[真人真事][校園][純愛]《總有一天，會再次遇見》: 第八章

晞澄:「好啦我行呢邊
拜拜喇變態佬 」
我:「我係變態佬,
頭先我就一早搞左你啦 」
晞澄:「可能你睇我唔上眼啫 」
我:「咁又係呀豬頭骨 」
晞澄:「冇你咁好氣
真係拜拜喇 」
我:「拜拜 」
跟住我自己決定返屋企,




老實講丫,
其實我根本就冇野買,
嗰陣嘅我都唔知點解我要講大話
可能佢請左個包我食,
所以我就想回禮陪佢行掛
當然啦依家諗返起,
呢個理由真係好牽強
鬼叫嗰陣自己完全唔了解自己,
個人亦都未開竅
嗰刻開始我就對佢改觀左,




唔怪得佢咁受歡迎
同埋以我一個咁唔擅長對住女仔相處嘅人嚟講,
頭先我同佢一齊嗰陣竟然冇冷場
我都估唔到自己會咁
我以為自己一定會戇居居咁唔知講乜架嘛
同埋自己感覺上佢好似冇以前咁憎我,
老實講,
佢憎我就唔會同我一齊行啦
就唔會請我食野啦,
係咪先




究竟我做過啲乜野,
令佢對我改觀呢
唔通係借本書俾佢
你地可以插我點解咁豬兜
咁當然啦,
嗰陣就未鍾意佢嘅
雖然我係一個毒男,
但正如開頭所講,
嗰陣嘅我根本就唔鍾意拍拖
有晒理由俾自己,
所以唔會對一個女仔動情,
毒男唔一定係易動情,
至少我唔係啦下.

就係喺嗰日之後,




大家唔止對大家有改觀,
關係仲好左
唔再係不瞅不睬,
變成左大家有傾有講
當然啦,
其實都係你串下我,
我潤下你咁樣,
同一般中學雞冇分別
即係好似咁呀
晞澄:「今日咁早返嘅,
轉死性 」
我:「關你春事 」
晞澄:「食左火藥 」
我:「朝頭早無啦啦俾人窒唔係好爽咁解 」
晞澄:「有人唔爽喎 」




我:「係架 」
晞澄:「變態佬 」
我:「頂你啲話題轉得咁快 」
晞澄:「哈哈 」
其實我呢個人,
朝早就好遲鈍
你唔俾返幾個鐘我,
我個腦根本就未醒
成個人懵下懵下咁樣,
呢樣真係我嘅缺點
但係好奇怪嘅係,
每一次咁樣同佢傾完計之後,
唔知點解我就開始回復狀態
可能有人同我講左野,
順便幫一幫個腦熱身




咁就好好多,
其實以前真係覺得佢好煩
但係慢慢咁樣諗,
其實咁都唔差
起碼我唔會成個朝早都係遊魂,
當然啦,
我地嘅關係起左咁大變化,
坐喺我隔離嘅呀邦就覺得好出奇
因為以前真係冇野講,
但係依家竟然咁樣
佢條八卦友梗係問我啦,
我亦都如實咁答佢
因為唔覺得有乜野好隱瞞,
呀邦:「竟然發展得咁快 」
我:「係囉我都唔知 」




呀邦:「唔通你地 」
我:「我知你諗乜,
但係佢條蛋散對住嗰個都係咁架啦 」
呀邦:「咁又好似係喎,
可能係我諗多左
你邊度會咁筍 」
我:「頂你 」
講開又講,
晞澄真係好好野,
永遠見佢都係咁嘅樣
成日都好樂天,
好陽光嘅一個女仔,
每一日都係笑面迎人
永遠都好似冇煩惱咁樣,
但係唔知點解,
我覺得呢個只係佢一個面具,
應該咁講啦,
每個人都會有唔同嘅面具
我總係覺得真正嘅佢唔係表面咁樣,
點解我真係唔知,
可能真係單純嘅直覺
同埋我唔信有人日日都係咁開心,
佢開心得有啲唔真實.