90後的初戀——五十年後嘅我，叫我向佢表白。: 【四】

【四】
 
星期一翻到學校，我先醒起錯過咗表白嘅限期。而筆記亦冇再顯示新嘢。
 
「喂，你哋知唔知啊？我今日見到曹大志同黃子霖一齊翻學啊！」啊俊一翻學，就拉住我講。
 
「我知，佢哋鄰居嚟架嘛。」我好失落咁講。
 
「嗯？有人呷醋喎？」啊俊不懷好意咁望住我。
 




「諗咗去邊啊？我同黃子霖都唔熟。」
 
「真係？仲諗住叫你睇實啲黃子霖添，曹大志份人好MK架，之前好多女朋友，又成日唔翻學去咗玩。你知唔知啊？我聽講，佢仲同黑社會……」
 


「陳世杰！」呢個時候，黃子霖突然從後拍我哋背脊。
 
啊俊望住我奸笑咗下，就好識趣咁閃咗人。
 




「啊俊佢做咩走咗去啊？我做錯嘢咩？」黃子霖一臉迷惘咁望住啊俊嘅身影。
 
「唔駛理佢啦，唔重要。妳搵我有事？」我尷尬咁試圖轉話題。
 
「係啦，我想問你，你鍾唔鍾意周杰倫啊？」
 
「周杰倫？」大鑊，我冇點留意台灣歌手，點搭嗲呢？「啊，有聽，好似有首歌叫回到過去？我幾鍾意嗰首歌。仲有……頭文字D囉，都幾好笑，仲有滿城盡帶……」好彩近排係茶餐廳聽咗周杰倫嘅歌，叫做講到兩句。
 
「哈哈，你咁搞笑嘅，又唔係考你面試，唔駛一輪咀咁數佢有咩大作喎。我係想問你，有冇興趣一齊睇不能說的秘密啊！」
 




「不能說的咪咪？好啊，好似幾好睇咁！」其實，我最怕就係睇肉麻嘅愛情片，不過為咗要同黃子霖打好關係，向佢表白，唯有應承佢啦。
 
「邊個話同你睇姐，曹大志呢幾日係MSN成日搵我吹水，原來佢都鍾意周杰倫，想約我去睇戲咋嘛。你覺得值得睇嘅，咁我就去睇啦。」
 
「咪住！」我叫住佢，想佢唔好同曹大志睇戲。MK仔果然係特別叻溝女，識人幾日就約到人去睇戲。
 
「嗯？做咩事？」
 
「我都想睇，妳同我去睇啦。」我一時激動，講咗出口，「呃，唔係，我意思係……」
 
「好啊。」佢似乎好開心我留住佢咁，個樣鬆一口氣咁笑咗出嚟。「星期六見啦咁。」
 
莫非，黃子霖其實係專登咁做，想我約佢睇戲嘅？

 




 
個幾日，我上網刨曬周杰倫嘅生平，同埋不能說的秘密嘅影評，為咗要同黃子霖多幾個話題，連電影入面有咩鋼琴曲都睇埋。點知，筆記簿係星期五晚，浮現「請你明天四時，一定要去油麻地地鐵站文明里出口。絕對要去。」
 
傻嘅，咁難得我約好咗黃子霖睇戲，梗係唔會去第二度。
 
「到咗好耐啦？」黃子霖依舊紥住馬尾，著住一條淺粉紅色嘅短裙慢慢跑過嚟。佢著住一對好高嘅鬆高鞋走過嚟，差啲跌倒咁撲向我身邊，我輕輕扶住佢，佢就紅都面曬咁講咗句唔該，然後鬆開我隻手。
 
「等咗一陣姐，入場囉。」
 
入到戲院，睇到路小雨去到未來，望見晴依錫湘倫個一幕，黃子霖就喊咗出嚟。隔離左右嘅人聽到子霖用力索鼻水嘅聲，都望咗過嚟偷笑。
 
於是我就俾咗張紙巾佢，右手試圖慢慢伸向子霖嘅背脊，想安撫佢。
 
「哎啊，爆谷……」子霖巧合地，係呢刻差啲跌咗大脾上面嘅爆谷落地，我嚇到即刻縮開隻右手。
 




之後成場戲，我哋都冇講任何嘢。去到湘倫發現小雨已經死咗個陣，子霖喊咗，而去到湘倫最後翻咗去過去搵小雨個陣，子霖又再喊多次。矮小嘅佢，係我身邊喊到成個人震下震下咁，果然真係好似一隻倉鼠咁可愛。
 
「點啊妳，喊足成場，有冇咁感動。」散場個陣，子霖仍然拎住張紙巾呻鼻涕。
 
「咁真係感人啊嘛……」佢紅曬嘅雙眼瞪一瞪我，繼續呻鼻涕，「慘啦，我個妝甩曬啦……」
 
我捉住佢，等佢企定定面向我。
 
「睇過？係喎，對眼喊到成隻熊貓咁喎！」
 
「真架？好醜怪啊……嗚嗚……」佢嚇到兩隻手捂實塊面，喊得仲勁咗。
 
「講笑咋講笑咋，唔好喊啦。」我拎開佢兩隻手，幫佢抹走臉上面甩咗出嚟嘅睫毛膏。
 
「陳世杰……」佢對眼目不轉睛咁望住我，「你平時對所有女仔都咁好架？」




 
「傻瓜，」我抹完，「靚翻曬，唔駛再喊啦。」
 
「唔掣啊，你快啲答我……」黃子霖撒嬌咁谷起塊面問我。
 
「淨係對妳一個好啊。」我好細聲咁講完，捏咗佢一下鼻。
 
「咁，如果我好似路小雨咁，好快就死，你會唔會好似湘倫咁搵我啊？」女仔就係鍾意問啲古怪嘅問題。
 
「嗯……咁我要學識彈鋼琴先喎……」
 
「咁你係咪即係會翻嚟過去搵我啊？」黃子霖好緊張咁問。
 
傻瓜，其實五十年後嘅我，已經叫緊我翻嚟搵妳啦。但如果咁樣講嘅話，眼前一臉天真無邪嘅佢，又點會信呢套。
 




「咁我哋之後點啊？一齊去食晚飯？」黃子霖見我呆咗唔答，就唯有轉話題。
 
突然間，我先醒起筆記簿叫我去油麻地地鐵站。不過如果係關於黃子霖嘅事，我依家都發展得好順利吖，有需要去油麻地咩？於是我哋直落去咗食晚飯，仲食埋松記甜品先走。