[非甜] A0輕熟女求愛日記: Speed Dating

4月2日

        琴日話明要積極, 咁就即刻報左一間叫魔雪奇緣 Speed Dating 公司既晚餐活動黎參加, 咁岩又仲有一個女仔既位, 今晚去左喇, 所以要記錄番先。

       係一個12男12女既晚餐,係一間尖沙咀既餐廳度搞, 個主持同我地玩左D類似收買佬既無聊遊戲, 之後就到傾計環節, 同每個異性都有5分鐘既傾計時間, 其實係12個男人裡面, 都有7-8個係正常既, 女仔就咁睇都係全部都正常, 係有一個相對比較靚女既, 應該好多人會揀佢。

        但我岩傾既都係得3個, 於是我就剔左呢3個男仔, 如果對方都有剔番我, 間Speed Dating 公司就會比番對方contact我。

        第一個係一個男護士, 27歲, 有少少怕羞; 第二個係工程師, 32歲, 感覺好踏實; 第三個係Sales, 28歲, 好主動好多野講。





        完左個活動都有個男參加者問大家一唔一齊去飲下野, 我見第二日要番工就拒絕左, 靚女都拒絕左, 見有2個男仔都好失望 。

        番到屋企沖完涼就收到Speed Dating 公司既message, 咁岩我剔左呢3個都有剔番我, 我決定等下佢地會唔會主動text我, 雖然女仔主動都無咩問題, 但男仔主動好似開心啲。

        琴日都唔記得開Facebook, 今日開彈左一堆Facebook朋友既生日message, 細個既時候可能會好介意有幾多人同自己講生日快樂, 但大個左就覺得無咩所謂, 反正大家都係收到生日提示先同你講, 連兩年前只做野見過2-3面既graphic designer都有講。

       於是我逐一覆曬多謝之後, 就close左自己facebook既生日日期, 無提示都記得既先係真正既朋友。