[真人真事][校園][純愛]《總有一天，會再次遇見》: 第五十三章

放完榜之後,

暑假得返一個月

我都係好似一般學生咁樣過

冇乜特別,

況且之前溫咗咁鬼耐書,





依家抖下都好正常

當係俾自己一個藉口去偷懶

唔知大家仲記唔記得,

我同晞澄都係八月生日

上年佢就整咗生日蛋糕我地一齊食





今年都係一樣

佢一早講定喺我正日嗰日,

會拎個蛋糕出嚟食

有得食梗係正啦

點會抗拒呢





晞澄:「好唔好食呀 」

我:「你整得唔通話唔好食咩 」

晞澄:「講真呀衰人 」

我:「其實真係幾好食嘅

不如你第日去做甜品師

我第一個幫襯

當然我要有折頭啦 」

晞澄:「我冇諗到咁長遠呀





我成日覺得理想同埋工作唔一定要掛鉤 」

我:「點解 」

晞澄:「我知好多人都話,

讀書,做野梗係要根據自己興趣啦

不過我又咁睇,

我唔想第日因為工作又或者讀書嘅關係,

令到自己會厭倦自己嘅興趣





好簡單例如整蛋糕咁樣

講真我真係好鍾意整,

不過去到有一日我要靠呢樣野搵食嗰陣,

我自不然要係咁整蛋糕嚟賣去賺錢,

我好驚到時自己會嫌棄自己嘅興趣

去到有一日會唔想整,

你估鍾意真係唔會變咩 」

我:「聽落好似好大道理





我都明白理想同埋工作唔一定要有關係 」

晞澄:「以前細細個會覺得

做野讀書好簡單啫,

鍾意乜咪係去做乜

大個先發現其實唔係咁.」

我:「最慘身邊好多人都會叫你做自己鍾意做嘅野

又或者讀你想讀嘅野





有時都唔知點樣解釋,

淨係哈哈就算 」

晞澄:「係呀係呀 」

我:「講返第二樣先,

不如你得閒就整啦

講真真係可以當飯食 」

晞澄:「當飯食飽死你呀 」

我:「飽死好過餓死

最緊要唔使錢 」

晞澄:「死啦你搵我笨 」

我:「講笑啫

你要收錢的話我會俾你

咪當出去買蛋糕囉

最緊要值咪得,

益你好過益出面啲人 」

晞澄:「傻嘅

係咁嘅話我要收好貴喎 」

我:「頂你唔好咁賤啦

收咁貴嚇怕我以後唔食 」

晞澄:「講笑咋

呢啲邊度有收返人地錢,

你想諗好啲嘅咪當我冇野做

求其整個蛋糕出嚟冇人食,

你好心啲幫我食咗佢唔好嘥野囉 」

我:「係呀就係咁喇 」

晞澄:「傻仔

食飽就返屋企啦 」

我:「好.」

之後我地兩條友一齊食蛋糕,

食完就返屋企喇.

跟住都冇乜特別野發生

既然係咁就唔講咁多喇

去到九月正式去到中六,

有幾個同學今年已經唔喺度

老實講對我而言冇乜影響

一嚟同佢地唔算真係好好朋友,

你話係玩開嗰班咁就可能有啲唔習慣

同埋考完會考去到中六,

都唔可以太過鬆懈

因為好快就A Level

邊有咁多閒情逸致

去理其他唔關我事嘅野呢

去到中六我都諗住未必會同晞澄一齊坐

其實原本仲擔心緊老師會唔會調位

講真嗰句嗰陣我都係鍾意緊晞澄嘅

有邊個男仔會唔想同自己鍾意嘅女仔一齊坐丫

唔講呢樣,

淨係講我同佢依家都算係傾得埋嘅朋友

坐佢隔離起碼有野講先,

又唔需要擔心抄功課呢個問題

好處真係好多

結果老師真係有調位

不過我隔離都仲係晞澄

我:「又係你 」

晞澄:「依家同我坐好失禮你咩 」

我:「唔係,

不過以為我會轉啫 」

晞澄:「你就想賣甩我

你咁抵死如果唔坐你隔離點樣玩 」

我:「嚟緊呢年同之前一樣,

功課靠你喇 」

晞澄:「睇下點先啦 」

就係咁,

我同佢又再做一次鄰座同學喇

其實梗係開心啦

毒男從來都係鍾意口不對心架啦,

因為唔鍾意俾人睇穿佢地赤裸裸嘅情感,

所以就要極力去掩飾

成日扮到若無其事,唔耐煩咁樣,

其實只係一個包裝.