愛是恆久忍耐: 第六十章

第六十章

因為屋企本身靠近火車站嘅關係，所以我最後都係決定搭火車出旺角。

出到去大概時間係下午1：30左右， 出入火車站嘅通常都係一家大細為主， 可能因為都要拜年嘅關係，暫時仲未見到太多情侶一雙一對咁出現。

火車站同呢間Cafe距離話遠唔遠話近唔近， 我最後決定都係坐的士去嗰邊。

為咗避免今日有機會太多人去Cafe嘅關係，所以我出門之前就打電話去Book位先。





唔知係呢間Cafe啱啱開門冇幾耐，定還是新年個個都要去拜年嘅關係。顧客除咗我之外，就只有一枱4個男仔約出嚟打機。而之前我同Ashley坐個張梳化就冇人選擇，所以我同侍應講咗要坐返同一個位。

宜家坐返喺呢個梳化嘅位置，就好似時間倒流返去我第一次同Ashley約會嘅情況。

佢當日有急事突然離開後，我同佢都冇再踏足過呢間Cafe。

所以今日我約返佢返呢間Cafe，就係諗住當作嗰一日約會嘅延續。

我行出去書架，再次拎返之前佢借嘅<<華麗咖喱食桌>>第1-10期返埋個位度。





宜家時間尚早，所以我決定一邊睇漫畫，一邊等佢一陣嚟到。

當我睇到漫畫第四期嘅時候電話響起。

「我可以走！!Cafe嗰邊多唔多人呀？」Ashley把聲聽落好似好開心。

「暫時人唔算太多，得我一個人再加埋同埋有幾個男仔坐咗一台喺度打緊 Monster Hunter。」

「啱曬你啦！你都有打㗎嘛！我未到之前你可以過去同佢哋組隊。」





「我冇帶部機出嚟！ 同埋佢哋四個人啱啱好齊人，唔好拆開人哋啦！ 你聽落把聲好似好興奮，到底有咩高興嘢發生呀？」

「我有個表姐玩開塔羅牌，佢啱啱同我占卜完個結果唔錯，所以我咪開心囉！」

「咁佢同你占卜咗啲咩嘢？」

「無可奉告，我係唔會話畀你聽。」

「車~~懶神秘，你預計幾點會嚟到？」

「我宜家喺觀塘親戚屋企出發，我諗一個鐘頭內點都會到。」

「咁OK啦！我在Cafe慢慢睇住漫畫等你過來，你到咗直接上Cafe就可以了。」

「OK，咁一陣見。拜拜!」





「好，一陣見。拜拜」

其實講真，我真係好想知道佢占卜咗咩嘢，但係佢唔肯講嘅話我迫佢都冇用。

當知道仲有半個鐘頭就可以見到佢，我就覺得好緊張，我唔知道佢見到條頸巾之後會有咩反應。

我不斷喺個腦入面練習習送頸巾嘅對白，幻想緊當佢收到頸巾之後同佢嘅表情。

雖然我已經練到滾瓜爛熟，但我覺得自己到最後真正講出口嘅時候，好可能變咗個腦一片空白咩都諗唔到。