[真人真事][校園][純愛]《總有一天，會再次遇見》: 第一章

大家好
我叫做呀賢
無論讀書定係依家出嚟做野都好,
啲人都係咁樣叫我架喇
今年都廿八歲,
小弟係九零年出世,
以前我地九十後成日俾人笑
估唔到第一批九十後即將踏入而立之年
時間真係有啲快,
係咪人到中年,




就會懷緬以前呢
當你有呢個心態嗰陣,
其實真係代表自己老,
呢啲呃唔到人嘅
可能平時唔敢同人講你有呢啲諗法,
但係去到一個人嗰陣,
自自然然會諗
原來都就嚟三十歲,
明明十八歲嗰陣好似唔係過左好耐
眨下眼真係十幾年,




唔知各位嘅三十歲又會點呢
係咪同預期一樣,
定還是有落差
抑話係比想像中更加好
個個有唔同
你問我嘅話,
我都覺得自己都算係咁
搵到兩餐不特止,
仲組織到一個家庭,
我已經好心滿意足啦




仲敢奢求其他野
啱啱講到我組織到一個家庭,
咁就不如喺度講多少少
我有一個老婆同埋一個女,
先講我老婆,
佢係我喺大學嗰陣識嘅
大家同一班,
跟住混混噩噩之下同佢同一組做project
就係咁開始認識,
我地之間冇乜好浪漫嘅愛情故事,
亦都唔轟烈,
係佢主動溝我架哈哈
當然佢去到依家都係唔認架啦
原本我就唔知點解佢會揀我
自己知自己咩事,




唔係有錢又唔係特別靚仔
後尾我問返佢,
原來佢話好鍾意我認真做野嗰個樣
就係咁就鍾意左,
你話愛情幾兒戲呢,
講開又講,
我老婆真係幾靚架
以前喺大學嗰陣都好多人溝
身邊好多人都話我好幸福,
有一個咁鍾意你而且又靚嘅老婆,
咁我都唔否認嘅
我老婆的確係好靚
又好專一(我估啦)
做人處事好好
但其實呢啲都唔係我接受佢嘅原因,




真正原因結尾會講架喇,
容許我賣一賣關子先
我地喺大前年結左婚,
前年就生左個女,
個女都兩歲幾
我地諗住一個夠喇,
再多嘅話驚養唔掂
養唔掂就不如唔好生啦,
費事害到下一代.

有一晚,
我地個女瞓左覺
大家湊過仔女嘅都明白,
仔女瞓左覺,
就係我地嘅私人時間啦




放心唔係講咸濕野
真係講緊兩公婆各自嘅私人時間
我老婆就喺度煲劇,
我就梗係打機
返左成日工,
放完工仲湊左個女一陣,
依家夜晚打下機唔係好過分啫
我唔肯定佢睇咩劇啦,
好似係我的少女時代
佢有叫過我陪佢睇,
我就梗係睬佢都傻
一嚟我就唔鍾意睇劇,
二嚟我知自己嘅死人性格
睇嗰陣一定會亂咁諗野,
而喺夜晚上到床準備瞓覺,




我老婆無啦啦問我
我老婆:「老公呀
其實你初戀係點架 」
我:「唔係呀話結左婚咁耐依家先問 」
我老婆:「咁我啱啱睇完戲丫嘛
咁咪想問下你囉,
冇野喎唔使咁敏感 」
我:「我初戀呀
我初戀咪你囉 」
我老婆:「會唔會係咁呀 」
我:「呃你有寶
要呃都以前呃啦
依家女都生埋 」
我老婆:「又係喎可 」
我:「得你咁識貨咋 」
我老婆:「多謝喎 」
我:「瞓覺啦,
聽日仲要起身返工 」
我老婆:「嗯 」
初戀,
大家總係會聯想青春同埋遺憾,
無疾而終,
但同時間亦都有可能係甜蜜回憶
睇下邊個好彩邊個唔好彩啦
至於我初戀
其實我都唔知係點,
如果你計拍過拖先算係初戀,
咁我真係冇呃我老婆
但如果你淨係講第一次鍾意人,
咁就一定係喺中學嗰陣,
呢單野我都好耐冇提過,
一直收埋喺心入面最深處嘅位置,
平時唔會刻意去諗
因為我驚半夜發開口夢,
唔覺意咁樣講出嚟,
但係啱啱咁樣俾我老婆問完,
唔知點解我控制唔到我嘅思想,
瞇埋眼嗰陣,
腦海入面出現左一堆片段
同埋一個人,
老土啲講句,
呢個人,
我諗我一世人都唔會唔記得.