進化煉獄: 第四章：「煉獄」與「空間」

洪日龍這麼一說，又是把大家的注意力給集中回來。

日龍直接坐在地上才說：「其實阿文啱啱所介紹關於每次完結之後嘅空間同主人有啲簡略同故意嘅錯誤，而且同實際有啲唔同，我地咁做係為左唔好浪費時間。唔好怪我直接，之前我地經歷過好多次新人加入。每一次我地都詳細解釋，導致好幾次因為浪費太多時間講解，而遇到危險。」

「亦有好多新人以為經歷過一次「煉獄」之後，就會變超人，擁有無與倫比嘅實力。導致第二次入泥果陣通通都去晒送死，所以為左保留應該保留嘅人材，阿文先會話自己經歷過兩次煉獄先有力量，實際上一次就會有。」

「所以我地依加只會用簡略嘅講法去形容關於呢個空間嘅事，直至遠離某啲危險同埋確認邊啲新人有能力加入我地之後，先會慢慢講解。」

日龍又是抽了一口煙才繼續道：「咁樣講啦，我地每次進入嘅呢個空間我地稱之為「煉獄」。呢個名你地呢刻可能覺得誇張，不過如果之後你地夠運夠實力經歷多幾次之後，你地就會明白箇中意思。「煉獄」入面好多唔同嘅地方，例如今次「熾獄島」就係其中之一。任務亦係五花八門，呢點我地之後再詳談。」





「然後就係成功完成任務之後，我地會再一次迷迷糊糊咁消失。再次有番意識果刻我地會出現係另一間房，我地叫果度做「武器房」，源由就唔講喇，你地去到自然會明。順帶一提，你只要尚有一口氣或者一下心跳，番到武器房你都會好番晒，即係受嘅傷會完全好番。好，跟住就係最重要嘅部份……主人喇。」

日龍吞了吞口水，又是呼了口氣才說：「所謂主人確實係冇實體，只有一把女聲。我地係武器房可以同主人做意識上交流，關於「力量」方面就係果一刻主人話比你聽開啟你身上咩嘅力量，而問問題亦係果時問。不過！」

日龍突然大聲呼出二字才道：「不過唔係每次都一定要問問題。假如你唔問，你可以將問題儲起佢，或者換做「分數」。而分數嘅用途就多喇……」

「每一個問題唔問嘅話可以換成十分，當然亦可以用十分換成問一次問題。累積二十分則一次性問兩個問題，三十分就可以換一把武器去現實世界。」

話畢日龍輕輕揮動手中的鐵棒才說：「例如呢枝鐵棒，實際上我完全唔知用咩物料製成。我淨係用過三十分換走呢枝鐵棒跟我番現實世界，然後即使我唔隨手攜帶，下次番泥嘅時候佢依然會出現係武器房入面，即係果把武器由換完果一刻係會跟出跟入嘅。」





看到程霜欲言又止的表情日龍立即揮手打斷她才繼續道：「我知道你想問咩，繼續落去嘅分數我就冇試。如果要查詢之後幾多分可以換啲咩，就要用五分。如果想一次過知道晒，就要用五十分。」

「至於……如果你可以儲到三百分。」

日龍深吸了最後一口煙，慢慢把煙屁股丟在地上才說：「三百分，可以脫離煉獄，永遠番去現實世界。而如果你儲到五百分，則可以攜帶你係煉獄得到嘅能力同最多五樣物品番去。」

本來關於煉獄與完結後空間的解釋，眾人還在吃力地消化中。日龍卻在最後拋出這麼大的一個「驚喜」，此刻無一人不是張開了嘴巴，呆呆的看著日龍。

日龍也不遲疑繼續道：「即係如果你有朝一日儲到五百分，例如我……可以帶住五把超高科技武器連同呢一身絕世速度番去現實世界。到時得閒就做下超人拯救下世界、得閒就即刻買個島做下國王，你地幻想得到嘛？只要你熬過呢個無盡嘅煉獄，前面等緊你地嘅……就係天堂。」





說到這裡，日龍那無神的雙眼仿佛閃過了銀光，眼神變得多麼銳利，如鷹眼一般的有神。

程霜又是最快回過神來，開口問道：「咁你地所講嘅強化又係咩一回事？仲有……有冇人試過儲到咁多分？畢竟你講嘅係五百分，就算完全唔問問題，唔查呢樣果樣，都要經過五百次煉獄嘅挑戰喎……有可能咩？」

日龍此刻倒是苦笑著回答：「當然冇試過，亦唔知有冇人試過。好似我依加只係儲左五十分，過埋今次唔問問題的話就有六十分。自私講下，我暫時嘅目標係儲一百分睇下有冇特別野換，冇就用五十分換個完整嘅分數兌換表。」

「至於強化，就好似我同阿文得到嘅力量除左自身好好地熟練應用之後，其實呢股力量仲有方法強化甚至進化。之前講過，力量嘅來源係主人開啟我地體內嘅潛能。人類嘅潛能係無窮無盡嘅，只係我地比太多野限制住自身嘅進化……例如安穩、例如科技等等。」

「主人就有提供用分數查詢自身力量提升嘅分法，只需二十分。」

「想問下，阿文之前提到過。成功活過煉獄，主人就會開啟我地潛能之類嘅講法，係咪只要今次冇死……我地番去果間房之後就會得到你地所謂嘅力量？」

一直近乎沉默，沒怎麼說過話的拳手陳淑恩突然開口問道，而且是問如此直白的問題，讓在場人士都不禁直直的看著她。

「冇錯，或者應該咁答你。至少我冇見過有人番去係攞唔到力量，因為每次大家都係搵命搏先有命番到去，所以表現再差都好，都一定會比主人獎勵。只係得到力量上嘅差別有唔同，呢樣亦視乎你地嘅表現。」





這次換文哥回答，在日龍說話間他已經擦乾淨了身體，正抽著一根煙。

「吼……！」

突然傳來一聲震耳欲聾的吼叫聲音，那是……那是一種無法形容的聲音。至少剩下的幾個新人完全無法說得出來，這是他們從未聽過的叫法，硬要說的話，他們都只會形容成不是人類的叫聲。

那是種像獅子的咆哮，叫聲的力度卻像犬中霸王藏獒的層次。如果要文學點形容，就像是雄獅威猛咆哮的保護膜，包裹著藏獒憤怒用力的深嚎在裡面。

此刻文哥和日龍都是猛的看著聲音來源，與此同時除了聲音的傳來，該方向還猛的湧來一股熾熱的暖流。

「今次又係咩怪獸？」Joe渾身抖震著問道。
「唔係怪獸……又或者有。」

文哥說出了模棱兩可的回答，他深深的看了日龍一眼。隨即左手抽出一把匕首，右手亦拿出手槍才問道：「要去幫忙嗎？」





日龍冷冷的看著那方向，只是輕輕回頭望了文哥一眼才說：「問咩啫，你啲動作出賣晒你啦。」

文哥倒是靦腆的笑了笑才大聲叫著：「全部人跟住我！前面有啲咩我唔肯定，但係你地見到咩都唔好出手，交比我都肥仔！」

話畢他就一個箭步跑前，眾人只看到留在原地的鞋印及模糊的背影。日龍也是身影一晃便跟了上去，剩下的人這才回過神來，紛紛使出盡力跑前跟上。

身體是反應過來了，但他們心裡都是迷茫、擔心、驚恐著。

前方等待著……或是說面對著的，到底是甚麼樣的煉獄？


...待續