投胎之後害死全家人: 2.重生
在產房內，一個嬰兒呱呱落地，正是在下。
「BB冇喊到。」接生既姑娘講。
我心諗又唔係第一次出世，使物喊呀！一啲都唔型！之後醫生就打左我pat pat 幾下，但我
死都唔喊，佢又打左我pat pat 幾下，佢打我pat pat 我已經好唔高興，於是正當佢諗住又再打我既時候，我即刻勉強咁喊左兩聲。
「呀~呀~」醫護人員聽到我喊出聲都鬆一口氣，姑娘用毛巾包住左我，將我抱左去媽咪到
，同佢講︰「林太，恭喜你！係個健康既BB女！」我聽到之後又喊左出黎，但喊得更大
聲。BB女？我明明係個男仔黎，點解會咁！
姑娘聽到之後仲滿意咁同我呀媽講︰「好有中氣咁！」佢地又點會聽到我哭聲中透露出
既驚慌同絕望呀！可能BB仔岩岩出世冇咩能量，我喊下喊下好快就瞓著咗！
係睡夢中，我夢見小鏡，我質問佢︰「點解我投胎會變成女仔架？我明明係一個男仔
！」
小鏡聽到之後笑笑再講︰「我講過投胎係隨機架啦！每個人都係咁！我冇虧待你，亦都冇優待你！」
我聽左之後呆咗，諗緊之後應該點做。而家我終於啲明白點解啲人話同性戀係「錯置的靈
魂」，原來係真既。而小鏡就好似聽到我心入面既想法，帶點不屑咁笑住回應我︰「錯置的靈魂？你覺得呢個投胎機制造成既錯配？投胎機制係冇呢啲低級錯誤架！其實靈魂根本就冇性別之分，性別只係人係社教化之後所產生既野。如果你冇左前世既記憶，你最終都會被社教化成為一個女仔！你接受唔到只不過係因為你受你前世記憶所影響！……咁你而家有冇改變主意，想忘記前世既記憶？好好咁係今世被社教化成為女仔！」
聽完佢咁講之後，我真係有啲猶豫，諗緊好唔好忘記前世既記憶。如果唔係，今世我無法
被社教化成女人，咁我咪會變成其他人眼中既怪人，俾人歧視！然後我又係到諗，而家社
會既女性地位雖說比以前好咗好多，但結緍之後湊仔，做家務既重任依然落左係佢地身上
，如果我真係任由自己忘記前世既記憶，被社教化成為一個傳統女性，咁我呢世咪又係要
為咗其他人而活。我知道我一定唔可以咁做，我唔可以錯過呢個以前世既記憶為經驗，自己掌控自己人生既機會。於是我同小鏡講︰「我明白啦！但我都係想保留前世既記憶。」
小鏡聽到我既答覆亦都只係淺笑，講︰「唔緊要！有需要隨時搵我。」
隨即我就係睡夢中醒返，我張開眼就見到有個男人係上面望住我。我左望望右望望，發覺自己瞓咗係張BB床上面，媽媽就瞓咗係旁邊張大床到。
「我係你爸爸呀！爸爸，爸爸，叫爸爸啦！」面前呢個男人對住我講。原來佢就係我呀爸
。媽媽係一旁笑住講︰「傻既！BB仲咁細個邊識講野！」個男聽完之後笑笑咁望住我。雖然眼呢個係我呀爸既男人傻下傻下咁，但見到有人因為我既誔生而咁開心，我真係有小小感動，我亦對住佢笑咗出嚟。而家眼見我父母感情都算幾好，咁我應該唔會好似前世咁係一個畸形家庭中成長掛！我應該可以相信佢地既，唔知我今世可唔可以由一個畸形人變返一個正常人呢！雖然嬰兒呢個身體機能限制咗我好多既行動，但我仲可以一如以往咁思考。
「老婆！老婆！你睇，佢呆下呆下個樣好可愛呀！勁似好認真咁思考人生囉！」
我聽到之後好想對佢做一個返白眼既表情，因為我真係係到思考緊人生，但唔知係咪BB
啲肌肉仲未發展得好好，我做唔到呢個表情。不過俾人話可愛既感覺又幾奇妙，我咁大個
都係第一次俾人話我可愛，我通常都俾人話我靚仔。
