[絕對無糖分]就係咁，我搬左入一幢充滿一樓一嘅唐樓: １０６　油牆假期

其實要幫Ｄ咩我仲未知，我剩係知道事後舅父無點鬧我，佢都知我想幫佢係出要好心，但係佢係怕我搞出個大頭佛所以先唔叫我幫手。

……有少少好心做壞事感覺添。

如是者，最後舅父搵左間維修公司整好晒Ｄ電線，其實樓層都回復左光明。

而回復光明果一刻，亦都代表我要開始幫ＶＩＶＩ同小雨整Ｄ野。

係某日ＤＡＹ　ＯＦＦ，我見都已經入夜，ＶＩＶＩ同小雨應該停左接客，我就落去樓下搵佢地，行到佢地架步門口後，我㩒左佢地鐘仔，開門果個人係小雨，佢黑住面望住我，一開口就話：「如果唔係ＶＩＶＩ叫你幫手，我先唔會比你入黎。」



我望住佢無奈左笑一聲後，都唔知講咩好。

入到去，我見佢地呢個架步大個彩虹姐間房好多，應該係個雙人房黎，「妳呢度都幾大ＷＯ。」

小雨嗤笑左一聲後話：「呢邊係ＶＩＶＩ嘅，我架步係旁邊，平時如果要訓，我係會過黎ＶＩＶＩ呢度……喂！同你好熟啊！做咩要講咁多野你知！」

佢都仲係對我好不友善。

最怕世界突然安靜，仲要我諗唔到講咩好，直到ＶＩＶＩ佢返黎後，佢望住我地呢個咁尷尬嘅場面，笑左出黎話：「你地咁大個人仲要好似細路仔咁鬥氣？」



我無奈咁望住ＶＩＶＩ，我邊有鬥氣，我似係比佢針對……

而小雨佢話：「邊個叫佢講妳壞話，就係誣衊妳。」佢講完後對住ＶＩＶＩ扁咀，然後，我係第一次當面見到呢個畫面，我見到ＶＩＶＩ行到小雨面前，摸一摸佢個頭後，錫左佢咀仔一啖。

我真係第一次當面見到兩個同性ＫＩＳＳ！

而我呆住望住佢地表情比佢地見到後，小雨就話：「望咩啊，未見過打車輪啊。」

「小雨～乖，蕃薯無咩野，我都佢都ＦＲＩＥＮＤ㗎。」我見ＶＩＶＩ同我打左個眼色，我諗佢係想幫我解下圍。



然後，我而家先發現佢拎左好多野上黎，大部份都係油漆，而我問：「ＶＩＶＩ姐，呢Ｄ係？」

佢話：「最近我見有個位漏水，想補返佢同油油。」