（有感情有甜）半年的我: 入世未深2

我無再搵m先生，雖然無block佢，但我都唔expect佢會再搵我，所以件事我當完左。
你問我有無唔開心？有，因為我有放個心落去。點解我明知係遊戲都仲放個心落去？因為我仲係好單純。係，我仲係好單純。永遠唔好覺得自己已經好成熟，學左好多野，往往呢個時候先仲未係成熟。
無錯，我仲未識玩呢個遊戲。我好記得我家姐同我講既一句說話：【你出得黎玩就預左，玩唔起就唔好出黎玩，唔好玩完就係到喊到七彩】
無錯係好mean，但的的確確係事實，我家姐的確無講錯。自己唔玩得又要貪玩，玩完又要喊，喊黎把撚？喊完就好收聲喇，宜家無人會理你生定死，定係刀仔吉大髀，所有野都係自己硬食架喇。頂唔順？一係唔好玩，一係繼續捱。 你可能覺得我犯賤，話我攞苦黎辛無得怨天尤人。可能係啦，咪當自己提早 冚頭埋墻，認識下呢方面既世界係點。


斷左m先生既contact之後，我當然有繼續約人。越約越多人。你問我個陣知唔知自己做緊咩？宜家既我可以答你我根本唔知自己當時做緊咩，但如果用當時既我黎回答你既話，我係想麻痺自己。每次同人做既時候都可以暫時忘記唔開心既感覺，凈係個一刻想有人陪，想要被需要既感覺，宜家諗起的確唔知自己個陣做緊咩。但慢慢我就發現，無論我約幾多個人，我都係得唔到我想要既心靈慰籍。甚至我個陣明明知道自己身體上根本無任何慾望，我都依然走出去赴約。個陣根本就係一個無靈魂既空殼，係空殼。

我好記得有一次，我約左一個人，我同佢搞既時候根本就唔想面對面咁望住佢，我選擇背對住佢，因為我有恐懼。無錯，身體可能係有快感，但心靈上有既只係恐懼。所以完事之後，我就話我有急事借機急急腳咁走左。個男既wechat問我咩事，我凈係叫佢唔好問，隨之而來既係更大既恐懼，之後我索性block埋個男仔。因為個一刻，我好驚。。。好驚。。。點解我會驚？我到宜家都唔知點解。。。



到後來我又遇到另一個男仔。。。。佢似乎幫到我少少，因為佢好似一個大哥哥咁樣，有一種可以做到朋友既感覺。