[愛情甜故] 因為一次睇到佢打飛機,所以我地變咗做炮友: 160.S345.是由什麼時候開始...?

(人稱:方芷諾視覺)
我睇唔過眼，一手搶咗條毛巾，然後幫佢抹乾頭髮
抹咗一陣之後，我將毛巾拎咗入廁所並且用衣架掛起
我掂起腳尖，喺洗手盆上面個架度拎咗個風筒出去
「坐低，吹乾咗個頭先去瞓…」我蹲喺梳化隔離嗰個插座前，然後將風筒嘅插頭插入去
風筒吹出暖風，我行到佢身後幫佢吹頭
我輕輕用手撥佢嘅頭髮，佢攬住個抱枕微微低頭
大概佢已經好攰啦…
喺吹乾咗頭髮之後，我將風筒放埋一邊
「入房瞓啦～」我伸手輕輕拍佢，柔聲道


「嗯…」佢用力將自己成個人撐起嚟，然後拖住腳步行入房
我行喺佢後面，佢吃力咁爬上床，我幫佢掀開咗張被，等佢瞓低咗我幫佢蓋番好張被
「洗唔洗開冷氣或者開個風扇呀？」我問佢
「開風扇得啦…咳咳…」佢望一望放喺床尾嘅風扇
我行去床尾，然後開着咗個風扇
佢用嗰隻風扇，係冇扇葉嗰種，中間得一個大窿嗰一種
「你有咩就叫我啦～」我微微彎下腰同佢講
「嗯…」佢點點頭
「好好休息啦～」我行出去嘅時候熄咗房燈
我輕力閂上房門，我一個人坐喺梳化上面一人呆着


呢度一直都冇變過…所有嘅傢俱、擺位都一樣…同8年前相比，可以話係完全冇分別
我一直坐喺梳化上面睇手機，睇ig睇facebook
睇ig嗰陣，突然睇到一個以前中學女同學出嘅post
張相影住佢隻左手，左手嘅中指上戴住咗一隻鑽戒
佢同佢中學嘅男朋友終於拉埋天窗結婚
佢兩個喺中學嗰陣就已經係模範情侶嚟，好多人都睇好佢地最後會結婚
宜家佢兩個真係結婚啦…真好呀…
佢兩個一定一齊行咗好多路，互諒互讓先可以行到最後呢一步，決定要白頭到老
結婚…係我曾經都憧憬著嘅嘢嚟，應該話係每個女仔嘅憧憬
如果當初我同葉子朗一直堅持，冇分開過嘅話，可能我地都會踏上結婚呢條路


但可能，呢啲考驗會令我地更加堅決咁樣行落去
冇呢啲考驗，我亦唔會堅決咁番轉頭
到底係由幾時開始，我就逼自己放低呢個男仔？
係由我番嚟之後，發現佢同洛天恩偷偷做咗不可告人嘅事開始？
係由我同周樂恆為BB而結婚嗰一下開始？
定係由我決定咗要捨棄呢一個人同過去開始？
到底係由幾時開始…我決定要放低葉子朗…？
人會成長，經一事長一智，我同佢都成長咗…
因為失去咗佢太多次，我學會珍惜，知道佢對我嚟講有幾重要
因為佢被我推開咗太多次，佢學會咗離開，為自己留下最後一點面子同尊嚴
可能因為我同葉子朗一直分分合合，令為我地牽紅線嘅月老都覺得唔耐煩啦～
一世，時間好長，但係我宜家心入面，想一世都同葉子朗一齊
我合起雙眼，默默祈求…
今次我捉住咗葉子朗，就唔會再放開佢啦…
我已經知道，佢對我嚟講有幾重要，所以…我點都唔會再鬆手放佢走啦


「已經2點啦…」我望一望個時間，原來已經2點幾
我企起身，輕輕咁㩒低葉子朗睡房嘅門柄，推開睡房門
入咗去之後，我再輕輕閂埋房門，唔想嘈醒熟睡中嘅葉子朗
我行到佢身邊，喺床邊跪低，然後伸手放喺佢額頭上面
「似乎退咗少少燒啦…」我細聲咁講道，然後收番隻手
但似乎個風扇較得太大，個風好勁，吹住葉子朗好似唔太好
我行到去風扇面前，然後將個風扇較細咗，唔太大風，但又會覺得涼
我行番去葉子朗嘅身邊坐低，我唔係坐床邊，我係坐喺木地板上面，伏喺床邊
今日好攰唔知點解，我都開始有睡意啦…我就直接伏喺佢床邊合埋眼…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link