[真人真事][校園][純愛]《總有一天，會再次遇見》: 第六十二章

之後初賽嗰一日,

由於我地班都好多人參加

所以嗰朝小息甚至係食晏,

大把人喺度亂咁叫

佢地話想開聲喎





有啲就仲誇張,

帶埋嗰啲乜鬼野川貝枇杷露,鹹柑桔呀

話咁樣把聲會靚啲

我心諗over咗喇

當然我冇咁講啦,





得啖笑就算

晞澄就冇做以上嗰啲野

如果唔係真係笑到面都黃

因為我地喺放學後先唱,

所以有足夠時間俾佢地去預備





最尾嗰堂就嚟完嗰陣,

晞澄無啦啦話好緊張

晞澄:「原來真係會緊張架喎 」

我:「頂你啦歌后

你都緊張其他人點算

唔使扮晒野喎 」

晞澄:「講真呀 」

我:「咁呀,





我都幫你唔到喎 」

晞澄:「我知喇 」

我:「無啦啦知乜野 」

晞澄:「你陣間記住坐一個出啲嘅位 」

我:「點解咁講 」

晞澄:「一路唱嗰陣望住你個死人樣

我諗應該會冇咁緊張 」





我:「到時我實做鬼臉引你笑 」

晞澄:「傻嘅咁易引到 」

我:「又睇下點 」

晞澄:「一個菠蘿油 」

我:「你想點玩先 」

晞澄:「我笑就我請你食

我冇笑就你請返我

制唔制 」





我:「怕你有牙 」

晞澄:「你咁講就得 」

之後落到去禮堂

咁我就特登坐前排啦

原本我呢啲毒男就諗住坐後面嘅,

不過既然頭先佢咁講就坐前面啦,

其實有啲同學都唱得幾好聽





男女都係,

當然唔少得玩野嗰啲啦

幾條傻仔上去喺度唱唔知乜野歌

又幾鬼好笑嘅

等咗陣跟住終於到晞澄,

有時靚女個待遇真係著數啲

晞澄一上到去唱就大把人歡呼

頭先幾個靚女都係,

嗰啲歡呼聲特別大聲

冇計啦同人唔同命

之後原來佢唱小星星(楊千樺嗰隻),

扮晒野又話唔講

挑

咪又係楊千樺

佢一上到去我就見到佢望住我

老實講其實佢都算幾定,

起碼個身企身

冇好似棵樹咁樣郁嚟郁去

隻腳都應該冇震,

一路唱佢就一路望住我

我等緊副歌就開始引佢笑

副歌先緊要丫嘛

之後一去到「誰也好即使愛侶都 沒有必要待我好」嗰度,

我就開始好低能咁樣做鬼臉

好彩隔離掛住聽歌冇人知啫

見佢個樣係咁忍,

有幾下特登冇望到

跟住佢一望返嚟又即刻引佢笑

頂佢真係全程忍足咁濟

之後我就出絕招

話說我嗰陣就食緊吹波膠,

跟住我就冒住俾人捉嘅風險

就喺度吹波啦,

講真嗰個吹波膠真係好勁

我吹到好大個波

如果有食過吹波膠都知啦,

有時吹得太大個波就會爆

我就係呢啲傻仔喇

吹嗰陣掛住大冇留意就嚟爆,

結果去到盡頭嗰陣,

成個波爆咗落我塊面度

嗰陣梗係講晒粗口啦

成面都係吹波膠咁濟

呢個時候我見到晞澄都忍唔住,

原本仲忍到笑,

佢一見到我失誤嗰陣都短暫o晒嘴

跟住就笑

不過就冇影響佢唱歌,

佢係等嗰啲冇歌詞嘅位先至笑

呢個時候我就好論盡啦

佢一唱完之後我就去廁所整

過咗陣之後就完咗初賽喇,

咁我就等埋佢出嚟搵佢一齊走啦

佢一出嚟見到我就係咁笑,

晞澄:「你真係好低能呀 」

我:「痴線

好彩冇人見到 」

晞澄:「知唔知我忍得幾辛苦 」

我:「係喎你有笑喎 」

晞澄:「係咩 」

我:「仲扮野

菠蘿油呀 」

晞澄:「你咁低能

吹波膠都玩

抵我請你啦 」

我:「係喎你入唔入到決賽 」

晞澄:「要聽日先知呀 」

我:「實得啦頭先咁好聽 」

晞澄:「其實我唔記得點樣唱

淨係記得你條友玩吹波膠失敗咗 」

我:「唔用絕招點樣氹你請我食菠蘿油 」

晞澄:「你贏咗囉 」

我:「梗係啦 」

好彩佢都冇食言,

跟住兩個人就喺黃昏底下,

一路食住菠蘿油一路返屋企

嗰陣一臉輕鬆嘅我,

又點會估到之後發生嘅事,

令到我同晞澄個關係暫時進入冰封階段丫.