁打獵，避免其他人覺得我無所事事，會唔會密謀乜嘢大計。


走向上游方向個樹林，諗住會無乜人會係附近，點知行左唔夠五分鐘，我就聽到前面有幾個人係到，我即刻躲係樹後面。



傳來一把女仔聲。
「喂，你覺得點啊？」

「什麼？」

「我話離開佢啊⋯」

「你們決定了嗎⋯這樣離開他不好吧⋯」



「唔通仲同佢一齊啊？」

「係囉係囉，我地跟左佢咁耐，有無得到咩好處啊？」

「就是啊，你看我們和他這麼多天，他沒有一個承諾實現到⋯」


我伸出頭望一望聲音個方向，個到有四個人企係到討論，依四個人係文健既女伴，包括個晚同文健野戰既人妻。

「佢依家仲變左個廢人，要我地照顧返佢，我地本身就已經唔夠食⋯」



「大家不要這樣⋯我相信他傷好後，一定能兌現承諾的。」
同文健最親暱既人妻女伴，幫文健講好說話。

「你咁肯定？」

「嗯！我相信他一定能兌現的。」

「我地再等多佢幾日⋯」
帶頭叫走既女仔心軟返。


我靜靜咁走遠少少，從一邊走過，點知採爛樹枝發出既聲音，令佢地四個即刻望我個方向。




佢地四個又驚訝又憤怒，憤怒係一直以嚟對我既態度，驚訝係因為我突然既出現，誤會我係特登走過嚟偷聽佢地講嘢。


我都唔浪費時間同佢地解釋，反正佢地一向憎我，我解釋只會變成掩飾。


於是我繼續行左十分鐘，見周圍都無人，就攞出弓箭，躲係樹後靜靜咁觀察，睇下有無動物走過⋯⋯


一個鐘後，我便帶住一隻兔仔兩隻野雞，慢慢咁走返山洞個方向。


營地既人普遍徒手捕捉獵物，好啲既就用矛捕捉獵物，所以敏捷既兔仔同野雞一向捉唔到，令到依一帶既兔仔野雞特別多，而且仲特別猖狂。




我走到佢地既視線範圍，佢都仲可以一啲都唔驚慢慢行，感覺到佢地好不屑，完全唔放我係眼內⋯⋯


我高興地吹著口哨，今日既收獲又令我地多兩三日糧，令我地既糧食更加充足。


返去既沿途見到唔少營地女仔係到打獵，去地打獵打到成身泥土，一想到佢地以前係香港幾咁貪靚，收幾多觀音兵，就感到有些少唏噓。

真係世事無常⋯

佢地嬲霸霸咁望住我，然後視線慢慢向下，見到我手上既收獲，一一發出羨慕既目光。

「你睇下⋯佢又捉左好多動物啊⋯」

「如果我都好似雪兒咁靚女就好啦⋯」



「佢地從來都唔憂糧食既問題⋯」

我加快腳步行，無幾耐就返到山洞，見到佢地三個都係到，於是就將兔仔同野雞交俾辣椒妹同秋儀，辣椒妹同秋儀就走到河邊清洗，我就坐係雪兒身邊攬住佢條蠻腰。

「東哥！」
達叔從河邊走過嚟。

「達叔！多謝你支跌打酒！」

達叔走到我面前。
「洗乜客氣啊，估唔到你咁快好返，而且幾下手勢就捉到咁多動物。」

「仲未好返曬，不過都要儲返多啲糧食，啱啱走左去打獵？」



「無啊，屋企仲有兩條鰻魚乾，海鷗仲有半隻係到，食完先啦。」

果然係達叔既性格⋯佢從來都唔會居安思危⋯

我望一望個天空。
「達叔，我勸你依幾日好快啲搵食物返嚟，過一排可能會落大雨。」

達叔跟住我望個天空。
「點解啊？天氣幾好啊，陽光普照，唔似會落大雨啊。」

「係啊，陽光普照，但最弊一舊雲都無呢！而且今日你唔覺得有啲焗既咩？依啲全部都係落大雨既先兆！」
我講完之後，達叔愈諗愈覺得不秒。

「東哥⋯借你把弓箭嚟用先⋯小弟去打獵⋯夜啲還俾你。」
達叔講完，便攞住弓箭跑去樹林個方向。




終於到左夜晚，月光照到山洞口前，我望一望旁邊既三女，見到佢地熟睡既樣，於是靜靜咁起身，攞埋套潛水衣慢慢走出山洞外。


走到旁邊無人住既山洞，除左自己啲衫褲，然後著上件全黑既潛水衣。件潛水衣對我嚟講果然大件左少少⋯


除左無潛水衣包住既手掌，我身體完全融入左漆黑既環境裡面，掂！咁就更加容易潛入肥佬陳個山洞。


我快速過左河對面，然後小心翼翼咁行，放慢腳步，盡量唔發出聲音，害怕會嘈醒營地既人，雖然依個鐘數啲人都係熟睡咁。


終於走到肥佬陳山洞外面，我係洞口左右望左一陣，確認無人經過或見到，鬆了一口氣後，便走入肥佬陳山洞到。

慢慢咁行到黑布面前，正想拉起黑布進入「大廳」既時候，裡面傳出肥佬陳既聲音。
「嗯？怎麼來了？找我有什麼事？」

唔係啊嘛⋯佢咁快就知道我潛入左嚟山洞？即係佢一早就睇穿曬我⋯⋯


依一刻，我十分緊張，隱約聽到自己心跳加速既聲音，汗水慢慢從額頭上滴落嚟⋯⋯我考慮咁入唔入去好既時候，黑布後面傳嚟第二把男人聲。

「陳總，我地係嚟勸你唔好同大陸仔做結拜兄弟㗎。」
說話既人，我認得出係肥豬劉把聲。

「無錯無錯！陳總，大陸仔個人並唔係咁簡單㗎。」
依一把聲，係高佬佳把聲。


我拉開少少黑布，觀察裡面既情況，肥佬陳坐左係中間既梳化上，嘴裡仍然叼著支雪茄，而肥豬劉坐係左邊既梳化，而高佬佳同MK傑坐係右邊梳化。


嘩⋯咁熱鬧既⋯六國大封相啊？成個營地既男人都係曬到咁濟⋯

除左文健個廢柴。

唉⋯咁多人⋯而且肥佬陳又未訓⋯今日都係偷唔到槍既啦⋯⋯


肥豬劉帶頭講。
「以前大陸仔未嚟，營地係陳總既帶領下，係幾咁繁榮安定，自從佢一嚟到，營地就幾多是非出現，而且佢仲叫走兩戶人，減少陳總你收入。」

肥佬陳無講嘢，繼續聽佢地講。


高佬佳指住挨係一邊既MK傑。
「陳總，你睇下阿傑，佢從來都唔會撩事鬥非，為人熱心助人，係營地得到所有女仔既歡心，係佢地心目中既好男人，但大陸仔妒忌佢，於是打到佢成身傷曬，要成兩個星期先好得返啊⋯」


高佬佳拉起MK傑件衫，露出MK傑既肚同背隻，MK傑成身都俾繃帶包紮，MK傑即刻講：
「陳總！我有響你朵㗎！大陸仔話係你既人，所以更加用力打我啊⋯」

肥佬陳聽完MK傑既說話後，面色開始變得凝重。

「今次打阿傑，下次可能打我，再下次可能打劉日生，點知會唔會有日打陳總你㗎⋯大陸仔依個人真係養唔熟㗎⋯」



待續