荒島日記（新手、後宮甜）（不定期更新）: 契弟
依家山洞裡面既氣氛十分嚴肅，我緊張到背隻流出冷汗，但我既緊張唔可以表現俾肥佬陳睇到，唔係既話，以後氣勢就會一直輸俾佢。
我挨向梳化，扮到好淡定咁，然後懶洋洋咁同肥佬陳講。
「搵我咩事？」
肥佬陳一邊叼著雪茄一邊講。
「你小子，自己做了什麼事自己不清楚？」
我嘴角上揚。
「我做左啲咩要勞煩你請我過嚟？」
肥佬陳惡狠狠咁望住我。
「好啊，小伙子，你煽動我的居民離開營地，你真是天大的膽子。」
我用手拍左一下張檯（大力得濟⋯）
「你話係就係既啦？」
肥佬陳眼角望左一眼Lily。
「嘿！還不認是吧！Lily，快幫我叫他過來！」
「好的陳總。」
秘書Lily起身便快速走出山洞。
「我有人證，你今天就甭想抵賴。」
肥佬陳得意咁對我吐出一口煙。
人證？
「來了，陳總。」
秘書Lily返左嚟，而佢背後有兩個人，一個人攙扶住另一個人行入嚟，係文健個仆街同佢個人妻女伴。
我驚訝咁望住文健。
「你就係人證⋯」
文健應該係估唔到我會係肥佬陳山洞出現，即刻嚇到想掉頭走，但係俾秘書Lily欄住出口，無辦法離開個山洞。
「你想去哪？快過來坐下！」
肥佬陳指著我對面既梳化。
文健唔敢違抗肥佬陳既意思，即刻同佢既人妻女伴坐左係我對面，佢一直迴避我既眼神，同人妻拖住個隻手不停咁震。
人妻安撫文健。
「不用怕，你照直說就行了，陳總會保護你的。」
肥佬陳望住文健。
「你昨天來求我的時候是怎麼說的？現在把昨天說的話重複一遍。」
文健求佢？我諗文健應該係兩個星期唔可以打獵，所以賣情報同肥佬陳嚟換取糧食，情報又係紫霜個後母個到聽返嚟？
文健繼續避開我既眼神。
「係⋯係大⋯係大陸仔叫楊永達離開營地㗎，搬去佢個邊同佢地住⋯另外丁凱彤佢地五個⋯都係佢叫㗎⋯大陸仔話佢可以保護到大家，以後唔洗交食物俾你⋯依件事係千真萬確，大陸仔⋯你唔好抵賴⋯」
我嬲到即刻企起身。
「佢地自己搬過嚟關我鬼事啊？你個仆街屈得就屈，信唔信打鑊你！」
文健聽到我想打佢，佢驚恐到躲係肥佬陳後面，跑步動作太大導致佢背隻既傷口裂開，痛到文健落淚。
人妻帶著淚光擋到我面前。
「人渣！你一直以來傷害文健還不夠嗎？」
我指住文健。
「邊個傷害邊個啊！你個仆街文健，今日好同我講清楚！」
「好了好了，我今天叫你來也不是為了教訓你的，你快坐下。」
肥佬陳示意我坐低。
我坐返落梳化。
「文健！我遲早實搵返你算帳！」
然後我想返起肥佬陳頭先既說話。
「咁今日叫我嚟做咩？」
「我覺得我們都是同一類人，都是那麼的有實力，都有適合做領袖的才能。」
無啦啦咁讚我，一定有問題。
「講重點啦。」
肥佬陳嘴角上揚。
「好，那我就開門見山吧，我收你做小弟，你以後叫我做大哥，我們兩個一起好好管理營地，你們搬來營地這邊住，我免收你山洞打獵的收穫，你有什麼需要也可以找我！怎麼樣？」
秘書Lily加把口講。
「陳總是非常有誠意邀請你的，以後除了陳總以外，營地就你最大，其他人都聽你話！」
依啲條件係幾吸引人既，不過我就無乜興趣同你依啲人同流合污。
文健同佢既人妻女伴露出驚訝既表情，佢地兩個萬萬都估唔到，肥佬陳竟然會主動搵我合作，並且要我做佢細佬，同佢一齊管治營地。
