[真人真事][校園][純愛]《總有一天，會再次遇見》: 第七十七章

踢完波咁就繼續正常咁樣上堂呀溫書呀

一路都冇乜大變化,

聖誕就好似上年所講啦

晞澄約咗我地成班去銅鑼灣亂咁行

你知佢約我鍾意早一年約





自然冇得抵甩啦

話當係感受氣氛喎

喺佢講我先肯聽

第二個講叫佢瞓覺啦

基本上都冇乜特別所以唔多講,





驚你地悶,

事關已經講咗兩年聖誕

除夕亦都係

去到2009年,

即係話會考得返三個月就A Level





正常我地應該搏命溫書

不過晞澄有一日同我講咗啲特別野

嗰陣我抄緊佢份功課

晞澄:「喂平時你夜晚得唔得閒 」

我:「無啦啦做乜咁講 」

晞澄:「你答咗先啦 」

我:「你講咗先啦 」

跟住佢一手收咗自己嗰份功課





我:「差一題呀

唔好玩啦 」

晞澄:「咁你答咗我先啦 」

我:「得閒呀得閒呀得閒呀

唔該你丫靚女等住救命呀

俾返我丫 」

晞澄:「係你話得閒呀





夜晚陪我去跑步 」

我:「無啦啦跑乜春步

你想減肥 」

晞澄:「唔係呀

諗住喺度讀咗七年都冇玩過運動會,

所以今年想玩下

諗住報千五米 」

我:「咁要我陪你做咩呢





冇關係啵 」

晞澄:「唔通真係就咁去跑咩 」

我:「赤裸上陣有咩問題

你都係玩下啫 」

晞澄:「死人頭又喺度講埋啲咁嘅野

滿腦子都係呢啲思想 」

我:「唔係呀我意思係唔練就咁去跑呀





唔係真係赤裸呀頂你 」

晞澄:「我驚唔夠氣啫哈哈

你知啦夜晚咁危險

一個女仔去跑我驚丫嘛 」

我:「但我跑步唔叻喎

我又冇諗住玩運動會 」

晞澄:「陪我一齊跑咪得 」

我:「你搵呀穎啦 」

晞澄:「佢得就唔使搵你啦

佢同佢男朋友跑呀

我費事阻住佢兩個

跑唔跑呀 」

我:「你拎起左份功課問我

我有得話唔好咩 」

晞澄:「你真係叻仔 」

就係咁,

嗰幾個禮拜我就同咗佢去跑步

因為附近有個小型運動場會開放

有時唔使溫書嗰兩日,

即係星期二同埋四,

同埋嗰陣係冬天

天氣好舒服

況且我地都係慢慢跑啫,

節奏唔急

所以都唔算好辛苦.

咁樣喺運動會嗰日

佢係喺上半晝跑

我都費事落去啦坐喺看台嗰度睇

其實佢真係唔算好慢

起碼我同佢平時跑嗰陣,

佢都唔係話喺後面食塵嗰啲

當然我都唔快啦

不過照我所睇佢應該好過一般女仔嘅

跟住就睇佢跑啦

千五米賽事佢一早就擺喺第三位,

聽聞放頭嗰個係長跑好叻嘅男人婆

所以晞澄跑之前都同我講冇諗住贏

其實我覺得佢係吹水

不過佢咁講咪咁聽囉

結果全程就係咁樣返嚟,

最後佢拎第三

有塊銅牌

我喺學校咁多年都未試過有獎牌

佢玩一次就有

跑完之後佢上返嚟,

晞澄:「咁都有第三喎 」

我:「係咪造馬架

都冇人追嘅 」

晞澄:「人地追唔到唔得嘅咩

一定係造馬架 」

我:「咁都你符符碌碌拎到塊牌

我喺學校咁多年都未試過有牌 」

晞澄:「咁係你水皮啫

不如影返張相先啦 」

我:「哦 」

我好慶幸當時有影到呢張相

我好相信一樣野,

就係相片嘅衝擊力

有時有啲細節可能真係唔記得咗,

始終邊有可能完全記得晒咁多野,

但係只要一望到張相,

就會將當時嘅畫面,心情,

喺夜晚瞇埋眼嗰陣,

再細味多一次.