【愛情甜故】我同條女敦倫的日子: 救星2

我咁大個仔第一次親眼見到啲咁血腥殘忍嘅畫面，親眼目擊真係驚嚇過睇戲好多倍，我知道呢個肯定係伯母。

「快...快啲走茹姐，我地快啲走。」

我知道情況不妙即刻叫茹姐快啲走，而我亦再次孭起阿欣，

呢個時候伯母就由樓梯上行左落黎，手上拎住一把沾滿鮮血嘅豬肉刀正逐漸步近我地。

當我孭住阿欣後我就同茹姐推開門口道門走左出去，



出到去後，周圍環境清靜、人煙稀少，吹過嘅只有陣陣寒風，令我呢個「西伯利亞人」都不禁地打左個冷震，

睇黎依家已經係深夜時份，不過呢一切都已經唔重要，依家最重要係不顧一切地跑，儘管我孭住阿欣跑得好慢、茹姐拐下拐下，但都要跑，

跑左20多米後我望一望後面，我見到伯母行住慢慢咁步左出門口，面無表情，成個殺人犯咁樣。

當我地繼續向前跑時，我就發現有部警車停左係前面馬路，警車燈閃過不停，然後就有幾位阿SIR落左車，睇黎警察終於趕到。

「阿SIR!阿SIR...救命!!」



見到警察如見到希望，我馬上以更快嘅速度飛撲到佢地嗰度，而幾位阿SIR聽到亦即刻向我地走近。

「發生咩事?係咪你地報警?」

「係...係啊!有人要殺我地...仲有...入面殺左人。」

我可能因為受驚過度所以連講野都講到口疾疾。

「冷靜啲慢慢講，佢係邊度?」



「佢就係...係門口追緊我地，快啲去拉左佢...佢...佢變態嫁!」

我頭後向望示意人就係後面，不過我一望之下竟發現唔見左伯母嘅蹤影，究竟佢去左邊?

「我地會入去調查，你兩個女仔傷得咁重，快啲上救護車先。」

我由兩個阿SIR護送下上左個救護車，而其餘幾個阿SIR就入左去調查，我估伯母好大機會應該都走唔甩，

然後車上嘅幾位救護員就將阿欣放上擔架，而我同茹姐就坐住係側邊默默守候，好快就開車將我地紛紛都送到醫院。
.
.
.
到達醫院後，茹姐就被帶到病房治療，而瞓係擔架上面嘅阿欣就被救護員好快咁推入急救室，只有我一個係冇乜事得輕傷，

最後我係出面等左唔知幾多個鐘之後，證實阿欣......終於渡過危險期已經醒返，但仲要繼續留院觀察，因為身子仲係好虛弱，



而茹姐就因為身上有多處傷勢都唔輕，所以都要留院觀察幾日。

正當我想入病房探阿欣嘅時候幾位阿SIR就帶左我去落口供，我將成個過程講晒俾佢地聽，不過對於靈異嘅事佢地應該都唔會信，

半個鐘後，佢地終於問完我，但我有樣野倒想都問問佢地。

「阿SIR我想問你地拉到個犯未?」

「我地已經調查過成棟樓同你個單位，只係發現有個保安倒臥左係地下周圍都係血，初步判斷係謀殺案，但並未緝獲到個兇手，我地會落order通緝佢，所以放心。」

伯母竟然仲未俾差佬抓到!? 咁咪即係呢場「遊戲」仲未玩完!? 屌你老味你叫我點放心得落。

「係咪冇野問?冇野問你可以走，我要問嘅野已經問完。」



然後我只好懷著唔放心嘅心情離開。

走左之後我經過茹姐間病房就決定入去探左佢先，我推開門，見到茹姐挨住張床睇書，頭髮散亂、臉孔好多瘀傷，已經冇左以前嗰種美豔。

「茹姐，仲有冇咁痛?」

我坐係佢隔離慰問佢。

「阿豪!好彩你冇事...好彩你冇事。」

茹姐一見到我就即刻攬住我條頸，佢...佢好似係第一次咁樣攬我。

「我冇事喎傻女，你唔洗咁擔心。」

「我真係好驚...好驚你有事，伯母真係好恐怖。」



睇黎茹姐都係受驚過度仲未平伏到情緒，咁又係嘅就算膽子大小小嘅人見到啲咁殘忍嘅畫面都嚇到有陰影啦，更何況只係一個平凡嘅女仔。

「我未死得住，依家安全嫁啦你唔會再擔驚受怕，我會係醫院陪住你，乖。」

「我依家係咪好樣衰?」

茹姐鬆開手望住我問我，佢突如其來嘅一問我都唔知點答好。

「唔...唔係啊，你仲係靚，只不過係變左短髮同埋啲瘀傷遮蓋左你個美貌姐，等你好好休養之後就會變返以前咁靚。」

對住茹姐我真係第一次用美麗謊言去讚佢，不過啱先佢受完咁大刺激我無謂再刺激到佢啦。

「仲有啊，記住你隻腳傷左嫁，唔好周圍行，有咩事叫我幫你啦。」



「阿豪，多謝你咁照顧我。」

「多乜野謝，我地好朋友黎嘛，我都唔會想見到你有事緊係會幫你。」

「我地係朋友?」

「係啊朋友，我唔會再俾你有事。」

「我地就只係朋友?」

「我地唔係朋友仲會係乜? 好啦傻女，你係度抖下先，我去個廁所後順便就去探下阿欣。」

「都啱，我地係朋友，友誼永固嘛~你快啲去探阿欣先啦。」

茹姐笑住咁講，但唔知點解我硬係覺得佢笑得好勉強，唔似發自內心。