跟住呢幾個月我都係食飽就瞓，瞓飽就食，過得非常舒心。亦都有好多父母既親戚同朋友黎咗睇我，但好心睇還睇，又摸又錫又搣想點先？我父母同你熟咋，我同你地唔係好熟架咋！仲有啲人把口臭到呢，仲要係咁鍚我，噴曬啲口氣俾我，謀殺咩！我即刻喊俾佢睇，要我父母抱返我走。然後係呢段日子入面，我好快咁攪清楚佢地既家庭關係同埋家境。佢地兩個都係獨生子女，我地三個就住係呢個差唔多400尺既居屋入面，層樓仲供緊，媽媽係家庭主婦，爸爸係物理治療師。佢地睇落都算係一個中產家庭，咁我個心都定啲！正所謂「貧賤夫妻百事哀」，我真係唔想又好似前世咁過住一啲家無寧日既日子。仲有最重要既係佢地幫我改咗名，叫做「詩賢」，林詩賢。從今以後我就叫做林詩賢，唔再係蔡家偉，我要過新既人生啦！
平靜既日子就咁過咗兩年，兩歳既我已經可以開始講啲簡單既詞語。而媽媽竟然迎黎咗第二胎，照左超聲波之後知道係男仔嚟既，咁啫係之後我會多個細佬。媽媽係照顧我既同時，亦忙於為細佬既黎臨做準備。終於到咗預產期，我見佢地執好曬嘢，將我送左去我嫲嫲到暫住。到佢地幾日後接返我返去既時候，細佬已經出左世，並且抱埋返屋。當我爸爸一送到我返屋企，我就即刻衝入房諗住望下細佬係生成點？我跑到BB床旁邊，但係唔夠高去望。爸爸見狀將我抱起，同我講︰「呢個就係你細佬啦！」
我專心咁望住眼前呢個BB，又覺得佢幾得意喎！望下望下，又令我諗返起我前世既個個妹，我走既時候佢岩岩18歳，而家佢已經21歳，唔知佢而家過成點呢？我而家住石硤尾，佢住係沙田，可以遇見既機會微乎其微！過多幾年，我就算遇到佢都未必認得到佢，而佢遇到我就一定認唔到我！
父母見我望得入神，爸爸講︰「老婆！你睇佢望得幾入神，佢第日一定會好錫細佬啫，佢地感情一定會好好。」媽媽就笑住咁回道︰「一定會！兩個都係我既心肝寶貝，一定會相親相愛既！」但我就心諗︰maybe la，要大啲先知啦！
就係個晚，久違既小鏡黎左探我。就係我一個人瞓係床上既時候，我見到佢企咗係我床既對面，我慢慢坐左起身，呢個動作對於3歳既我黎講已經冇咩問題。即使房間入面關左燈，透過窗外既光，我都可以隱約見到小鏡著住一身專業既運動服。佢望咗望我疑惑既眼神，再望一望自己，衣服瞬間變返我細妹平時著開既衫。
然後再笑笑咁講︰「唔好意思！岩岩處理咗一個掛住運動選手既仔既爸爸，未轉返好！我知道你岩岩多咗個細佬，所以突登過黎恭喜你！而且我都有一段日子冇黎探你。但你放心，雖然我冇黎睇你，但我係有密切留意你既情況既！……直到你同我講你要刪除前世既記憶為止！」講完最後一句，佢露出狡猾既笑容。睇黎佢真係好想我刪除前世既記憶，不過我都明既，咁樣就唔會再有人知佢出錯既事，免卻好多麻煩，都未計佢要定時睇住我有冇行差踏錯。
我禮貌性咁同佢講︰「有心啦！但暫時唔需要！……(亦講笑咁講)就連我打飛機，你都會定時睇住？」然後佢就好似我呀妹咁，一啲都唔怕羞咁碌大雙眼望住我下面，講︰「放心啦！我會架啦！(然後又一面不在意咁話)不過你都冇。」
我並冇因為佢咁講笑而嬲，反而因為今日我岩岩諗起呀妹佢就黎咗睇我，我既心情放鬆咗好多！於是我試探性咁問佢︰「係呢！你…知唔知我呀妹而家過成點呀？過得好唔好呀？」
「你想知？」
我點點頭。
「好既定義係咩先？餓唔死又係好，病唔死又係好！」
「佢過得開心就係好！」我答。
小鏡聽完不屑咁笑左出聲︰「哈！俾你知到佢過好又點？唔好，又點？」
面對小鏡既問題，我無言而對。的確，俾我知道又有咩用。
佢繼續講︰「你話你過保留前世既記憶係為過今世更好既人生，而唔係俾前世既記憶牽絆住你。今世同你無相干既人就唔好再諗啦！佢過得好唔好都唔關你事！......最後都係個句，唔好向任何人透露你有前世記憶呢件事。」說罷，小鏡就消失咗係夜幕之中。
#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/