【短篇/鬥智/無聊】關乎$1000利是嘅瑞士糖心理戰！: 第三章－傳統

可惜我只係摸過粒糖⋯⋯
好後悔頭先冇望下粒糖係咩色！
百得阿姨見到我困惑嘅表情，露出奸狡嘅笑容。
哦！佢就係知道呢一點，所以啱啱先叫停我！
　
阿姨左手攞住個全盒，右手攞住個蓋，咄咄迫人咁話：「快啲揀啦～唔揀就冇利是㗎喇～」
我靈機一觸，一手搶走阿姨個全盒蓋，然後冚埋個全盒轉幾個圈，再打開同佢講：「根據我哋家族嘅傳統，要主人家喺全盒攞一粒嚟食先。」
　
你有家族傳統我都有！阿姨當然唔想食到嗰粒過咗期嘅糖，喺唔認得邊粒打邊粒嘅情況下，佢一定會攞一隻安全嘅顏色，我只要跟佢攞同一隻色就得！
　




百得阿姨氣定神閒咁話：「好呀～」
　
然後慢慢伸隻手去攞⋯⋯
　
　
　
　
　
　
吓！！！




　
佢竟然揀咗剩係得1粒嘅紅色！
　
　
　
我嘅計劃失敗咗⋯⋯
　
　
百得阿姨打開糖紙，將粒紅色嘅瑞士糖慢慢放入口，一邊㗳一邊奸笑，用夜神月嘅表情同我講：「到你喇～」
　




　
跟住落嚟仲有6粒糖：
3粒綠色、2粒紫色，1粒橙色。
1/6機會！實在太危險喇！
　
好彩！我仲有一位救星⋯⋯
　
表哥～～～～～～～
　
佢頭先有望過粒糖！
　
我望向表哥，尋求指引⋯⋯
點知，佢竟然喺褲袋攞咗包花生出嚟剝，完全冇打算提我！
　
估唔到表哥份人咁賤格！於是，我唯有主動出擊～




「等等先，根據我哋嘅家族傳統，要順住輩份咁攞糖食，阿姨食完，到表哥食一粒先，最後先到我～」
　
百得阿姨若無其事咁話：「好呀～」
　
表哥伸隻手埋去，攞咗一粒綠色糖！|
　
有救喇～我即刻攞起另一粒綠色糖～
　
點知，百得阿姨大力冚埋個蓋，一嘢夾住我隻手！
「哎吔！！」我手上粒綠色糖應聲倒下～
　
百得阿姨打開個蓋，收起剩返嗰兩粒綠色糖，用陰險嘅聲線同我講：「根據我哋嘅家族傳統，有人攞完綠色，你就要攞另一隻色！咁樣新一年先會多姿多采～」 
　
諗住靠表哥幫手，反而收窄咗我中招嘅機會！
而家得返2粒紫色，1粒橙色，1/3機會！




　
「攞橙色丫～橙色好食呀～」阿姨微笑住咁講。
　
佢想我攞橙色，咁我攞紫色就安全啦～
但佢估我會咁諗，所以過期嗰粒其實係紫色！
但佢又會估到我會咁諗⋯⋯
救命呀！究竟佢想我揀邊隻色呀！？