[真人真事][校園][純愛]《總有一天，會再次遇見》: 第三十八章

大家去過秋季旅行都應該知道

返到學校等一陣,

之後就上旅遊巴去燒烤場

一去到燒烤場,

就係咁多位男仔表演嘅時機啦





所謂表演,

其實即係幫女仔起爐

第一我就冇呢個表演慾

第二我亦都唔識

咁我就梗係行開啦





點知呢個時候竟然俾晞澄見到

晞澄:「一起爐你就走開

你真係識走位 」

我:「我都係成全佢地咋 」

晞澄:「即係點 」





我:「佢地咁鍾意喺你地女仔面前表現自己

我冇理由阻住佢地丫 」

晞澄:「講到好似特登幫佢咁樣

明明就係自己唔識 」

我:「唔係好似係真係幫緊佢地

食你就食啦 」

之後我地去返各自嗰個燒烤爐

老老實實我對燒野食麻麻地





第一,

對住個爐真係好熱

第二,

燒又燒得耐,食就食得快

完全唔過癮

第三,

其實我叉野食係好渣





所以我係絕少燒牛扒雞翼呢啲大熱食物

因為難叉,

我去到淨係燒龍蝦丸同埋腸仔嗰啲

講起都真係好羞恥

但係一場去到,

見到仲有咁多肉,

附近又冇人

就算我真係叉野食叉得慢呀,





都唔驚俾人見到丫

所以我就決定叉一塊牛扒

結果一如我預期咁樣諗,

叉得好論盡

同埋我唔想整污糟隻手

雖然我係帶著手套,

但成日都會凝住





如果用對手去整,

隻手一定會污糟同埋有味

正當我對住塊牛扒埋頭苦幹嗰陣

喺我後面突然聽到一把聲

呢把聲化咗灰都認得佢啦

我講得出嚟仲有邊個啫

晞澄:「等我幫你啦 」

我:「唔該晒喎 」

晞澄:「嗱

你只要揸住呢度呢,

咁樣就好易叉

唔好話我唔益你喇 」

我:「多謝大佬多謝大佬 」

佢又真係叉得幾穩陣

喺我燒緊嘅過程當中,

嗰塊排真係冇跌落嚟

識煮野食真係識煮野食

的而且確係呃唔到人

食完之後,

我諗住行過去叫佢幫我叉啲肉

點知佢又唔見咗

既然係咁咪唔食囉

之後再食咗幾粒丸

有人就撩我地打波

頂佢帶咗個排球出嚟

話玩閃避球

咁我就決定去咗玩喇

講真丫,

出到嚟梗係唔係志在食野啦

飽唔飽都唔係重點

玩咗一輪之後,

我就開始體力不繼

咁咪去返我個位度坐囉,

一去到就見到我個位有一兜食物

用紙碗裝住

隔離仲有一個紙杯

裏面有可樂

正當我諗緊係咪呀邦個死仔咁好死嗰陣,

我見到嗰個紙碗同埋紙杯上面寫咗啲字

「變態佬」

點解會有字

因為開頭嗰陣有人話驚撈亂,

所以就叫每個人寫自己個名喺紙杯紙碗嗰度

我自己就因為懶所以冇寫

返到嚟就見到有嗰三個字

我一望嗰啲字跡,

我就知係邊個寫

大佬話晒我都抄咗晞澄成年功課

點會唔認得佢啲字跡,

再加上係得佢一條蛋散會叫我做變態佬

不過佢燒野食又幾掂,

真係幾鬼好食

我都吹佢唔脹

食完之後我就諗住搵佢啦

鬼叫身邊冇晒人,

我又懶唔想去打波

結果行咗一輪終於見到佢,

我一行到去,

原本同佢一齊行嘅呀穎就行開咗

我心諗佢唔妥我

明明我都冇得罪佢

晞澄:「你嚟做咩呀 」

我:「你老友唔妥我咩

我一行埋嚟佢就走 」

晞澄:「你咁賤個個都唔鍾意你啦

同埋你有冇帶腦出街呀 」

我:「你講乜野呀 」

晞澄:「冇野喇

明就明唔明就算啦

都唔知點解你會諗到去呀穎唔妥你 」

我:「唔好講咁多啦

我特登行過嚟係想讚你

你燒啲野真係幾好食 」

晞澄:「邊個話我燒架

啱啱行開咗喎 」

我:「仲有邊個會叫我變態佬 」

晞澄:「大把人啦 」

我:「唔使唔認喇

已經認到你啲字跡 」

晞澄佢冇應我

亦都冇再否認,

只係嫣然一笑

當然啦,

當時嘅我係唔知點解佢會有呢個表情,

晞澄:「返去囉 」

我:「好 」