「謊遊記」 如來設局始西遊 輪迴百世還未休: 「謊遊記」角色人物專訪 1 百眼魔君

「謊遊記」角色人物專訪 1 百眼魔君

四月：大家好，我係「謊遊記」嘅作者陳四月，好感謝巴打們支持這故事，「妖氣報告 第一季」完結後我休息咗半年，再寫呢個新故時，其實我係幾淆底的⋯⋯但反應俾我預期嘅好好多，再次感謝大家追看。

以「西遊記」改篇嘅後續故事「謊遊記」
，一切由謊開始，故事入面打鬥劇情都相當多，有交打就當然有得拎便當啦，馬上邀請係故事入面第一位拎便當嘅Boss級人物，腳出來了腳出來了腳出來了～百眼魔君！

百眼：只差一點，我就能吃掉這一代的唐三藏，哼！

四月：你都癡線嘅，你食得到咁個故完得啦，差一點，挑～





百眼：我乃黃花觀金甲多目蜈蚣，妖界第一毒師，七蜘蛛的喔巴⋯⋯

四月：你收番埋d眼仔先！我有密集恐懼症架！你咁睥住我我好不安架！講開七蛛妹，有讀者好好奇一個問題，七蛛妹叫你喔⋯⋯應該係師兄，咁你師父係乜水呢？蛛妹又係咪同你同門呢？

百眼：我在泰山道場修行羽士煉丹之道，斗姆元君正是我的恩師，七蜘蛛⋯⋯只是我在黃花觀盤據時認識，住在盤絲洞的後輩。

四月：泰山道場？咁似玩pokemon go嘅⋯⋯如果搞個西遊記go搵波掟你可能都有得做⋯⋯咁斗姆元君咩來頭呢？呢個其實西遊記原著中就無咩講過嘅，google大叔話斗姆元君，係道教地位相當高嘅女神，亦係北斗眾星之母，屬於第二級別既大神。

咁跟得名師補習嘅魔君兄，點解你又癡埋d女女到咁傻豬，唔同d勁d嘅妖精聯手呢？





百眼：你係我，會選擇七個女女，定一個高手呢？

四月：咁緊係⋯⋯七個女高手啦⋯⋯即是話你衰咸濕！手多多！係呀你百足咁多爪一定好多手呀你！

百眼：妖精之所以集結，為的是唐僧肉，大家也想貪得更大份，所以越強的妖精越喜歡單獨行動，而且還有一個重要的原因。

四月：賣咩關子呢，講啦望x100。

百眼：強大的妖精聚集，那薰天的妖氣會被天庭發現，引來成千上萬的天兵，我們這二千年來也積極避免這樣的事情發生。





四月：下一條，百足有咁多對腳，咁到底你屋企有幾多帶鞋呢？腳部護理咪要花好多時間？磨死皮都恐怕要磨半日啦！剪腳趾甲咪好Q大鑊？

百眼：百眼魔⋯⋯

四月：講開你嘅大招「百眼魔光」，不得不提下係原著之中你老哥係幾咁令人尷尬⋯⋯

百眼：不⋯⋯不要說！

四月：『剝了衣裳，把手一齊抬起，只見那兩脇下有一千只眼，眼中迸放金光，兩脇下噴出黄霧，十分厲害。』仆你個街⋯⋯咁咪即係「格肋底射線」！

男人老狗係到show格肋底出黎！你知唔知醜架！俾d咁嘅嘢射中仲唔定哂形？

所以係我改編嘅百眼魔君，多左石化呢種打機常見嘅元素。將道士變為醫生，令人無語嘅格肋底眼改係身體各部位，如果唔係，d師妹搵你求助嘅時候你一嘢show格肋底出黎，真係幾唔好意思呢⋯⋯做咩啫你，激光脫毛代言人咩？





百眼：我要殺掉你！

四月：天真！經過妖氣報告嘅考驗你以為我仲係普通嘅四眼仔呀！公雞陣！

（四月打開背後大門，大量公雞蜂擁而上，百眼魔君驚惶失措。）

四月：蜈蚣的天敵，係公雞，原著西遊記中百眼魔君最終被毗藍婆菩薩以昂日星君（二十八宿嘅公雞）眼中煉制的綉花針收服。

感謝大家支持謊遊記，係人物專訪到我希望俾大家多d同原著有關嘅資料，大部份除咗係我對原著嘅理解，其他都係網上搵嘅資料，如果有d資料我搞錯了，希望熟悉嘅巴打幫忙糾正。

故事第一篇，以蜘蛛精同蜈蚣精為首嘅百眼魔君篇已告一段落，第二篇白骨夫人都係大家耳熟能詳嘅白骨精，但係謊遊入面，白骨夫人篇仲有一個特別嘅人物出現，墮落神將奎木狼，關於呢兩個人物嘅原著故事，下個角色人物專訪再同大家分享。


角色人物專訪1 完