文健依家肯定覺得自己大難臨頭，一直以嚟傷害我，依家肥佬陳主動搵我一齊管治營地，佢以後唔洗係營地生存啦，依個消息對佢嚟講，真係一個好沉重既打擊。
我奸笑咁望住文健，我愈笑，佢就愈驚，笑到佢心都寒埋。
我望返肥佬陳。
「你今日搵我合作，並且做你細佬，你唔驚我隨時反咬你一啖？」
肥佬陳摸一摸腹部既黑色硬物，然後好有自信咁同我講。
「我相信，你再大的膽子，也不敢做這樣的事。」
死肥佬，又攞支槍嚇我？
如果拒絕佢既話，我可能就有生命危險，但我又唔係好想應承佢同佢合作，更加唔想做佢契弟！
一個字，拖！
拖得一次得一次，拖得一日得一日。
我笑笑口咁對肥佬陳。
「多謝你咁睇好我，不過我都需要一啲時間考慮下。」
「呼⋯」
文健同佢既人妻女伴因為我無答應肥佬陳而鬆左一口氣，文健仲不斷咁抹額頭上既冷汗。
肥佬陳笑出豬叫聲。
「咳咳咳！！好小子！竟然還要時間考慮考慮，要是給營地裡其他人有這種福利，他們早就答應了。」
秘書Lily再次加把口。
「就是就是，這種權力只有你和陳總才有，其他人知道肯定羨慕你的。」
我傻笑咁講。
「我係我既山洞話唔到事，我要返去問下佢地既意見，佢地話俾就俾，唔俾就唔俾。」
我講完，在場所有人都驚訝到靜止，秘書Lily同人妻女伴雙眼發光咁望住我，依種目光並唔係鐘意左我，而係好似係見到曙光，見到希望。
Lily同人妻知道我咁聽三女既說話，佢地兩個可能覺得我管治營地，就可以提升到營地女性既地位。
不過好可惜，我真係唔想同肥佬陳同盟。
肥佬陳靜止左十幾秒後，再次講返嘢。
「哎唷！原來是老婆奴啊！男人嘛，需要強硬一些才能做大事，怎麼可以什麼事都回家問老婆呢。」
「我唔係老婆奴，我尊重佢地既意見姐，咁我走先啦，過幾日再答覆你地，係咁先，byebye！」
我未等到肥佬陳同意，就快速咁走出山洞。
走出山洞之後，我回頭望山洞裡面，肥佬陳同秘書Lily無走到出嚟，我即刻向返自己既山洞方向跑。
山洞口外有餘燼的火炭，佢地三個應該啱啱食完嘢。
「雪兒！秋儀！辣椒妹！我返嚟啦！」
我向住自己既山洞大嗌，但完全無一個人出嚟接我。
「雪兒？秋儀？辣椒妹？」
我望山洞裡面，山洞裡面卻一個人都無。
頂！我唔會係中左調虎離山之計啊嘛！肥佬陳今日約我係想我去佢山洞，將我困一段時間，然後再搵其他人捉左雪兒秋儀辣椒妹佢地。
正想回頭去搵肥佬陳算帳，我後腦就俾人重重打左一下，啪！
「頂⋯」
我無力咁倒在地上，突然有四個人企係我面前，但我雙眼已經模糊到睇唔清楚佢地個樣。
「東哥！東哥！你地⋯做咩！」
「欄住佢！唔好俾佢入嚟！」
「咁之後點做？」
「綁起佢！」
啱啱好似係達叔把聲，但我個頭愈來愈暈，耳仔開始出現沙沙既聲音，雙眼亦漸漸失去光芒⋯
「東哥⋯東哥⋯醒下啊⋯」
「東哥⋯東哥⋯」
有人拍打我塊面。
我張開雙眼，見到達叔蹲係我面前，達叔見到我醒左，即刻用碗裝左啲清水，然後遞到我嘴邊。
「東哥，飲啖水先。」
我張開口，慢慢咁飲碗裡既清水，達叔好緊張咁不斷回頭望，好似害怕背後突然會有人出現。
飲完水，我想起身走動，先發現自己雙手同雙腳俾人用繩綁住。
「達叔⋯做咩我會俾人綁住左⋯」
「東哥⋯er⋯」
「達叔⋯究竟發生乜嘢事？唔好講住先，快啲幫我鬆綁。」
「好！」
達叔即刻走到我背後，拉扯我條繩個陣，突然山洞外傳來聲音。
「點解佢會入左嚟㗎？快啲阻止佢！」
待續