【耐人尋味】

 

一 這是一個由金鐘去銅鑼灣的低俗故事。    
    
     有人話：「職場如戰場」。計我話搭「港鐵」嘅時候都係好 似上緊戰場一樣，職場起碼可以聯群結隊、組織勢力，有你嘅戰友，最重要嘅係你俾人「圍揪」完，日日都對住同一班同事，你實有機會報仇，而對於我地日日搭港 鐡嘅普通香港市民泥講，搭「港鐵」就絕對係一個真實嘅戰場，就好似online game入面嘅戰場咁，你可以選擇進攻又或者係防守，你可能同啲三唔識七嘅人組隊，又有可能自己一個玩單機，好多時你被敵人從後進攻之後，轉過身就可能已 經唔見人。喊出泥！每一次放工放學嘅時間喺金鐘站轉車仲大鍋過係羅湖過關⋯⋯
    
     那一天，我跟住一個又一個士兵首先喺金鐘站排隊嘅時候扎定個馬，如果唔係後面心急上戰場嘅士兵一推就會串燒甘，前面係男人都好啲，你「吉」到佢，最多 「Jip」下你，如果前面喺女人嘅話，佢分分鐘話你非禮。好喇！好似啲高官話叫我地等多一班車，其實現實係要等多六、七班先至上到車，車門一開嘅時候，所 有人就好似入左推銀機一樣，衝入車廂，基本上唔洗點行你就可以入左去，相當之被動，係閂門之前總有幾個人扮演住推銀機入面嘅鏟，衝入泥門口撞飛你，如果你 好彩企得唔近門口嘅話你最多同其它人面貼面，又或者背對背，三文治式嘅親近，其實我有時諗同阿爸阿媽都未有咁親近，但偏偏會同個陌生人咁親近，如果你唔好彩企喺門口仲驚，你望住佢地衝入泥過剎那好想條門快d閂，頂！點解條門仲未閂，我以為條門閂左，佢地就撞飛唔到我，點知條閂又突然開番，我眼前就見到個阿叔毫不猶豫地衝人泥，算啦！等佢講完「請勿靠近車門」都開車㗎啦。

     我心諗以前「地鐵」得廣東話同英文果時，你一定入唔到，但現實還現實，佢衝緊過泥果種無助就好似肚痛而喺港鐵站搵極都搵唔到廁所一樣，你又有無試過？當佢 衝左入泥既時候我只好「敵不動，我不動」，雖然我明知係人海之中其實只要企係到都唔會有機會仆到，但開車既時候我發覺車前進的動力好自然同我既身體構成左 反作用力，所以我決定化被動為主動，洗出一招「一柱擎天」，無錯即自己用單手頂住天花頂，化身成為一碌柱。Oh Shit！俾我前面個阿叔快我一步「一柱擎天」添，其實同阿叔面貼面已經係小問題我最多望第二度轉移我嘅視線，唉！今次真係中伏啦，前面個叔叔對到我正一 正係到曬海膽，佢d天然臭狐味確實俾左我一個視覺加嗅覺既極級享受，好啦我算啦，心諗仲有一半車程就到灣仔好快姐，就係依個時候，阿叔拎出佢部三叔聽電 話，佢好似用緊大聲公講野嘅語氣，「喂喂！就快到！……屌你！！！都話就快到囉！喂……喂！屌！數字台又收唔到！！！」原來個阿叔好好人提供埋4D嘅天王級享受俾我！
    




     好彩！終於埋站啦，原來依家先灣仔，仲好似搭左好耐添。當架車未停定之際，我已經見到有一隊士兵拉住佢地架坦克虎視眈眈咁想衝入泥，門一開，佢地真係衝入 泥，充滿戰鬥力既阿叔都俾佢地撞飛，見到佢幾經辛苦終於走到出去，但我因為我太專注落阿叔到，一轉眼已經發覺果堆坦克經已係我前面，雖然橫衝直撞既坦克車 左我兩下腳趾，但係我一見到果枝好長打橫而唔知係俾人坐定拎泥扶手嘅柱到有位就即刻沖左過去， 我一望對面嘅座位已經見到有一位戰士強行霸佔兩三個位再用佢地既坦克築起圍牆，然後操流利既普通話「這裡！快來！」，喺果一刻我見到呆左，原來同胞嘅戰鬥 力咁強。其實以上所有事都係發生係電光火石之間，車終於開，而我見到好多人都好失平衡咁，hi！原來有個西裝友一邊拎住佢部iPad㩒一邊成個背脊癡住條柱，搞到其它人無柱楂，之後我見有人抻隻手埋去，個西裝友先覺醒……

     哎！漫長嘅旅程，終於到銅鑼灣啦！我真係好掛住以前嘅「地鐵」呀！！！