［老人x懸疑x諷刺］我在老登討論區追尋外婆死去的真相: 潛入老人院2.4

［各位公公婆婆小心，一個跟一個入去，小心啊。］義工身穿老人聯的背心於護老院外安排剛下車的老人家進場。

［各位，我係老人聯新界東立法會議員鍾國勁！各位老友記有咩需要可以同在場既義工朋友講！］鍾國勁身材健碩，膚色黝黑，年約四十幾多。他向每一位路過的長者揮手致意。

［阿靚女！我想食蔗！］其中一個婆婆向義工問道。

［阿婆，你有冇牙咬啊？番去飲蔗汁算吧啦。］自由人在我耳邊細聲說道，但笑聲卻傳遍老人院，惹得義工報以奇怪的目光。

［有有有，婆婆入場先，鍾議員會為你地安排。］





拖字訣，老人聯處理民生議題的慣常手法。

老人家一批一批被送進會場，參賽隊伍陸續抵達，漸漸會場外只剩下幾隊參賽者。

飛仔距離約定時間足足晚了半小時，撥打手機無人接聽，只有兩個人又沒道具的情況下如何表演？千載難逢的好機會難到要臨門泡湯？

［喂！俊哥！唔好意思遲左小小。］飛哥離開七人貨車，幾名臨時演員亦一同下車，他們身穿日本軍服。

［飛哥，你唔好話我知呢班就係今日表演既臨記喎。中日八年戰爭啊，你比班日本仔我托咩......］我忍不住指罵阿飛，將怒火發洩。





［俊哥，你又唔講清楚，我地公司係得日本軍服，其他借哂比大陸公司拍抗日神劇，你地將就下啦。］阿飛搖搖頭，燃點香煙無奈說道。

［大佬，你教我點做？成班日本仔啊，你係唔係驚激唔死入面班老人家？］