愛是恆久忍耐: 第五十六章

第五十六章

當天晚上，我們三個人玩了一整個晚上，因為Ashley住得比較近，所以她玩到差不多12：00就決定返屋企。

當然玩到咁晏，我哋都唔放心俾佢自己一個人走，所以阿康就半強迫Ashley搭的士返屋企。

臨走嘅時候，我有叫佢返到屋企打個電話俾我報平安。

而我就因為住得比較遠，同埋我之前其實都有在阿康屋企過夜，所以我同咗屋企講會在阿康屋企過夜。





Ashley返到屋企之後，就打咗電話同我報平安，之後我都同佢傾咗一陣偈先收線。

「你真係重未同佢表白？」阿康等我收線之後問我。

「重未時候呀！宜家話曬都準備考mock同埋會考嘅時間都唔係淨返好多時間，我唔想影響佢心情。」呢個的確係事實，但最主要原因都喺因為冇膽同埋宜家嘅身體狀況。

「我作為旁觀者嘅角度，可以話俾你知，你可以放心去表白。返屋企報平安，其實只會喺情侶之間先會咁做。不過睇返你自己點諗，你同佢宜家其實都好似拍緊拖，表唔表白我覺得都冇咩所謂。」阿康用佢嘅角度同我分析我同Ashley之間嘅關係。

「但我宜家咁嘅情況，雖然話康復進度良好，但係我唔知道身體會唔會100%復原得到，如果到時需要佢照顧我，我又唔想影響到佢下半生。」我將實際要擔心嘅嘢講俾阿康知。





「表唔表白其實睇你自己啦！但我哋宜家先咁後生，拍拖又唔一定會結婚，有啲嘢唔洗諗到咁長遠嘅。」

「我有自己嘅打算，到時再諗下一步點做啦！」其實阿康啱啱講嘅嘢雖然係事實，但聽完佢講之後，我個一刻對未來又真係有少少灰嘅感覺。

「你知唔知大年初一喺咩日子？」阿康突然改變左話題。

「大年初一咪農曆新年囉，放假嘅日子囉！有咩嘢特別到你專登要講出嚟。」

「今年初一比較特別，個日係2月14日情人節。」阿康拎咗個小型掛曆俾我睇，然後指住2月14日。





「個日係2月14日咁又點？我當然知道嗰日係情人節，不過我同佢都唔喺情人，唔會約佢出來慶祝情人節啦！」

「你試諗下，如果佢個日願意出嚟，你之後成功表白嘅機會高咗好多。」

「就算你講嘅係事實，但我個日約佢出嚟又可以做咩？同佢表白完之後同佢慶祝情人節？」

「唔一定要表白，但如果佢個日冇人約，其實都可以話確認咗佢真喺單身囉!」

「不過你有要咁諗，嗰日年初一，就算佢冇人約，但屋企人要佢拜年，佢都喺出唔到嚟，用出唔出到嚟去確認佢喺唔喺單身根本唔科學。」

「咁你可以當自己拜年悶得滯，然後搵下佢都可以㗎！」

「就算佢出到嚟，但你覺得我可以方便四圍走咩？新年條街人好多㗎，重要情人節更加令我唔想出街，就算真係出到去，肯定會有人望住我哋兩個。」其實阿康講完，我有諗過個日約唔約佢出嚟，但諗深一層如果情人節當日要我出去，面對路人好似睇動物園入面嘅動物眼光，我不如唔出去重好。

「你自己決定啦！宜家離2月14日重有兩個星期時間，有大把時間可以俾你慢慢諗。不過我作為你老死，好多時都睇唔過眼你拖泥帶水嘅性格，但性格唔係一時三刻可以改變得到，如果你需要人幫記得搵我。」