我在香港做殺手的日子: 11 滿天星初現

「連韋爺都唔係你對手，果然唔簡單下，證明大雄哥冇睇錯人。」
 
「不過好打又有乜用啊，宜家呢個年代最緊要都係要食腦。」橋王賈先生說。
 
「要殺就殺，唔使喺度講咁多廢話。」Hugo撐著剩餘的氣力說。
 
橋王賈先生冷笑一聲。
 
「要殺你容易，但我哋冇諗住殺你。」
 




「太子區一直都唔係我地木子長弓既重點地區，興義竟然出動到黑虎丁韋同賈先生親自帶隊，原來係另有目的。」
 
「冇錯，我哋今次嘅部署除咗係想將你同你啲人馬調離油麻地之外，我哋仲有一個目的。」
 
「咩目的？」Hugo問。
 
橋王賈先生托一托眼鏡說：「我哋想你加入興義。」
 
Hugo大笑：「哈哈，你哋憑咩要我加入你哋嘅。」
 




「如果你加入宜興，我保證你嘅前途一定比而家好。」　
 
「笑話，有邊個吾知興義係最講論資排輩，如果話有前途，我諗廿年後可能係既。」
 
橋王賈先生面有難色，Hugo的確說中了他心中所想。
 
橋王賈先生淡然一笑：「總比你而家係油麻地做個頭目仔好。」
 
Hugo悶哼一聲：「郁手啦。」
 




橋王賈先生再次提起手槍，指向Hugo。Hugo閉上眼睛，似是放棄反抗。
 
「嘭～」一聲槍聲。
 
不過，Hugo 卻沒有任何損傷，連他自己也感到錯愕，頓時睜開眼睛。
 
只見橋王賈先生原本拿槍的手出現一道血痕，橋王賈先生用另一隻按著傷口，原來的手槍掉在地上，賈先生怒叫：「係咩人！」
 
話未說完，一枝枝如流星雨般的飛刀從天而下，而且每一枝飛刀都是剛勁有力。興義幫大部份人都被這突如其來的飛刀擊中，主要以手和腳部中刀居多。
 
夾雜着恐懼的慘叫聲如雷貫耳，突然一個人影衝進人群，以敏捷的身手把Hugo枱上肩膊，然後迅速直走。
 
此人不是誰，正是陳勁。剛才的飛刀雨正是陳勁「滿天星」絕學中的「流星劍雨灑滿天」。
 
###




 
陳勁背著Hugo到了一個無人的地方後，將他放下讓他歇息。
 
「係你？ ！」Hugo氣弱如絲地說。
 
原來Hugo正是當日陳勁於油麻地果欄遇到的那人，陳勁見他被人圍攻多時，仍堅持着不投降，出於欣賞，因而出手相救。
 
兩人可謂不打不相識，在Hugo的指示下，陳勁撐扶著他到了木子長弓經營的黑市診所。
 
Hugo經過治療和一天的休養後，元氣逐漸恢復。
 
「原來殺細雄既人係你。」躲卧在床上的Hugo對著陳勁說。
 
「你點知係我？」陳勁一臉愕然。
 




「哈哈，果晚我遇到你之後，第日就話興義既細雄死左，我就估係咪你做。加上尋晚你用既飛刀，咁岩傳聞細雄死果陣心口又插住把飛刀，咁除左你，仲會係邊個。」
 
「其實我冇諗住殺佢，而且出手都吾重。」
 
「吾緊要啦，興義既然將呢筆賬算左落木子長弓頭上，再加上你尋晚又用飛刀救左我，細雄既死已經當左我地做架啦。」
 
「木子長弓？」陳勁問。
 
Hugo見陳勁對江湖事一無所知，便對他詳細講解了江湖上三個社團的關係，和昨晚衝突的因由。
 
Hugo 因陳勁對自己有救命之恩，又見其出色的身手，並邀陳勁加入木子長弓。然而，陳勁雖知Hugo是個有情有義之人，但由於尚有父仇在身，因此惋拒了Hugo 的邀請。
 
陳勁簡單交代了自己從外地而來的身分後，便向Hugo打聽文迪的消息。
 
「文迪？！」Hugo摸摸下巴。




 
「冇聽過呢個人喎。從來都冇聽過興義有個叫文迪既人，同埋你話佢十幾年前已經做到分區話事人，興義咁講年資，宜家點都已經係叔父輩，如果係，我一定識。」
 
陳勁一臉失望：「吾緊要啦，可能佢已經改名換姓，你就當我冇問過啦。」
 
陳勁見從身Hugo身上亦打聽不到文迪的消息，只好推倒重來，再尋找其他方法。
 
而Hugo 方面，Hugo本身是木子長弓油麻地的一個頭目，由於功夫出眾，而且有勇有謀，為人又講義氣，早就薄有名氣，再加上救援太子一役後更是聲名大噪。
 
Hugo康復後，名聲漸盛，投奔他門下的人愈來愈多。在半年後，他經過周密部署，策劃了一場對興義幫的大規模反擊戰，成功收復了油尖旺三區的控制權，Hugo亦順理成章成為木子長弓油尖旺的話事人。
 
待續⋯⋯