荒島日記（新手、後宮甜）（不定期更新）: 網

「雪兒！秋儀！辣椒妹！我返黎啦！」
我把手中既樹藤放係地上，三女見我無打獵，反而執一大堆樹藤返黎而感到奇怪。

「你唔會係打唔到獵⋯要我地食樹藤咁齋啊嘛⋯」
辣椒妹一直望住D樹藤，雪兒同秋儀係一邊唔知講咩好。

「唔好傻啦，D樹藤有用㗎！唔係攞黎食。」
我講完便走返去河邊洗手。

我坐低係火堆邊，雪兒便唉聲嘆氣。


「大陸仔⋯D狼肉只夠我地食埋今日兩餐⋯」

「我地⋯洗唔洗慳D食啊？」
秋儀講完便望一下我地。

「好提議！我都覺得我地要食少D！咁樣先可以確保糧食既穩定。」
雪兒舉埋手表示贊成。

「唔得啊⋯我唔可以餓親㗎⋯我餓親係訓唔著㗎⋯」
辣椒妹不停擺手表示反對。



點解我感覺辣椒妹所講既「餓親」並唔係肚餓既餓呢⋯⋯

「唔洗嘈啦，大家唔洗擔心，我今日一定會打到獵物返黎既，我唔會俾大家餓親。」
我拍曬心口講，不過三女好似唔多信我。

咁又係，依度同以前住個度唔同，依度有咁多人係附近打獵，可能好多動物已經俾佢地食曬，而且我依兩日出去都無帶到獵物返黎，所以佢地先有D信我。

「放心wor！我有幾何餓親你地，信我啦，我今日出去一定搵到食物返黎。」
我再拍一拍自己個心口。



「咁好啦，我地快D食嘢先啦。」
雪兒把剩下既狼肉烤熟，佢將最大個舊俾左我，而佢地三個就分得好細舊。

「你地都食多D啦。」
我攞出軍刀把自己個份切成四份，然後分俾佢地三個。

「學東哥⋯你去打獵⋯應該食大份D⋯」
我即刻阻止秋儀推舊狼肉過黎，用手摸一摸佢個頭。

「你地食多D啦，等陣需要你地幫忙㗎。」
我望住三女講。

「幫咩忙啊？」
辣椒妹疑惑咁望住我。



「我需要你地幫我搞一搞D樹藤，將佢地搓細少少，令佢地堅韌D，無咁容易斷，我需要將D樹藤整個網出黎。」
跟住我用樹枝係地上畫左一個網出黎。

「你要用黎捉魚啊？」
辣椒妹突然好大聲咁問。

我笑一笑。
「夜D你就知～」

「懶神秘咁。」
雪兒鄙視咁望左我一眼。

於是我地食完午餐便係山洞口整理D樹藤，我地大家不停咁搓幼D樹藤，期間仲有唔少營地既女仔走左過黎觀看。



我地依家就好似海洋公園既熊貓咁，大家係一定距離外觀察我地既一舉一動。
「喂，佢地四個係度做咩啊？」

「唔係啊嘛，佢地真係好似整細D樹藤黎方便食用wor，佢果然係廢到一個點。」
個女仔講完便幾個一齊係度恥笑。

「癡線㗎佢地，如果我俾我跟住依個廢柴生活，我寧願死左佢算。」

「睇黎雪兒佢地離開大陸仔既日子不遠了。」

「我還真的是第一次見有人會餓到吃樹藤，我以為是六十年代才會發生的事。」
同文健搞嘢既少婦都係度睇。

辣椒妹攞住我把開山刀，對住面前個班圍觀既女仔大喝。
「你地班仆街！再亂講嘢，信唔信我劈撚死你地啊嗱！」



個班女仔一見到辣椒妹揮刀驚嚇，即刻嚇到四散。
「發窮惡啊！」

「好恐怖啊她，快跑！」

我終於耳根清靜返，係無班人圍觀既冷言冷語下，我地好快手咁搓好曬D樹藤，然後整左一個兩米大既網。

