【內心獨白散文】《陋室手記》: 〈追求。放棄。〉

〈追求。放棄。〉
 
夢想。夢想。
 
夢想曾經係我嘅追求，係我嘅動力，係我嘅信仰。但而家每當諗到夢想兩個字，就只有莫名其妙嘅惶恐。黠解當時嘅我會咁愚昧？夢想實在係唔掂得。
 
年輕人都有發夢嘅時候。總會諗住有一日自己達成目標，邁向光輝嘅未來。我都曾經將「夢想」兩個字掛喺額頭上，成天困喺房間裡嘅「追夢人」。父母唔清楚我做緊咩，亦唔好意思過問太多，只好由得我。
 
不論報章雜誌、電視電影、書本、網絡，各大小媒體都喺到販賣夢想。我好鍾意睇到其他人追夢成功嘅例子。Steve Jobs也好、Bill Gates也好、Mark Zuckerberg也好，都曾經令我嚮往。
 




我睇見人哋嘅成功，就會幻想兩年後嘅自己，西裝筆挺噉企喺鎂光燈下接受大眾嘅拍掌。呵呵，無可媲美嘅暢快！成功感、滿足感、虛榮感、控制感、權力感，一切都喺心裡湧起。
 
我曾經好有自信，相信自己嘅文采一定比網絡小說作者好，甚至達到專業水平。我相信自己係與眾不同，其他人做唔到嘅事，只係因為佢哋能力不足，但換着係我，就一定能夠達成。
 
每次打開電腦寫文，我都會感到自己係出色嘅作家。我寫嘅東西一定會有好多人睇，會有好多人讚好，會有伯樂相中我呢匹千里馬，甚至認為呢一切都係理所當然嘅事！
 
哈哈！幾咁好笑，幾咁自戀嘅爛泥。失意時總係安慰自己話希望在明天，遇上困難就只會為自己搵藉口開脫。咁樣嘅我就漸漸走入咗自欺嘅掘頭路。
 
最可怕嘅係，活喺夢想虛幻之中嘅我，根本識知唔到呢一點，甚至更加泥足深陷，不能自拔。
 




天呀！醒下啦！世間上邊有咁多成功嘅人。傳媒當然會採訪成功嘅人，因為佢哋有報導價值。平凡人呢？咪又係每日安安穩穩、心為營役噉重複每日生活。呢班人遠比成功嘅人多啦！成功人士嘅曝光率高先會造成眾人皆成功嘅假像。
 
成功嘅自信喺邊到嚟？我真係與別不同？咪自以為是啦！得閑四圍行下，或者同朋友聚會，就會發現比自己勤力一百倍嘅人比比皆是，比自己叻嘅人更加係多不勝數！
 
唔好再睇成功嘅例子啦，呢啲只係自我催眠。只係睇符合自己世界觀嘅資料，但係對多如繁星嘅反證視而不見，自欺欺人。只相信自己所相信嘅，又狂妄自大，只會沉溺喺自己造成嘅烏托邦！
 
放棄。放棄。
 
而家我先發現以往嘅自己係幾咁幼稚、任性、自我中心、自大、輕狂。難免呀！後生呀嘛！呢啲正正就係成長必經嘅階段。
 




追夢係件幸福嘅事，因為每天都過得有方向同充實。但係認清自我嘅虛惘後，要放棄並非易事。
 
曾經每日夜晚都幻想自己達成目標、為寫作而煩惱、匿喺房間寫文，或者喺圖書館睇成日書。呢兩年嘅時間唔係話放低就放但。一方面自己付出愈多，寫作呢回事就主觀噉變得更有意義。另一方面，係覺得放棄就等於浪費時間。
 
呢啲沉沒成本係無辦法追討嘅。理智向我說明，如果繼續不切實際噉沉淪落去，損失嘅會比而家更多，但規避損失嘅本性又令我痛苦萬分。
 
實際上我嘅寫作能力係幾咁拙劣，我係好清楚嘅，你哋都有目共睹。只係自己唔願意接受呢個殘酷嘅事實，但又唔由得我唔接受。夢想於我而言，係極度痛苦嘅事。
 
唉呀！講到尾，諗咁多可能只係想同自己鬥氣，或許係搵緊藉口逃避現實。
 
我唔係話追夢唔好，但千其要三思而行，唔好俾社會、自我蒙蔽，任性妄為，最後落入痛苦嘅圈套。
 
未來難料，而家嘅我又進退維谷，睇嚟自己比自己想像中仲要懦弱。