【絕望真相】- 《每次有好朋友失戀，自己都會有所成長》: 全文
因為你會體驗到咩叫無能為力。
你失戀單身無人陪，可以喺IG打「一個人都可以活得好好」、「喜歡清晨一個人跑自己的路」就算數，
但當你朋友失戀單身無人陪，而你又喺FB、IG見到佢暗地裏又明顯地以上獨白，身為好友你奮不顧身，懷住一顆好奇之心一問究竟，跟手就領野啦。
你會發現無論用任何道理、邏輯或者世間既所有語言都唔能夠同佢溝通。
因為我地往往唔記得，失戀既人總會認為佢唔係失戀，係失去左全世界。
而佢既世界，就係得一個人。
年少無知既你都會講過以下對白：
「唔好唔開心啦」、「搵過個好啲既！」、「你仲有我地麻」、「佢損失姐！」、「一早飛左佢啦！」
無論係真心又好吹水又好，你講完，就等如叫小朋友唔好喊、想自殺既人唔好自殺、每年頭定下既目標一樣，都係無乜效果。
當你第十次同佢分析條賤人係幾咁甩皮甩骨；條八婆係幾咁水性楊花，佢既答案都仍然係「我淨係想同佢一齊咋..」「點解佢要咁對我？」「我真係好鐘意佢架！」
今日回想每個身邊友人喊到死去活來既聲音畫面，仍然歷歷在目，好似網上流傳上唔到飛機瀨喺地下唔走既視頗一樣，每次睇返都係咁觸目驚心。
例如有一次，大學住宿舍，女性朋友發現男友出軌，零晨3點屈膝床上喊到死去活來，全層以為命案發生打算報警，最後喊到聲嘶力竭筋疲力盡先瞓到；
又試過第朝要交paper仲要present，而身為盡責學生既在下當然前一晚開始做，誰知好兄弟同女友罵交，然後我倆合力將一pack藍妹消滅，最後，個grade都被消滅。
又試過單拖去安慰一位拍了4年拖然後被飛的女生，於屋村公園散步，表面異常平靜，心諗應該行多陣收工走人，誰知竟然毫無先兆下突然淚散人前，果一刻黃河缺堤既震撼，令到四周伯伯嬸嬸都應該認定在下始亂終棄，最後被女友人喊濕左個頭(膊頭)，用左一包Tempo，然後約左第朝做義工—即係將佢屋企所有男朋友贈送物件捐俾有緣人，然後有緣人即係在下..
「面對面係難搞啲架啦，傾電話麻」俾你估到就唔係食神啦，法印都教落，世界係好難捉摸既。
有一次與好兄弟均身在異地，然後佢竟然向友友提出分手，今次佢飛人，無事啦？
錯啦！錯就錯在行仔同佢前度相熟，女孩竟然千里尋親咁skype流落異鄉既小弟，想知佢男友何而恨下心腸，雖然有聲無畫，但從她嘶啞既聲線加上間歇既飲泣聲，除左沉默，我都發出唔到其他聲音。
面對瘋狂朋友話要喺前度屋企留下等天光既情況，基本上更加無計可施。
一晚又一晚徹夜無眠，一次又一次被途人歧視，看著他們絕望傷心的眼神，通透的眼淚帶著模糊的心情，臉容呆滯，口唇劇震，口水鼻涕激射而出，喊到楊怡乘胡杏兒咁樣，唔講以為有白事、世界末日或者炒燶Iphone。
你可能會話「超，唔好理佢咪得囉」
無錯，佢地每次都係咁噚， 勸佢地向前看、生命多美好，講到爭取普選咁悶，望住佢面容扭曲、一蹶不振，已經想大巴大巴咁煎埋去，有時，更加有謀殺佢佢念頭...
然後終於有一秒，你覺悟到無論做啲乜，好似紫霞仙子咁講，飛蛾總係會撲火，點都改變唔到佢覺得空虛覺得寂寞覺得凍呢個事實。
丟低佢地唔理，絕對係人之常情，全中國無人話你錯。
但係就算理性地心裏明白，感性既我地仍然會第朝返早，夜晚十點聽到佢話想飲杯野，跟手就義無反顧飛的仆出去。
因為「朋友我當你一秒朋友 朋友我當你一世朋友」
就算經歷幾多次「娘子出黎睇耶穌啦」，我地都希望陪住身邊好友捱過呢斷任性、唔理性既低谷，相信黑暗過會是晨曦。
曾經聽過朋友話，一生人，總會遇上一段令你好迷戀、完全喪失理志既關係，唔知究竟係我好彩，定我啲朋友唔好彩，身邊友人總係咁難捨難離，哭乾眼淚。
或者果一刻，佢地最需要既唔係咩有道理既對白或者建議，只係一張熟悉既面孔同緊緊既擁抱。
重新適應一個人既生活，重新習慣沒有了他/她的世間，原來可以好難。
但結果會係點？我唔直接答你，我用例子答你。
今日果班蛋散，有人拍緊拖，有人再拍拖再分手變成享受單身，有人定左婚，有人結左婚，有人連仔都生埋黎緊仲有個女，有人仍然沈溺迷失於這場愛場遊戲當中；
社會每日也在強逼我們成長，實情成長其實唔難，最困難既反而係保持初心。
仆低左，順便抖下，再拍兩拍個膝頭，繼續上路。
個道理全人類都明，只係一旦失戀既係自己，智商可以低過某啲官員。
若然，你又有好朋友失戀，喺心入面暗小佢三十次之後，唔好放棄佢，佢總會有一秒明白，仍然在呼吸都應該要慶賀；
而剛剛失完戀既你，要好好多謝，仍然忍手唔一巴刮埋黎既生死之交，果份體諒，唔係咁易架葉師父。
逆行@