荒島日記（新手、後宮甜）（不定期更新）: 攞彩

四眼妹好興奮咁攞走我手上既兩隻兔仔，洞裡面既三女將舊棉被攞出黎，我攞起個棉被。

嘩！張棉被都幾重手，唔錯唔錯。

「下次有嘢想換再黎搵我啊！無任歡迎！」
四眼妹同另外三個女仔係山洞口開心揮手送別我。

我攞住個鐵桶同棉被走返去河對面，辣椒妹坐左係山洞口發呆，而雪兒同秋儀疊起D乾柴，準備整今晚既晚餐。

「學東哥，你返黎啦！」


秋儀好興奮咁走過黎幫我攞個鐵桶，雪兒繼續疊起D柴，辣椒妹見我攞住嘢，都好興奮咁走過黎。

「大陸仔！你個桶裝左D咩食物啊？蟹定係魚啊？」
辣椒妹走過黎望到個桶乜都無，即刻係度唉聲嘆氣。

「大陸仔，依個桶唔會用黎做屎桶啊嘛？」
辣椒妹扮坐係個桶上面。

「個桶好有用㗎！」
我攞走個桶擺係一邊。



我攞較長既乾草，將乾草一舊舊咁紮住，令個乾草床變得結實D，然後打開啱啱換返黎既被袋，抽出棉被出黎，鋪係個乾草床上面。

原來張棉被勁大張，如果整成六個人訓既大草床都唔係問題。

「正啊！終於有床訓啦！」
辣椒妹大字型咁訓係張床度。

「除左食就係訓。」



「咁我幫雪兒手囉。」
辣椒妹跳落床跑去雪兒旁邊。

依家整好左張咁舒服既床，聽日要好好地去打獵先得。

「雪兒！雪兒！」
有幾個人走到我地既山洞門口，我認得出把聲，係肥豬劉個班人。

「雪兒！我帶左晚餐黎俾你食啊！」
肥豬劉好興奮咁走過黎，而佢個四個女伴係後面跟住。

「師兄⋯」
雪兒唔知講D咩好。

「我聽講大陸仔捉唔到D咩獵物，只係捉左幾隻雞仔，驚會餓親你！所以煮好左晚餐之後就攞黎俾你囉，嗱！好好味㗎！試下！」


肥豬劉伸出隻手，手上握住得半隻手掌大既兔腿，而且燒到燶曬。

雞仔依單嘢肯定係河邊個班女講既啦！如果唔係肥豬劉都唔會知我捉雞仔依件事。

「明明我地已經搬到河對面啦⋯點解仲係可以咁吵⋯」
辣椒妹講完便嘆左一口氣。

「咦！辣椒妹！你都食D啊！好好味㗎！隻兔仔我捉得好辛苦㗎，成個營地得我先有兔仔肉食！」
肥豬劉攞另外一隻較細既兔腿出黎。

「嘩！好大既兔仔腿wor！」
辣椒妹嘲笑咁講。

「多謝你啦師兄，我地自己有嘢食啊，兔仔肉你都係留返俾自己啦。」
雪兒走到辣椒妹面前，用手推返肥豬劉手上既兔仔腿。



「雪兒，其實人真係要識睇時勢！你跟大陸仔無用既wor！佢打獵咁屎，遲早會餓死老婆瘟臭屋，跟我就唔同啦，一日三餐唔會餓親！」
肥豬劉拍曬心口咁講。

「生哥對你咁撚好！你就應該接受！咪撚係度吊高黎賣！」
其中一個肥豬劉個女伴走出黎指住雪兒講。

依個女伴有D其貌不揚，但一身肌肉發達，一睇就知係運動健將，肥豬劉搵佢做女伴，應該係貪佢做到嘢。
（真重口⋯）

「你小心D講嘢！快D走返去營地個邊，唔好成日走黎我山洞口叫囂！」
我走到雪兒面前，雪兒可能俾個其貌不揚嚇到，抓住我隻手係度震。