[真人真事][校園][純愛]《總有一天，會再次遇見》: 第八十四章

送完晞澄上飛機

咁我都搭返巴士返屋企啦

反正都冇乜野可以去睇下,

索性返屋企打機算

一路坐緊巴士返屋企嗰陣,





我就一路喺度諗,

今次終於得米喇哈哈

唔好笑我傻仔呀

我就唔信你地未試過喺度f ,

知道自己就嚟有女朋友嗰個感覺,





仲要嗰個女仔係自己好鍾意

傻笑就少不免

因為已經諗到好長遠

第時點點點,

咁又點會冇傻笑呢





好彩一早揀咗喺最後嗰度坐

所以成程車先至冇人發現

一陣返屋企順便同呀邦講先

你知啦,

中學毒男遇到一啲情情塔塔嘅野,

多數都係搵自己老死架啦

講真真係唔係想曬命

之不過你當我對自己冇乜信心啦





想聽多啲意見,

反正佢條友成日都話我同晞澄有路

今次啱晒喇

返到屋企就同佢打機啦

跟住就同佢講上述嘅野,

呀邦:「話咗你同佢有路啦

仲喺度唔認 」





我:「咁樣以前咁多人喺度

你知我呢條蛋散咁q毒

點樣認 」

呀邦:「陰公

個個都知Charlotte鍾意你

係得你唔知 」

我:「有幾出面呀 」

呀邦:「淨係聽你頭先同我講嗰啲野,





就已經知啦

你估真係得閒得滯

成日整野俾你食咩

又唔見佢益我

仲要成日同你一齊 」

我:「咁我以前真係唔知丫嘛 」

呀邦:「咪話你豬兜囉 」





我:「你覺得我應該點同佢講好 」

呀邦:「講乜春 」

我:「拍拖囉 」

呀邦:「我肯定你亂咁噏,

佢都會受

信唔信先 」

我:「我信你就唔駛問你應該點樣講啦

有咩好方法 」

呀邦:「我真係唔知喎,

我真心覺得你唔使點樣度對白

就咁同佢講你鍾意佢就可以

佢一定受 」

我:「真唔真呀頂你 」

呀邦:「我就覺得係咁喇

信唔信就隨便你

打機啦 」

我:「你啱 」

其實夜晚嗰陣我喺度諗

有時有啲野真係好奇怪

明明我之前仲話唔鍾意拍拖,

覺得好煩

冇晒自由

不過依家自己竟然會因為呢樣野而覺得開心

所以我真係成日講,

唔同時期睇嘅野,

真係會有唔同嘅睇法

當然你可以話我信念唔夠堅持啦

我都絕對唔會否認

或者我以前唔鍾意拍拖

只係因為對象問題

原來只要出現咗一個你好鍾意嘅女仔,

你就會好想成為佢嘅男朋友

一路喺側邊對佢好

又或者唔使咁複雜,

淨係望住佢個樣甚至只係一個側面

都已經夠

唔好以為一個側面有咩咁特別,

知唔知有幾多人好想同佢拍住行

拍住行嘅意思即係代表唔使再喺後面追住佢,

大家步伐終於一致

特別係我呢啲毒男

要追一個女仔真係好辛苦

最起碼要不斷遷就佢嘅節奏,

講到咁辛苦又點解會繼續去追

係因為追到之後,

佢帶俾你嘅嗰個滿足感,

呢樣就係動力

我依家都未試過,

所以真係唔識好詳細咁去形容

我嗰陣淨係知道自己好期待佢返嚟嘅一日

今次冇再講大話

真係好期待.