要投胎，就要去害七個人: 後記

就係咁，呢篇《要投胎，就要去害七個人嘅長篇告一段落》。個故仔本身上年年尾有個構思，跟著今年年頭左右寫咗大綱。因為自己懶，到3月月尾先開始寫，4月月頭開始連載。篇故喺簡介講過借鑑電影黑心鬼，其實套戲只係睇咗網上blog簡介套戲劇情，我睇完個簡介覺得好似哂咗個idea，之後就想借套戲嘅idea再去寫篇小說。
 
關於個故仔劇情，其實係借咗早前篇《寫甜故寫到身敗名裂》裡面男主角寫嘅《我要與一萬名女性性交，才能投胎轉世》條橋。而個主角穿梭不同嘅時空，我不自覺咁跟咗Interstellar套戲近結尾個橋段，尤其係Chapter 5陷害阿紫嗰part。個故仔大綱係同依家篇文有分別，譬如第五個目標，原本係想參考之前臨臨單新聞去寫，後尾唔想俾人話抽水就擱置咗，變咗係講阿美個老母。另外第三個目標本身後段虐待狗隻，本身想學一則新聞，係東涌人獸交單新聞。後尾諗諗吓發覺太過核突，驚讀者睇到呢段唔再睇落去就改咗。
 
仲有一樣嘢係唔跟自己寫嘅大綱，就係第六個目標。本身寫第六個目標，想參考番Nirvana樂隊主音Kurt Cobain自殺。到咗最後因為一位巴打賭仔嘅留言，令我改咗個劇情走向變咗寫阿紫過去。成篇故結構無身敗名裂故咁複雜，開幾條故事線去寫，因為已經寫唔番咁。呢篇投胎故同身敗名裂比，身敗名裂劇情似坐緊過山車，而過山車飛出車軌。投胎故似自己慢慢被吸扯去黑洞裡面，點郁都走唔甩。
 
關於成個故嘅ending，本身原案係黑心鬼阿恆扮翻生見番阿美，跟著去賭爭落一身債，跟著逼阿美落火坑做雞還錢。如果Chapter 3個虐狗犯唔係阿美嘅話，就會咁樣寫落去。但係唔知做乜心血來潮，將個虐狗犯變咗做阿美，可能之前無乜交待阿美係一個點樣嘅女主角。就係咁，寫到個阿美越嚟越扭曲同極端，真係對佢唔住。
 
呢篇我自己想講好多嘢同埋寫嚟問自己，Chapter 1對父親嘅質疑，Chapter 2於末世下人性最極端的一面，同Chapter 4政權嘅一種白色恐怖，而Chapter 3、5同6就係講人性同埋…想寫到似宿命論。好似想寫太多嘢，搞到篇故無咗個重心，節奏太急拿捏唔到平衡(係Chapter 1劇情去得太快)。
後記寫到呢度，有乜意見歡迎提出，大家交流下。






覺得我寫嘢得嘅話，請like我FB page:
https://www.facebook.com/therudemanroom810/