進化煉獄: 第九章：主人，力量！

「葉信傑，渡過一次煉獄。評分為高級，擁有分數分零，問題次數為一。」
「鑑於評分等級，賦予其能力……」

這聲音是一把女聲，輕輕的卻是非常清晰，語調溫柔得像風一樣，光是聽著都覺得舒服。力字的聲音漸漸遠去，信傑突然又感到那股涼意重新回到身上。由頭頂慢慢運遍全身，也不知過了多久，直至涼意去到雙腳腳掌處終於消失。

「能力—亡感，賦予完畢。請進行以下其中一個選項：
第一，問問題。
第二，把問問題權利兌換成十分分數。
第三，離開主人意識。」





信傑沒有感覺到變化，至少沒有翻天覆地的變化。像是力量劇增，肌肉澎脹等等的變化，就像是……訓醒了一覺而已的感覺。

「第三，離開主人意識。」

信傑默默想著，終於腦海裡的感覺與情境猛的消失。他也隨之張開雙眼，入目正是四人奇怪的目光。

「呃？做咩？」

信傑退後一步，摸遍了全身。確定沒有任何身體變化後，才看回了四人。





文哥好奇的問著：「你做左啲咩？Kenny只係合埋左眼一分鐘唔夠，阿恩都只係兩分鐘多啲，而你，足足十分鐘！呢十分鐘我地已經吹水吹到依加。」

信傑驚訝得張開了嘴，他完全不知道已經過去那麼多的時間。信傑搖搖頭說：「冇喎，主人話「鑑於評分等級，賦予其能力。」之後，我就冇做任何動作。直至佢比我揀，我就揀左離開主人意識。」

「冇錯，鑑定時間就係你地合埋眼嘅果段時間。主人就係果段時間開發你地嘅潛力，賦予力量，其他動作其實都只係一瞬間。咁睇來，你嘅能力應該好強。之前琳琳同阿正都係咁上下時間，你嘅能力叫咩名？」文哥點點頭問著。

信傑抓了抓後腦才說：「係亡感，死亡個亡，感覺個感。好奇怪，明明冇清晰說明，又冇文字解釋。但係佢話賦予完畢果一刻，呢兩個字仿佛紋身一樣，直接刻入我腦海入面，直接明白係邊兩個字。」

文哥點點頭說：「正常，因為主人就好似……神一樣，我會形容佢係神。每次入去主人意識嘅交流都係好清晰，唔會有絲毫嘅模糊。」





「亡感……死亡感？你有冇感覺到有咩唔同？」日龍想了想才問道。

被日龍這麼一提醒，信傑終於是感覺到有分別。現在他雙眼看的東西遠比之前清楚，他現在能清楚看到幾米外的鐵櫃裡有著各種槍械，放眼看下去更是清楚看到那邊已經最少十行鐵櫃，也不知道那裡有著甚麼東西。

他收回目光，舉起右手在空中揮了揮才說：「好似……成個人唔同晒，好輕……睇野又清楚左好多，力量都大左。」

「下嘛，我都係，我懷疑我依加用力跳可以跳到幾米高！」Kenny附和著話說，話語間他單腳用力踩了踩地板，傳來啪啪聲的高響，明顯不是普通人能踢出的聲音。

而陳淑恩更是誇張，她在信傑說完話的同時已經走到了牆邊。只見她深吸一口氣，雙腿張開紮起一個馬步。右手緊握成拳猛的打在鐵牆上！

聲音傳來的同時，她也收起了拳頭。鐵板上竟是留下了一個深深的拳印，此刻正慢慢復原著。

「我嘅能力名叫連環，不過我暫時唔知咩意思。我想問下我評分係低級，級數有咩用，點分？」淑恩摸著右手拳頭問著。

文哥也解釋著說：「評分就係我之前所提過嘅，主人會係每一次煉獄觀察我地。任何行為表現，話語可能甚至諗法，主人都清楚知道，就係根據以上嘅野去評分。」





「而評分等級據我所知，有低、中、高、頂級四個級數。新人嘅話就會影響得唔得到能力，好似我同日龍已經有能力嘅人，評分就……」

「等等，等等！我都係低級，點解我冇能力嘅？」Kenny有點慌張的問著。
「呃……咁主人係咪同你講咩能力提升一倍咁樣？」日龍倒是插話問著。
Kenny點點頭說：「係啊，佢話「評分為低級，鑑於評分等級，賦予其基本能力的兩倍提升。」咁樣囉。」