「好啦，等我好消息，我等陣就帶獵物返黎俾大家食。」
我收起把開山刀，然後攬住個樹藤整成既網，便揮一揮手便走向上游個方向。


走到河邊個陣，發現有人係後面一直偷偷地跟住我，於是我攞出把開山刀。
「邊個！邊個鬼鬼祟祟咁跟住我！好同我出黎吓！」



「係我啊，學東哥。」
秋儀好似隻兔仔咁從樹後面跳出黎。

我無奈地收返把刀。
「er⋯你唔係同雪兒辣椒妹係山洞等我既咩？點解我會跟左過黎。」

「佢地話搵個人陪住你好D wor，驚你會做錯事，所以就叫左我跟過黎睇住你囉。」
秋儀用明亮既雙眼望住我。

我諗秋儀所講既佢地應該係雪兒自己一個既主意，睇黎雪兒都仲係擔心我會去搵文健報仇。

「咁好啦，等陣打獵唔好出聲就得啦。」

「知道！學東哥！」
秋儀挺胸收腹，做左個敬禮動作，佢咁嬌滴既身型做依個動作真係好可愛。

同秋儀一直行左幾分鐘，前面樹林裡面非常嘈吵，然後走出幾個女仔出黎，其中一個係營地賣雜貨既四眼妹。

「喂！大陸仔！早晨啊！」
四眼妹笑住咁同我揮手，而其他女仔見到我便點下頭。

奇怪，達叔唔係話營地所有人都憎死我既咩？反而四眼妹佢地就無依回事。

「咦⋯你地⋯」

「做咩口窒窒啊？我靚女得濟啊？唉！我都知我天生麗質～」
四眼妹講完便撥一撥頭髮。

「收皮⋯我只係覺得奇怪，你地點解會同我打招呼。」

「點解唔可以打招呼啊？你係驚今日空地個度既討論？」
四眼妹一講，我即刻幻想到今日空地上既討論有幾咁⋯多人⋯

「個仆街文健，依家黎到荒島仲要玩埋城市論壇，唱衰我，我遲早打鑊佢！」
我拉一拉手筋。

秋儀捉住我隻手臂。
「雪兒話過唔準打交啊⋯」

「唔會唔會。」
我拍一拍秋儀個背隻。

「我地依D做開生意既，不嬲都有自己一套做法，唔會咁容易受其他人影響。」
四眼妹好有自信咁講。

「乜嘢做法？」
聽佢講到好似好巴閉咁。

四眼妹托一托副眼鏡，然後話。
「我地行商既，係唔會有永遠既敵人，亦都無永遠既朋友，只有永恆不變既利益。」

奸商原來就係咁樣形成的⋯⋯

我望一望四眼妹身後既女仔，其中一個手上吊住幾隻被綁住既老鼠仔。

唉，環境真係會令人改變，以前係香港，係城市生活，D女仔見到老鼠就掉頭跑嗌救命，依家見到就如執到寶咁。

四眼妹見到我目光放係D老鼠仔上。
「大隻個D老鼠就捉唔到，跑得實在太快，所以唯有捉D細老鼠仔食囉。」

D老鼠仔並無死去，一直發出嘰嘰既聲音，叫得非常響亮。望住D老鼠仔既掙扎，我突然想起需要用到。

「喂！四眼妹！有好嘢益下你！俾三隻老鼠仔我，我捉到獵物分三分一俾你，點睇？」
佢地聽到我講後，即刻圍埋一齊討論十幾秒。

「好！殺你！」
四眼妹從後面個女仔手上抽出三隻老鼠仔出黎。

我接過D老鼠仔，然後交俾秋儀攞住，秋儀睇黎幾驚老鼠，佢隻手不停咁震。我拍一拍秋儀個膊頭。
「唔好整唔見啊，等陣打獵好有用㗎。」

「嗯！」
秋儀用力抓住綁老鼠仔既繩。

「大陸仔！你講㗎！記得分三分一獵物俾我地啊！我信曬你既啦！」

「知啦！」
講完便同四眼妹揮手再見。


待續