[愛情甜故] 因為一次睇到佢打飛機,所以我地變咗做炮友: 121.S306.再次（上）

「咁你同總裁點呀？」阿Wind一問，阿豆同阿Wing即刻一個驚訝樣望住佢
「你做咩問埋啲咁嘅嘢呀！」阿Wing細細聲咁講
「咪係囉！未尷尬過咩！」阿豆都即刻細聲講
「其實我地就冇嘢嘅～」周樂恆比我先開口
佢地三個頓時望過嚟
「真係㗎～已經冇事啦～」我都笑住咁講
「真係？」阿Wing問
「係呀～」我點頭
「我地係離咗婚，但係都仲係朋友嚟嘅～」周樂恆話，我都點點頭，「唔洗擔心喎，冇尷尬。」
之前嘅事，已經告一段落啦，我同周樂恆之間只剩下朋友嘅名份


食完早餐我地就番公司
我仍然都係坐喺周樂恆個office外面工作，我仍然係佢嘅秘書
我打問咗周樂恆有咩文件要做，佢比咗幾份我，叫我入番資料之類嘅嘢
好彩今日嘅工作量都唔係好大，好快就做完，工作都幾簡單
Hea下Hea下咁又到咗放工時間
但見周樂恆又未做完嘢，我唯有OT啦～
「睇嚟今日都係要OT㗎啦～」我喃喃自語
由6點半去到8點半，周樂恆行出嚟
「行得啦！」佢拍一拍我
「哦，好呀～」我點頭


「下次唔洗留到咁夜啦！」佢話，「聽日星期六，好好休息下啦！」
我並冇跟周樂恆架車走，因為我想自己再周圍行下
經過酒吧嗰陣，突然有人喺我後面拍我
我擰轉頭望，原來係葉子朗
「有冇興趣一齊飲杯嘢呀？」佢笑一笑
「嗯…」
唔知點解，我竟然好自然咁點頭
我同佢坐喺吧枱前飲嘢，傾下計
「原來你搵到工啦，喺呢頭。」我打開話題
「係呀，嗰度個老闆話請我，所以咪喺呢頭番工囉～」佢笑一笑


佢嘅笑容，仍然係好似當初一樣…咁好睇…
「咁咪好囉，又搵到嘢做啦～」我話，「呢半年，你過成點呀？」
我都係忍唔住問咗出口，關心佢呢半年嘅狀況
「都係咁啦…」佢苦笑起嚟，然後拎起酒杯，飲咗一啖，「有得番工咪番工囉…冇得番工咪Hea下，抖下。」
葉子朗拎起酒杯，手肘冇離開張枱，只係提起咗前臂
佢雙眼望住酒杯，但佢嘅雙眼卻好似失去咗光彩一樣…
佢一口氣飲晒成杯，然後添酒，然後再一口氣飲晒成杯，不斷重復呢一個步驟…
「日子過得…好慢…好慢…」佢塊面開始紅起嚟，然後佢瞄咗我一眼，「特別係冇你嘅日子…」
佢講完呢句，就繼續飲酒
「你知唔知道…我有幾掛住你…」佢拎起酒樽，酙酒落酒杯入面
我飲咗一杯，然後酙咗一杯
「你根本唔會知道…唔會明白嗰種感覺…有幾難受…哈！」佢冷笑一聲
「我又點會唔明白…」我喃喃自語，細細聲咁講咗一句，然後飲咗一啖
「方芷諾呀方芷諾…」佢叫住我個名，「對唔住呀…係我錯啦…」
「唔好再飲啦！」我㩒低佢拎住酒杯嘅手，因為佢塊面已經紅卜卜


我唔會唔知道佢幾時醉，點樣為之醉咗…因為我見過好多次…
「好啦，番屋企啦！」我企落地，頭都暈下暈下
我都唔係飲咗好少，至少都飲咗4至5杯
我拉佢走，我地上咗架的士，然後就搭車番去
我拉住佢落咗車，佢行嗰陣都擺下擺下…
送佢番屋企好似安全啲，陣間佢醉到喺街到灘低咗點算？
我未醉晒，畢竟酒量比佢好，我仲應付得到
我扶住佢行到番去佢屋企門口
「鎖匙…喺邊呀…？」我騰空一隻手搵佢嘅衫袋，搵到鎖匙
我打鐵閘同大門，扶住佢小心翼翼咁行入屋，然後閂上鐵閘同大門
我伸手摸到燈制，然後開咗燈
第一眼望到呢度，係愕然…因為呢度同7年前一樣，都係同樣嘅傢俱，同樣嘅擺位…
我扶住佢行到埋去佢房，然後幫佢除咗件西裝外套，解開咗條呔同頸喉鈕
然後去洗手間濕咗條面巾幫佢抹一抹塊面
我坐喺床邊，靜靜咁望住佢，不自覺咁伸手輕撫佢嘅臉頰



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link