Checkmate: 象棋學會？

我叫王月君，今年中四，係象棋學會既文書。
我係一個唔識捉象棋既象棋學會會員，仲係唯一一個。
點解我要入象棋學會，仲要上埋莊？咁當然係為左學會既靚仔會員，同埋…
「喂阿君，今日放學開班會呀，記得唔好走住呀！」
「吓…阿心，我今日放學要學琴喎…」
無錯，佢係我 best friend 馮心，亦都係象棋學會既主席，就係佢叫我陪佢上莊。
「今日希特拉落左格殺令，缺席者，殺無赦。」馮心你好野，居然揾希特勒黎嚇我。花名叫「希特拉」既張洛希係我地班既班會主席，仲要係空手道高手，如果我今日唔開班會的話，都唔知會有幾多日落唔到牀。據說佢係女既，但係佢實在係雌雄莫辨得太緊要，於是我地都話張洛希既性別係張洛希就算。
咩話？你話你唔係想知呢啲？我離左題？
好，對唔住。再黎多次。
先自我介紹，我叫王月君，今年中四，係象棋學會既文書。




我地係XX中學既象棋學會既成員，研究既係國際象棋。
學會主席係馮心，即係我 best friend，副主席叫韓穎軒，超級靚仔。佢地兩個捉象棋都好叻，唔知攞過啲咩國際大獎之類，總之就係高手。
財政都係我個friend，叫丁丁。由於佢本名丁灤灝實在係太難讀，所以個個都叫佢做丁丁(據說佢曾經因為咁比唔少人以為係女仔)。
然後就係兩個打雜…呀唔係係總務，佢地叫裴凱同杜雨欣，係學校公認既情侶檔。
介紹完畢，跟住落黎就係我地學會既日常啦~