文哥打了個響指才說：「冇錯，呢種就係最基本嘅能力獎勵。我話過，到目前為止我冇見過人活過一次煉獄之後係得唔到能力，最渣最渣嘅，都起碼會提示基本能力一倍。所以依加你力量會大左，速度會快左。」

「至於你問嘅問題，我會解釋做因為級數只係籠統嘅形容。好似你同阿恩咁都係低級，但係可能級數入面有個……小分數掛，阿恩可能係低級90分咁樣，而你就係低級50分咁樣。所以阿恩就有能力獎勵，而你就只係加大左基本能力。」

看到Kenny無奈地皺著眉，文哥也笑說：「哈哈，始終人地後生過你嘛，本錢泥架！好似我同日龍都係第一次搏老命，先拎到中級，獎勵左能力。又好似今次咁，打到就死，都依然係中級。但係信傑開左幾鎗，同阿恩咩都冇做過都有能力就知啦。評分係睇全數表現，唔係你煉獄入面貢獻左幾多。」

一旁的信傑聽到目瞪口呆，最主要是……他們之間像文哥日龍打至瀕死階段也只得到中級的評分，而他自己……





「高級？咁我咪……好誇張……但係我好似冇做過啲咩喎……」信傑有點驚訝的想著自己被評為高級的事情。
「信傑呢？你應該同我地一樣係中級啦下話？」文哥突然想起，向信傑問著。

「我……我評分係高級喎……」信傑摸著後腦，有點呆萌的回答。

「咩話？」文哥驚訝的走前拉著信傑。
「高級？有咩可能？」日龍又是一副難以置信的樣子。

剩下的淑恩和Kenny都是一臉愕然，畢竟大家都是新人，這個分差讓他們完全不能平復心情……嗯，尤其是Kenny，又一個大打擊。

「我每次搏命去到盡，先試過一次比主人評做高級，果次我仲斷手斷腳，連個頭都比人打碎左一半。你條姑碌第一次就高級？你……你有前途呀你，哈哈哈！」文哥大笑著說，豪邁的形象此刻表現得淋漓盡致。

「如果你係高級，你嘅能力應該好完全至係喎。你體內冇任何改變？例如多左啲能量，或者你意識上有冇咩新嘅感覺？」日龍皺著眉，認真的問道。

信傑聞言又是認真感覺著全身上下，然後又靜下來讓腦子想東想西。終於又是幾分鐘後才說：「完全冇……除左基本身體上強壯左之外，完全冇任何新野。」





日龍右手摸著下巴，腦袋左歪右歪的說：「咁奇怪，咁睇來你嘅能力係因應情況先會顯現。平時你可能發揮唔到出泥，唔似我同阿文果種。」

信傑有點失望的摸著自己，得到了些甚麼，卻不知道是甚麼的感覺始終不太好。

文哥卻是一手拍著他的背笑著：「哈哈！點都好啦，有好過冇，你好快會知自己已經變左超人！哈哈哈……」

被這笑聲感染著，信傑終於是停止了苦惱的思考，跟著一起笑。

「停留於武器房時間剩最後一分鐘，七天後將再次回歸。」

主人的聲音突然傳來，這次是像廣播一樣的聲音，不再是意識上傳來的聲音。

「咁快？我未接受到喎……」Kenny愕然的說著。





阿恩和信傑都是張開了口打算說些甚麼，只見文哥雙手揮著打斷眾人的話語：「我知你地仲有疑問，但係冇時間解釋喇。」

他從口袋中抽出三張紙條遞給三個新人說：「記得，呢一刻你地得到嘅力量，番到現實世界就會消失，你會變番普通人。記住，係普通人！身體就會好似你第一次入煉獄之前果陣嘅質素，唔好以為自己已經變左超人呀！」

待三人接過紙條，文哥才說：「紙上面係我電話號碼，你地如果有問題就Whatsapp我啦！我地……下次再見！」

話音剛落，他已經消失不見。是的，消失。突兀的，眼前只剩下空氣。也在這一刻，信傑意識模糊起來，整個人仿佛進入了睡夢之間，那是……半夢半醒的狀態。

...待續