[絕對無糖分]就係咁，我搬左入一幢充滿一樓一嘅唐樓: ４１　六合彩

返到上去，開門，今日罕見地個廱無人打麻雀，只係見到龍威哥企左係窗臺，食住口煙，背住我話：「返黎拿？」

……龍威哥佢係有後眼定係聽到我開門呢？

「係啊，返黎。」我話，然後慢慢咁行到佢身邊。

而佢，深深咁吸左一啖煙，呼出，我望住眼前煙霧迷漫下嘅家景……「係未好靚？」龍威哥問。

講真，搬左黎都有一段時間，我真係未試過企係呢度望住旺角夜空下嘅街景，仲係燈火通明，人同車雖然無下午咁多，但都唔算少。



「我每日做完野，都好鍾意企係呢個位同睇下夜景。」龍威哥話，然後佢係旁邊個半打啤酒中，拎左一罐比我。

我接過啤酒，然後問：「舅父佢地呢？」

「你舅父今日去左朋友屋企打牌，提子佢就約左個酒店妹開波，今晚唔返黎訓架拿，集種就去左佢老闆度傾下今個月Ｄ業績，應該好夜先返。」龍威哥答完後，就對住我拎起佢飲緊果罐啤酒，示意同我碰杯。

我即刻開左罐啤酒，兩個罐係旺角街景襯托下輕輕咁碰左一下，而龍威哥亦都終於入正題：「彩虹佢無事嘛？」

我飲左啖啤酒後答：「睇落無咩事，但實則唔太清楚。」



「佢有喊過？」龍威問。

「有。」我點一點頭。

只見龍威佢微笑左一下後話：「有喊就好，有時情緒都要舒發下嘅。」佢靜左靜後又問：「咁你呢？」

「我……」我諗左諗後答：「傷心，但未去到喊，複雜，而且有少少矛盾。」

「矛盾？」龍威問。



「本身以為伯伯仲有半年命，但點知佢咁快就去左，但係聽婆婆講佢係好安祥咁訓住去，又諗其實咁樣對伯伯係未一件好事，對佢家人又係未無左一種負擔。」我默默咁低下頭，因為呢件事，令我心中一直想起另一件事，諗諗下，我角睛開始糢糊……

原來，係我Ｄ眼淚。

「我諗緊，我阿媽趕我出黎，係未都係用呢一種心態，其實佢唔想趕我走，但我真係太廢，佢唔想我咁先夾硬要我搬出黎獨立下。」如果一種傷害，係令到全局變好的話，咁呢一種仲算唔算係一種傷害？

我聽到旁邊個龍威哥笑緊，但我知道佢呢一種唔係恥笑黎。

「大個仔架啦，有時有Ｄ野，係要衰到貼地果陣先會體驗到。」龍威哥話。

我忍住左眼淚後點一點頭。

我地兩個一直傾到飲晒Ｄ啤酒為止，到我要返房果陣，龍威哥問：「你封吉儀呢？」

我諗左陣，先記得原來比帛金果陣有回一封吉儀，記得係放左係褲袋度，「係度。」我拎左出黎後，龍威哥一手就拎左過去，然後拆開左封吉儀，將入面粒糖拋左比我，「你仲細，食糖啦。」



我聽到後笑左笑話：「咩野細，不知幾大。」

佢聽到後都笑左笑，然後又拎左放入裡面嘅５蚊話：「呢Ｄ錢唔留得低，用黎我地夾份買六合彩啦，中左兩份分啊。」

「好啊。」我回應，然後開左粒糖食後就返房。