香港靈異奇聞: 九龍灣工廠靈異事件

九龍灣工廠靈異事件

呢件事發生係3年前左右嘅，我公司係九龍灣宏開道，一座叫景X 嘅一座11層高工廠大廈，原本只有9樓一個貨倉，因為貨倉唔夠用嘅關係，就係3樓另外新租一個單位，先講講呢個有問題嘅3樓倉，倉外嘅走廊佈局先，佢係一條"L"字形嘅走廊，L字嘅底部，係4部電梯，每次出電梯都要轉180度向番後行先到單位，而公司租黎做倉庫有問題嘅單位就對正走廊嘅盡頭，對正整條走廊。倉門嘅旁邊，有一個凹位，係FOR轉入同倉門成一直線嘅防煙門，所以我地彎身開卷閘，係睇唔到防煙門入面，有無人企左係道，係自身安全上，都已經有D隱憂。

而我身處嘅寫字樓係係5樓，3樓呢一層唔知係唔係因為單位比較少嘅關係，佢係比起我地有同時使用嘅5樓同9樓靜好多，而且燈光亦比較暗，3樓有一個幫學校制飯盒嘅廚房，只有呢個廚房先叫做人氣旺一D，提外話，奇怪嘅係，呢個廚房除左熱力之外，我每位同事，係佢地打開門而且運作緊嘅廚房行過，都從來無聞到過任何煮食物嘅味道。 而呢間廚房到依家仍然存在。

再講番我公司出事嘅呢個單位，呢個單位，其實係有兩面直排大窗，單位都頗為光猛，所以我地都無聯想過有咩怪事會發生。 租用嘅初期，我地已經發現倉門有漬水，但我地不都不以為意，而呢個倉因為唔係擺放主要貨品，所以都係有須要嘅時候，先有同事落倉搵貨。 使用初期有好幾次，同事須要留守倉內做一D貼LABEL之類嘅工作，很多時佢都會見到門底外有人停留，停留一段時間就走，同事有時好奇行埋門眼睇，但永遠就睇唔到有人，再番埋工作位置又會再次見到腳影，我地最初都安慰自己只係管理員逛樓就算。 而呢種奇怪事，亦都無間斷咁一直發生。 後黎其他奇怪嘅事開始陸續出現，例如係倉嘅一邊做緊野，另一邊會有物件移動嘅聲，跌物件聲等等。 甚至乎，最後一位離開嘅同事，佢第二朝第一個開倉發現，竟然有d成8，9公斤嘅貨，本來係細箱區嘅貨，竟然比人移動左10幾呎遠移動到去左放大箱嘅地帶。

門口漬水嘅事有同事好奇下，尋訪樓下嘅單位，發現其實同樣都係走廊嘅位置，到底漬水點解會經常出現，我地都唔明白。 有同事甚至講笑咁講，係鬼水凶靈。 其間，有同事唔知係唔係驚得制，係無辭職嘅情況下，無再番工。 之後請左位新同事，係無同佢提及倉庫有呢D怪事嘅情況下，佢亦感覺得到呢個倉唔係好尋常，呢個倉，由於倉近門口位置嘅光管比較遠，為左有利我地出貨前點算貨件，公司打算加裝番一兩支光管，呢位雖要經常落3樓倉嘅新同事，奇怪地竟然極力反對，問佢原因，佢只係答: 唔需要。





其實以上種種，都不至於有勿野值得我地非常恐慌，再落黎嘅日子，真正恐怖嘅事開始黎，我地公司三層樓都有內線電話接通，有一次有同事打電話落3樓比倉做緊野嘅同事嘅時候，佢聽到通話中，同事嘅背景聲，有人講野，係女人嘅聲，但就聽唔出對方說話嘅內容。 我地只有兩位倉務員都係男同事黎嘅，咁呢把女人聲係邊個黎呢? 呢位做完野嘅3樓同事番上9樓倉，不意為意，講開發覺，當其時，只有佢一個係3樓單位內。 並無任何其他人。 呢種聽到有其他人存在嘅聲，接二連三咁發生，事件越黎越開始明顯，有一次同事去完3樓番上9樓倉，
9樓嘅倉同事坐位係背住入門位置，佢聽到0岩0岩番黎嘅同事，係同一個女人傾住計咁番上黎，佢下意識以為係同寫子樓嘅女同事上黎。 但擰轉面，就只見到佢一個，問佢頭先同邊個講野，佢話無，只有佢一個上黎，亦曾經試過，同事打電話落倉，打一次，比人CUT線，打第二次，比人再CUT，打第3次，呢次甚至比對方"廊"起左個電話，而其實個同事，跟本係無落過3樓，佢只不過一直係9樓嘅TOLET如廁緊。

大家戰戰驚驚咁，一齊走落3樓查明原因，就竟然見到聽筒，係無人到過嘅情況下，比人拎起左，放係檯面。 令人毛骨悚然。 怪事不斷咁發生，而且一次比一次嚴重，記得呢次正係打緊一號風球，雖然係一號風球，但果日天色好黑，而且仲行雷閃電咁，係呢一日，電話事件，由簡單嘅只到背景講野聲，變成，同事至電落佢唔知無人嘅3樓倉，當時有人接聽電話，呢次無CUT線，令人標冷汗嘅係，竟然突然有把好尖嘅女聲，(HEHE~~~) 咁係聽筒邊笑左一聲。

嚇得係寫字樓位女同事連電話都掉左。 因為全公司嘅女同事都係哂5樓嘅寫字樓，佢當然知把聲係咩野黎。 同日，我本人，亦都係落3樓出電梯後轉彎嘅牆邊，冷不防見到一個透明水狀嘅人形，好似係不為意我突然由電梯行出黎咁，佢立即背貼牆，雙手按住牆身，閃避我咁，可能同我身上帶有護身嘅物品有關。由於我趕住工作上嘅野，所以我當時係行得好快，回頭幾秒間，透明人已經消失左。

到最後，因為事件亦都鬧得越黎越大，公司都安排短時間內搵地方搬，係搬走嘅當日，本來長期唔係香港嘅老闆都親身番黎，親自裝香拜祭，仲要倉嘅同事係單位留守，由搬倉嘅第一箱開始一直點香，直至最後一箱都搬走為止。

事件亦就始結束。





本章完。