[真人真事][校園][純愛]《總有一天，會再次遇見》: 第四十六章

返到幾個禮拜之後,

就去到中五最後一日嘅上課日

返埋今日之後,

所有中五學生就唔使再返學

當然啦你可以返去溫書嘅





因為佢都會開放圖書館俾中五學生返去,

但講緊係正式返學嘅話呢,

今日就係最後一日

有啲人可能今日之後,

就唔會再可以返嚟學校好似平時咁正式上堂





點解

因為萬一考得唔好,

學校就唔容許你原校升讀中六

加上你知架啦

最後一日嘅上課日,





老師梗係會喺度講埋嗰啲加油呀俾心機呀架啦

班主任都特別提到原校升讀中六呢一個問題

有啲同學知道自己成績去到邊個位,

佢都冇乜期望可以再見到我地呢班人

有啲就話考完會考多數會出去外國讀書

甚至都有幾個人講,

考完會考就會出嚟做野搵錢

其實幾個禮拜之前,





我地全班人都知有邊啲人下年一定唔會喺度

我見到班主任都有特別同幾個下年確定唔會喺度嘅同學傾計

傾下前程好將來又好乜都好

都見到有對情侶喺度係咁喊

因為將會分隔異地

幾個月之後唔可以再著同一套校服返學

今日係最後一次,





我心諗使唔使咁呀

又唔係冇得見

最多都係冇咁方便啫

我:「佢兩個咁激動

又唔係冇得見 」

晞澄:「今日係佢地最後一次一齊上堂丫嘛

下個學年xx (嗰對情侶個男仔)就唔會再喺度 」

我:「都唔使喊到咁下話 」





晞澄:「你識乜野呀 」

我:「或者我真係唔識啦 」

各位巴打絲打真係唔好咁大聲鬧我

因為我嗰陣真係唔知係咩一回事

我:「係喎你會唔會去外國讀書 」

晞澄:「你好想我走咩 」

講真嗰句我梗係唔想啦





但如果我咁快講唔想,

以佢咁敏銳嘅觸覺,

或者佢會知道我係點樣諗

我:「又唔係話想唔想嘅

不過我見你好有感觸咁樣 」

晞澄:「有感觸唔代表下年我會走嘅

我可以講定唔會出去讀書都得

因為已經一早同屋企人傾過唔會出外國讀書,

邊有咁富貴

同埋我都唔會慣喺外國啦哈哈 」

我:「哦

仲以為你會跟風去外國讀書添 」

晞澄:「你咁樣講得仲唔係想我走

你真係太天真喇

我係唔會改變主意架哈哈 」

我:「可能係我走呢 」

晞澄:「你講真架 」

跟住特登伸埋去喺佢耳仔邊講:「假架.」

晞澄:「死人xx賢你真係好乞人憎

好講唔講講呢啲

好好笑咩 」

我:「都幾架

不過講真我都唔會去外國讀架喇

邊度識英文

咁下年啲功課要繼續靠你喇 」

晞澄:「你咁講就得喇 」

女人情緒真係好奇怪

一時好緊張一時又喜上眉梢.

跟住嗰日,

臨放學之前晞澄好似上年學期尾咁樣

叫我落去同佢影相

原本我以為會返去上年嗰個地方,

點知原來唔係

我:「又落去操場 」

晞澄:「上年影咗今年梗係轉地方啦叻仔 」

我:「咁樣去邊度呀 」

晞澄:「去到你咪知 」

點知原來係圖書館入面

晞澄:「今年我地成日喺度

當然喺呢個位影相 」

我:「邊個揸機 」

晞澄:「求其搵個人啦 」

之後我地就喺圖書館影咗幾張相

肩碰肩又搭膊頭都有

我:「今晚記住send返俾我呀 」

晞澄:「得啦 」

之後我地就正式離開學校

夜晚返到去晞澄又撩我玩旋轉泡泡球,

好彩佢話我贏定輸都俾相啫

如果唔係真係嘥氣

因為真係好難贏到佢

佢條友真係好鬼勁

去到呢一刻我都係冇一次贏過

晞澄:「又話秘密特訓嘅 」

我:「大佬點夠你玩呀

你條友肯定成日同人玩

唔係冇可能咁勁 」

晞澄:「冇喎,

加油啦細佬 」

講完一輪之後終於send相俾我

其實有時我都好佩服晞澄,

佢嘅心水幾清

揀嘅地方全部都係有諗過,

唔係亂咁嚟

好似今次咁樣,

起碼我日後得閒無野做想回味嗰陣

我都會記得喺會考嗰年,

原來係喺圖書館嗰度出晒力咁樣去備戰

而最重要嘅係,

就係我隔離,

有相入面嗰個女仔喺度

呢個的而且確係最有力嘅證據.