簡介
【絕望真相】- 《同人講鐘意Twins一定俾人笑到喊出黎，但我真心慶幸經歷過佢地既全盛時代》
| 作者 | counter walk |
|---|---|
| 類型 | 散文 |
| 狀態 | 已完結 |
| 更新日期 | 21-03-2018 14:31 |
| 文章字數 | 2603 |
| 點擊次數 | 217 |
講真，如果你喺Facebook或者朋友聚會大大聲同人講你鐘意Twins，一定俾人笑到崩潰。
「唔喺呀麻…鐘意Twins…好無taste囉…」
呢一點我非常了解，因為小弟已經俾人笑左15年。
無錯，係15年。
由她們一出道開始已經留意、然後鐘意和支持這個組合，追她們的歌，到後來她們的低潮，再回來。
不過就算俾人笑，我都真心慶幸我既少年時代能夠與她們的全盛時期相遇，有她們的歌一直在旁陪伴著成長的每段路。
想當年因為她們的空前成功，很多公司、經理人均希望複製奇蹟，樂壇接二連三出現組合潮，同公司的Boyz，不同公司的2R、Cookies、再之後的Hotcha等等等等...男男、女女、男加女, etc
但無一個能夠與之相比。
無錯，呢個時候你會話
「超...佢地唱歌又唔好聽又走音，紅埋哂啲K歌，樣得呀嬌好啲，身材又無，做戲又屎...」
誠然，唱歌佢地基本上下一個紀元都唔會追到容祖祖，
樣同身材同依家啲靚模比可以講係完敗，
拍戲咁耐，或者呀Sa係愈演愈好，但始終非影后之流，
但好似有人話楊千嬅是被眷顧的一個，Twins同樣也是沒有超級技能/ 條件，卻得到伍樂城、夕爺加Wyman的偏心、寵愛，為她們打造出一首又一首的王牌歌，紅到就算不是die hard fans都一定識唱。
15年過去，還能夠站在紅館開足5場四面台的組合不多，但Twins就是其中一個。
而驅使我們經過這些年還進場支持的，不是甚麽實際的硬件，卻是兩個女生唱出的一份感覺，一股親和力，一直見證著我們的成長，同時我們也看著她們由兩個傻女孩變為成熟女人，這份一同走過的感動，不是唱得好聽就能換到。
可能有人會笑佢地、鬧佢地、不齒佢地，
但同時亦都很很定，有好很好很多人曾經在自己的ICQ、Xanga、MSN、Facebook、IG post過她們的歌詞、MV用以抒發那些說不出口的情感，在中學、大學、工作的每段旅途，代我們唱著一句句心聲。
和朋友吵架不敢破冰，我們會在ICQ的尾巴加上「我更要永遠記得拒絕再因小事怪人」，
就好似同朋友淡左要post《最佳損友》一樣，定律黎既；
與另一半分了手，《丟架》、《你不是好情人》、《眼紅紅》通常都走唔甩；
情人節無人陪點都想整首《雙失情人節》，
不敢表白就只好寄情為甚麽只可跟你維持《朋友的愛》，
Grad din/ 夠18歲/ 著下高踭鞋都會在照片加句「我著得高踭高過人」，甚至痴左線咁喺K房跟著MV起舞；
六週年caption會加一句我們《相愛六年》；
《風箏與風》的二部經過千錘百鍊，終於和相識十年的好姊妹成功夾到；
每次叫人不要離開就會唱起「不要走，大鐘即使敲響你別放開手」；
畢業時下意識會哼著《我們的紀念冊》，可惜到現在可能已沒有人會寫紀念冊；
由當年要上Coolmanmusic睇歌詞，還很流行聽電台，常常希望DJ們播她們的歌，
到現在YouTube、iTunes有齊全部任聽，
終於明白咩叫時光可變，世界可變，人情亦許多都變遷，但有些事和回憶，卻不可能被改變。
如果碼頭、鐘樓、獅子山是一群人的文化記憶，Twins就是我們的集體回憶，但不同其他文藝建設，你可以喺博物館同人講你鐘意考古；
可以喺港台話你玩三項鐵人；
食飯同人講你玩車有幾勁；
但你無可能喺蘭桂坊大聲問「喂，LOL1月4加場喎，一齊去呀？」
即使不能換來欣賞，我們還會珍惜，就是因為回憶。
縱然現在韓星當道，曲、詞、舞、星、制作各方面亦被外界認為已超越香港9條街，但你糾結於應否say sorry時亦不見得會post一首《sorry sorry》，
失戀時post一首《Loser》，就好似去譚仔食土匪雞翼剝左層皮先食，無話唔得既，但我唔會...
如果你未經歷過Twins的年代，聽過、鐘意過、沉迷過她們與她們的歌，你很難明白，原來支持一個偶像，有時不需要太理性，相隔5年再踏紅館，仍有如此多人希望入場支持，她們就是靠著一份感染力，在我們十多歲這個總是想得太多，可以說的太少的尷尬年齡，唱出一句句我們開不了口的身世感受，同時也自白著她們自身的故事，那一份共鳴再加上一點膠膠地的「然後買襪買衫可以做風紀」，就和大家走過了15年。
唯最感觸的是，很多𡃁仔𡃁妹已經不認識她們的歌；
入到場發現99%都係廿尾到三十幾；
就像每次看到一些電影多年後的續集，如《我老婆唔夠秤2》，就會想起時日太快，10年可以轉眼就過哂，
由《零四好玩》，《相愛6年》，《3650》到今天，這個側手翻已經打了15年，再難相信，也要接受自己已經不是當年十幾歲無憂無慮的死𡃁仔，當年興奮的期待，今天已變成感觸的眼淚，誰在悼念快將接近成年，原來來不切悼念，今天我已經成年。
和Twins一樣，這15年來我們也開心過傷心過笑過喊過，好事壞事也發生過；
和友人出走過、爭吵過，在感情路上熱戀、分開、再從頭黎過；工作上跌過、碰過，
終於明白，事情發生後總會過去，結果原來不是最重要，關鍵的是過程、回憶和自己。
我們可以擁有一時的成功，但低潮亦必定在前方等著，
就算是當年的難堪，一切閒言閒語亦終將逝去，留下來的是繼續走下去的自己和仍然留下來支持你的人。
香港這數天經歷著黑暗時期中的極端，相比起share開心門票自拍、坤歌終於吐氣揚眉、學修不敵鳴煒，應該有些事情更值得留意，寫Twins除了被這場LOL感動了之外，也想提提大家和自己，難關重重，也要繼續向前走，可以選擇氣餒、放棄、絕望，但事實證明能夠繼續走下去面對的，才能笑到最後。
現在香港音樂事業不境氣，要再出現另一隊紅遍樂壇的組合，有機會，但很難，仍好她們還在；
就算同人講鐘意Twins一定俾人笑到喊出黎，我仍慶幸，做𡃁仔既時候經歷過Twins的全盛時期，和身邊那個不介意與你一起俾人笑既人，每次你唱一句，佢就接一句，
同你一開心唱飲歌，不開心唱飲歌，當中記錄我們這麼長大過。
就算50歲，我都會入場睇側手翻。