愛是恆久忍耐: 第五十三章

第五十三章

阿康接完我之後，我同佢兩個人行超級市場買左一堆零食汽水
。
推我入屋之後，佢將我膝頭哥上融既零食汽水都放上枱，然後扶我在梳化度坐。

「估唔到推住架輪椅都幾倦。」阿康一邊講一邊收起我張輪椅。

「頭先都叫你放袋零食在輪椅上面，我推住架輪椅行路就可以，你又話要照顧傷者，唔俾我落地，我早就同你講左唔洗推我架啦!你又唔肯，不過你身子差在咁多既，縱慾過度呀?」雖然我都知道推住我唔係咁輕鬆，但我點會放過取笑佢既機會。





「冇咁既事，同縱慾無關，只不過最近少左運動，唔知係唔係因為呢個原因影響體能。」阿康在超市購物袋拎左兩枝可樂，俾左其中一枝可樂俾我之後，就攤左係梳化度。

「因為臨近mock所以放學之後溫書而少左去踢波?」

「唔關溫書事，學校日日都補課，補完課個時間都好晏 ，重點會有時間踢波。」

「你之前連堂都會走，估唔到你會咁生性，日日都補課。」阿康平時鐘意玩多過讀書，好難想像佢竟然會願意放棄去玩走去讀書。

「冇計我之前走得太多，學校話唔出席補課，有機會累計然後當缺席一日，我再扣出席率的話，唔知會唔會俾人踢出校。」





「都臨近會考，乜你覺得學校重會踢你出校咩?」

「都係捱埋呢幾個月，為左玩俾人踢出校博唔過。唔好再講讀書啦!一講我就頭痛。」

「頭咩野痛，我連上堂都冇得上呀!我宜家都不知幾想頭痛一下。」

「其實你都出得院，點解唔叫屋企人同你取消左個停學安排。」

「宜家我隻手唔能夠好靈活咁郁動，冇可能應付得到會考，所以我先會決定停學。」





「其實我見到你既康復進度都唔錯，我本身都冇諗過你咁快可以出院。」

「醫生都有講過我進度唔錯，可能係因為後生，所以復原能力較快，但係因為咩野事唔郁得都重係未知道。」

「最重要都係能夠康復，咩野原因都冇所謂啦!不過話事話你同Ashley發展成點?」估唔到阿康傾傾下，會將個話題會突然間轉到去Ashley度。

「有咩發展，咪同之前一樣，我重未同佢表白。」

「重未表白?你諗住拖到幾時先會表白?我以為你們經歷左咁多野，你會同佢表白。」

「等佢考完會考先算!我唔想影響到佢考試攪到佢分心。你唔洗諗住出手幫我，我想一步一步嚟。」我覺得阿康應該會想幫我一把，所以我預先同佢講好唔洗佢嘅幫忙先，同埋我都重係驚一表白之後，我連Ashley連朋友都未必有得做。

「你確定唔想表白?到時失去左你唔好後悔。」

「唔會後悔!我反而比較驚表白完影響到佢，你唔洗擔心咁多。」





「我只係想為兄弟既幸福著想，不過你到時需要我幫手的話，我一定會幫你。」

「唔講住啦!你諗住今晚食咩未?」

「我諗住叫Pizza食，平靚正同埋最重要係食完清垃圾都好方便，等埋Ashley上到嚟就叫得。」

「佢話今日只喺補到4:30，呢度同學校咁近，佢上到嚟再慢慢諗都唔遲啦!」

「咁好快啦!我拎隻monster hunter打住先!」

「我好多時都反應唔切，到時三貓唔好怪我。」

「到時貓左你咪過區避下先，反正我一個人都夠做。」於是乎我同阿康兩個一面打機一面等Ashley放學。