[愛情甜故] 因為一次睇到佢打飛機,所以我地變咗做炮友: 番外4—娶了個好老婆回家

「芷諾你行得未呀？」我企喺門口等方芷諾，望向屋內嘅時候淨係見到芷諾行嚟行去

「得啦得啦！」芷諾講完之後拎住一袋兩袋咁行嚟我面前

今日係星期五，平日因為我同芷諾都要番工，所以彤彤就交咗比我爸媽照顧，我同芷諾都係啱啱先放工，本來諗住直接去爸媽屋企，但係芷諾又諾要番嚟拎嘢

「你買啲咩呀？」我接過佢手上嘅兩袋紙袋，望咗入面一眼

「哎呀你唔好理啦～」芷諾笑嘻嘻地講道



我地上到30樓，我爸嚟開門

「爸、媽，爺爺嫲嫲。」芷諾一嚟就乖乖咁叫人

「買咗咁多嘢嘅？」我爸望到我手上嘅袋，「唔番屋企放低先上嚟？」

「我同子朗買比你地食㗎～」芷諾一手搶過我手上嘅幾個紙袋

我聽到之後真係一頭霧水，我幾時有同佢一齊買？



「你地成日都買嘢上嚟呀…上次你買嗰啲都未食得晒啦！」我媽喺廚房行出嚟，望入啲紙袋入面

「唔緊要啦！補身呀！」芷諾笑了笑講道，然後將啲嘢拎咗入廚房

佢喺廚房行出嚟之後，行到我隔離坐低

「你又擺我上枱呀？」我細細聲咁喺芷諾耳邊講道，芷諾望向我笑了笑

突然有一陣急速嘅「噠噠噠」聲，我企起身望向走廊，我即刻行去走廊



「知道爸爸嚟啦係咪？」我抱起喺房間爬緊出嚟嘅彤彤，「係唔係？」

彤彤的確係我心肝寶貝嚟，每逢星期五我地都會接彤彤番屋企，星期日晚再將彤彤送番上嚟

「食得啦！」我聽到我媽喺廚房嗌度，我望向彤彤，「咁你去住媽媽度先啦～」

我將彤彤交比芷諾，芷諾抱住彤彤行去餐枱坐低，其實好多時佢都想幫手，不過我都會叫佢坐番低等食就得

「你媽一聽到你兩個話上嚟食，即刻買晒你地中意食嘅嘢番嚟煮。」我爸捧住兩碟餸出嚟

「前兩日子朗話掛住阿媽煮嘅嘢，所以咪上嚟食，佢話好耐都冇食啦！」芷諾笑着講道

「咁就啱啦！子朗，阿媽煮嘅全部都係你中意食嘅嘢！」我媽頓時眉開眼笑

「聽唔聽到呀？今晚唔食晒唔準走呀！」爺爺突然又摻和一下



「媽，你都煮咗好多喎…」我望住成枱都係餸有啲無奈，我望向芷諾，但芷諾已經拎起筷子食緊

方芷諾！你又擺我上枱！

「嚟呀，食菜。」我媽不停夾餸入我個碗入面，「食件雞呀，夠味㗎啦！」

我媽過一陣又夾樣餸比我，過一陣又夾多樣落我個碗度

「媽，唔好係咁夾比我啦，你都食呀…」我夾起一件雞脾入我媽個碗度

「雞脾留番比爺爺嫲嫲食啦！」我媽一臉唔好意思

「阿爺阿嫲食雞胸咪得囉，冇骨。」我見我媽想將隻雞脾夾出嚟，即刻就將筷子伸過去㩒住



我望向芷諾嘅時候，芷諾望住我偷笑

「笑咩呀？」我問芷諾，但芷諾又係笑而不語咁搖搖頭

食完飯之後，我媽同芷諾入咗廚房切生果，爺爺嫲嫲入咗房同彤彤挽，我坐喺梳化同我爸一齊睇電視

我爸望一望向廚房，我以為係唔係佢地出嚟，但又未

「仔呀…你真係娶咗個好老婆。」我爸突然講道，「芷諾令你改變咗好多。」

「係咩？」我微微一笑，「都係嘅…」

「一睇就知，嗰啲嘢點會係你話買？一睇就知係芷諾買㗎啦！」我爸語重心長咁講道，「佢好努力咁樣幫你拉近同呢個屋企嘅關係…」

我聽完我爸咁講之後，莫名其妙地有同感…以前我同屋企嘅關唔太好，同我爸媽嘅關係都好一般，但我同芷諾結咗婚之後，芷諾成日都會買嘢上去比佢地然後話係我買，好多時佢都會以我嘅名義買嘢比我爸媽



「我明㗎啦…」我望向我爸笑一笑，我爸拍一拍我博頭

食完生果之後，我同芷諾就帶埋彤彤番去樓下，我媽話已經幫彤彤沖咗涼，所以芷諾直接就抱彤彤番BB房瞓

「老公，我沖涼先啦…今日番工有啲攰…」芷諾喺睡房行出嚟，手上拎住衫褲

我一下子從梳化企起身，行到佢面前一下子將佢抱緊喺懷中

「做咩呀？」芷諾有啲愕然，但好快又微微一笑

「你好多時都係子朗子朗咁嗌我，好少直接叫我老公…」我望住芷諾笑了笑

「因為我中意叫係子朗多啲呀～」芷諾溫柔一笑，然後喺我臉頰上錫咗一啖，「我沖涼先啦！老公！」



佢特登喺講「老公」嗰兩個字時大聲咗，然後我同佢義望笑了笑，我就鬆咗手等佢去沖涼

我果然娶咗一個溫柔又懂事嘅老婆…




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link