【內心獨白散文】《陋室手記》: 〈關於隱蔽這回事〉

〈關於隱蔽這回事〉
 
隱蔽。隱蔽係一個好有魔力嘅詞語。
 
早幾日我喺網上睇到有關隱蔽青年嘅短片，令我忍唔住反思自己嘅現況。我喺網絡上尋找有關隱蔽青年嘅定義，然後逐項測量自己。
 
最常見嘅定義，就係三個月賦閒在家，拒絕社交嘅處境。另外常見嘅徵兆包括失業失學、對事情感到無力、自我評價低、前路迷惘、情緒低落、沉迷上網……
 
過往嗰三個月，確實十分切合隱蔽生活嘅定義。但而家嘅我呢？而家嘅我總算回復正常生活，喺寫文方面尚算活躍起嚟，但依然冇讀書同做嘢。我感覺到以前嗰團火，佢仲係到燃燒緊。同以前唔同嘅係，經過沉澱嘅思緒，令我對而家嘅處境更加處之泰然。
 




唉！點解我會諗咁多嘢，不斷說服自己唔係隱蔽青年呢？唯一原因係，我都覺得自己似係隱蔽青年，或者我有機會成為隱蔽青年。
 
哈哈！估唔到，我從內心深處係咁樣睇自己。不過諗深一層，我確實難以為現時處境作出解釋。如果要形容而家我嘅處境，大概係一個抱有目標，不斷向前，但又未有任何進展。
 
如果我而家嘅處境可以用成功或者失敗嚟定義，就好似打機咁，唔係贏就輸，可能一切會更加明確。或者未有成果就算係失敗啦！好多人都係以成果判斷一個人嘅付出。
 
但我更相信，我只係未有進展，而唔係失敗。不過就算蔽，咁又點？
 
人係需要畀一段時間自己，去隱蔽，去思考。呢個係成長嘅階段。尤其是係準備踏入社會嘅畢業生，更加需要時間好好認識同了解自己，諗清楚自己嘅方向同目標，將來想從事咩行業，想過啲點樣嘅生活，好好計劃人生。而最重要嘅係，搞清楚自己嘅人生哲學，唔好糊呢糊塗噉過日子。
 




唉！不過可惜嘅係，喺大部分人眼中，後生仔唔係讀書，就係做嘢。父母同社會，根本唔會畀我有喘息嘅空間。佢哋只係識不停壓迫，不停催促，令我係抖唔到氣嘅情況底下渾渾噩噩噉過住所謂正常嘅生活。
 
然後呢？我冇思考嘅空間。直到感覺到自己好攰啦，好攰啦……先茫然若失。原來自己從來冇為自己活過。
 
唔通好似其他人咁每日淨係識得做做做先算係正常？隱蔽一段時間比自己認清人生真係咁唔正常？
 
我知道自己而家嘅處境唔好，但我覺得後生係需要時間去沉澱內心。當我處理唔到內心嘅鬱結，無論讀書定做嘢，都冇心機同動力。到最後做錯啦，做唔到啦，又俾人白眼。
 
到底幾時社會先睇得清呢個惡性循環？幾時先可以擺脫唔係讀書就係做嘢嘅諗法？幾時先會畀時間，畀空間，等我哋沉澱內心，發展自我？