[真人真事][校園][純愛]《總有一天，會再次遇見》: 第五十章

跟住都係考試啫

我就唔講太多喇

反正都冇乜特別

講少少嘅係考完最後嗰科之後

真係成個人鬆晒





有時都唔知自己呢幾個月係點樣過

當然依家回望返轉頭,

會考其實唔係啲乜野大件事

不過嗰陣就好緊張

點緊張都好啦依家終於完





終於可以一覺瞓天光

而唔係晚晚喺張床度準備入睡嗰陣,

都仲係咁記住考試嗰啲野

成日都講冇野煩係最爽

咁大家都知啦,





考完試等放榜,

中間都隔咗成個幾月

一般學生都會出去搵part time做

雖然嗰陣學生做part time個風氣冇依家咁犀利,

不過身邊都仲有唔少同學有做

原本我就想做嘅

不過搵嚟搵去都唔啱心水,

同埋老實講屋企又唔係等我開飯





有得懶就梗係懶多陣啦

我好相信日後一定冇得懶散

到時唔想返工都冇得你話事

大佬真係手停口停,

趁依家仲有呢個權利,

梗係用到盡啦

事實亦證明係,





依家返唔返工邊輪到你話事

一家三口又要供樓

雖然我老婆都有做野啫

不過你知養一個細路仔幾多野要兼顧架啦

特別依家呢個年代啲細路仔邊似我地以前咁輕鬆

幼稚園都爭餐死

又興趣班呢樣嗰樣,

我都好驚自己會變怪獸家長





衰啲講句自己唔食邊有所謂

但係老婆仔女冇得食就係我責任,

有時做男人係咁架喇

唔好意思各位我喺度講多咗添,

不過自己都係鍾意以前讀書時代

想忙裏偷閒就忙裏偷閒,

節奏真係好舒服





講講下我都唔記得講重點

我嗰陣就冇返part time(定係叫暑期工)啫

不過晞澄就有

當時佢返書店

佢話自己有時想蛇王嗰陣,

都可以免費睇書喎

你話啲人幾鍾意貪小便宜

當然我都唔否認我都會咁做

佢話有時好悶,

叫我上去同佢傾計都冇問題

不過你知我啦真係冇乜動力

所以我都係冇聽佢講

淨係喺屋企算

點知有一日佢真係搵我

嗰陣應該喺七月尾八月頭左右,

就嚟放榜嗰期

佢無啦啦打俾我

晞澄:「你今晚出嚟呀

有野要你幫手 」

我:「又做乜 」

晞澄:「呢度有個男仔囉,

成日都話想約我今晚食飯

但你知啦我對佢冇feel 」

我:「唔係呀我唔知呀 」

晞澄:「咪站亂歌柄啦

跟住我咪話今晚約咗人囉

點知佢唔信

所以今晚就要麻煩你出一出嚟喇

唔該丫 」

我:「你真係抵死

嗰個咩男仔嚟

mk仔

係嘅話我唔夠打喎 」

晞澄:「咁又唔係,

你當係正正常常斯斯文文嘅一個四眼男仔咁啦 」

我:「正正常常斯斯文文嘅話你可以諗下喎 」

晞澄:「唔鍾意就係唔鍾意架啦

今晚幫手啦 」

我:「你真係麻鬼煩

自己講大話拖埋我落水 」

晞澄:「我都唔想

佢已經唔止一次咁樣

次次我都拒絕

不過佢話今晚佢生日可唔可以陪佢喎 」

我:「下,

佢生日關你咩事 」

晞澄:「咪係囉所以我都話唔去 」

我:「唉得喇得喇得喇

你間書店喺邊度架 」

晞澄:「到時同你講啦,

我知你肯嘅哈哈

咁今晚見啦拜拜 」

都唔知晞澄佢咪真係咁受歡迎

成日都有男仔行過去搵佢

我喺身邊嘅都有幾次

當然我都承認佢真係幾有吸引力嘅,

起碼吸引到我先

咁就已經夠啦.