荒島日記（新手、後宮甜）（不定期更新）: 轉移

第二日，我走出山洞外伸個懶腰，雪兒秋儀同辣椒妹一早已經醒左，三個係山洞外整咁早餐。


「東哥！早晨啊！」
達叔從自己山洞個邊走過黎，見佢春光滿面眉飛色舞咁，就知道兩位阿嫂俾佢接左返黎。


「達叔，早晨，咁早走過黎吹兩句。」
我招手叫達叔坐低。




達叔左右望一望，然後細細聲係我耳邊講。
「東哥，你知唔知營地個邊今日好奇怪啊。」


我望向營地個方向。
「乜嘢咁奇怪啊？」


達叔咳左幾聲後就講。


「營地今日全部人突然好團結，係文健既帶領下，全部人一齊走向上遊山個邊打獵啊。」


「咁就好啦，咁真係多謝文健。」
我望向雪兒個邊，睇住佢溫柔仔細咁烤隻海鷗。


達叔疑惑咁望住我。
「多謝文健？」




「係啊，如果無佢帶領營地既人，我等陣就無辦法擺陷阱捉獵物。」
我繼續望住雪兒烤海鷗。


「擺咩陷阱捉獵物啊？帶埋我去啊！東哥。」
達叔祈求我帶埋佢去。


我望一望個天空。
「好啊，食完早餐就出發啦。」


「嗯！我依家返去食嘢先，等我啊！」
達叔講完就走返去自己既山洞。





達叔快快趣趣食完，然後就急不及待一早走過黎。


我食完個早餐後，就帶住把開山刀，攞埋係四眼妹個度換黎既鐵桶，同達叔走向下游個方向。


達叔見我帶住佢去下遊個方向。
「東哥，你要捉個啲唔會係鰻魚啊嘛？」

「係啊，你唔係好想食鰻魚既咩？」
我反問返達叔。




達叔有啲失望咁講。
「想係想⋯但係⋯」

「但係咩啊？」


達叔一邊講一邊形容當時個情況。
「個啲鰻魚好難捉㗎，營地所有人落曬條河度捉魚，都係一條都捉唔到，我自己捉過一次，佢都「sir」一聲就滑走左。」


我搖曬頭講。
「咁當然啦，鰻魚咁滑，傻仔先徒手捉鰻魚。」

「你有咩方法捉啊？」




我攞起個鐵桶。
「陷阱囉，等陣你就知係點既啦。」


「諗起可以捉到鰻魚就好興奮啦。」
達叔好開心咁快速度行。



十幾分鐘後，我地黎到下游個方向，河裡面隱隱約約有黑色既影游黎游去，我已經確定係河鰻黎。


「達叔，你幫我斬棵竹落黎，我等陣擺陷阱有用。」


我指住前方個邊幾棵竹。


「好啊。」
達叔便攞左我既開山刀過去。


我用一舊比較鋭既石頭，係距離河邊三米既泥土上，不停咁挖鬆下面啲泥，然後將啲泥搬走。


挖左差唔多十分鐘，終於挖左一米左右深既窿出黎，而達叔亦都完成任務，托住一條竹條返黎。

「達叔，你幫我斬三條三米深既竹條出嚟。」
達叔聽完就開始行動，而我係個窿同河邊之前挖三條坑出黎。


「搞掂啦，東哥。」
達叔遞上三條三米長既竹俾我。


我將三條竹全部整齊咁放係挖好既坑上，一邊對住條河，另外一邊係對住個窿，個窿個底部我放左鐵桶係個度，而條竹條傾側於河裡面，形成河個邊低，挖個窿個邊高。

「東哥，究竟依個方法得唔得㗎？」
達叔唔係好相信我依個捕捉方法。


我拍住心口講。
「信我啦，我之前查過google，睇埋youtube，依個方法係「抄」返黎㗎！應該得既。」


「真係得？」


我搭住達叔個膊頭講。
「信我啦，係得㗎，河鰻鐘意游去有窿既地方，而且鐘意向上游，所以我依個設計係最啱佢鐘意既啦，到時佢地就回透過依啲空心既竹，游到我個鐵桶到。」


我係附近搵左唔少樹枝返黎，搭上個窿上面遮住，再放唔少樹葉遮住，咁樣就算有營地既人經過，應該都見唔到個陷阱既。


我收拾好啲嘢後。
「走啦，達叔，一晚過後，聽朝早就會有收穫既啦。」


「東哥，我今日幫你，到時分一兩條俾我wor。」


「得啦得啦，你要三條都無問題。」
我地兩個慢慢咁向上行，行返去山洞個方向。


我地就黎行到山洞個邊，見到達叔其中一個女伴一直好緊張咁望向營地個方向，達叔於是走上去問。


「做乜咁緊張啊？有啲乜嘢睇啊？」
達叔亦跟住佢女伴，望向營地個邊方向。


「營地既人全部打完獵返黎啦。」
達女伴有啲好緊張咁講。


「佢地收穫得唔得？」
我正想問既時候，達叔搶先問到。


「佢地收穫都得既，我見唔少人都拖住海鷗，但係⋯」
達女伴雙眼透露出少少恐懼。


「但係咩啊？」


達女伴瞪大雙眼講。
「但係佢地今次去捕獵，有人受左重傷，聽講係俾老鷹既爪爪傷㗎，好似見到骨啊，佢依家成個背隻都係血啊。」


「邊個咁黑仔啊，唔會係文健啊嘛？」
我笑左一笑。


「無錯啊，就係文健啊，佢幾個女伴托住佢返黎㗎，依家聽講去左藍醫生個度。」


「男醫生？依度都有醫生㗎？」
我真係估唔到我地係荒島，竟然會有醫生係度⋯⋯



待續