[傷感愛情] 無語問蒼天: 第三十四章 - 久別重聚

淑嫻終於都出院嘞, 經倩宜嘅協助, 淑嫻馬上就安排佢媽媽進入私家醫院度進行心臟手術, 好好彩地, 手術終於都成功左, 幾日之後, 淑嫻亦已經響中環度搵到份新嘅工作黎開始佢嘅重過新生嘅生活。

呢一日, 我同老細朗奴傾完公事之後, 朗奴同我正在閒話家常, 我同朗奴講起上次夜晚響街度唔知咩原因比人打果件事, 朗奴諗左一陣, 跟住就同我講出左遇到淑嫻嘅事同埋我被打嘅原因, 朗奴同我講, 「就係因為咁, 果排我特意請左兩個退左休嘅踞架兵暗中貼身保護你, 另外我亦派左私家偵探去查吓國宏果便, 不過而家你可以放心, 聽講果個國宏而家已經離開左香港, 短時期內佢都唔敢再響香港呢度出現架嘞!」

我懶理國宏啲事, 反而我最著意聽到朗奴講及淑嫻嘅一切, 原來淑嫻係為左咁嘅原因而去出賣自己, 我再諗番起一幕又一幕淑嫻嘅情境, 跟住個心就開始有啲覺得內疚同唔舒服咁。 

重返正常生活嘅淑嫻, 終於亦都搬番去屋企度同佢家人一齊生活, 呢日放工之後, 淑嫻正在番屋企途中, 已經行到去村口之內, 突然, 一把熟悉嘅聲音正低叫住佢, 「淑嫻….」

我已經響村口呢度等左淑嫻好耐, 淑嫻見到我後正一面愕然, 跟住我地就正在對望住之中, 我行上前, 「淑嫻…, 妳…幾好嗎?.」淑嫻隔左一陣先點一點頭, 「偉倫, 你…都幾好嗎? 係呢, 聽陳太講, 你已經升左職同搬左屋喎, 我…恭喜你先!」 淑嫻伸左隻手出黎, 我亦緩緩咁伸手同佢握住, 「多謝….」



我再同淑嫻講, 「係呢, 妳媽媽個病, 係咪…已經好番哂架嘞?」 淑嫻亦都點左一吓頭, 跟住淑嫻再問我, 「係呢, 你同你女朋友…都幾好嗎? 啊, 對…對唔住, 我唔係有啲咩特別嘅意思, 我只係…隨口問吓你咁啫!」 「我地…都幾好呀, 係呢淑嫻, 咁妳……」 「我男朋友都對我好好呀, 不過今晚佢有啲事, 所以佢先至唔得閒陪我番黎咁啫!」 「哦….」

我同淑嫻邊講邊送佢番屋企途中, 我地又經過發叔間士多度, 「喂, 倫仔, 淑嫻, 嘩, 好耐都無見你地嘞, 你兩個咩仲係行緊呀? 喂, 咁你地幾時先至結婚呀? 發叔真係由細睇住你兩個大, 話時話, 呢度真係幾多細路都係比我睇住佢地大, 睇住佢地結婚同做老豆老母咁架!」

我同淑嫻有啲尷尬咁向住發叔笑左一笑, 「喂, 倫仔, 又係咁樣, 度閘又有啲 kick kick 地咁, 我而家又係要趕住上樓煲藥, 倫仔, 你可唔可以又再幫我整整佢呀? 嗱, 一陣又係自己去雪櫃度攞汽水飲, 唔使客氣呀!」 講完發叔真係走左上樓去, 我又如常攞左啲架生黎幫發叔整閘, 又係唔使一陣就已經搞掂左, 整完閘後, 「淑嫻, 不如我地入去飲支汽水先走啦, 好唔好呀?」淑嫻諗左一陣, 跟住亦都點左一吓頭。

我關左度閘, 跟住再響雪櫃入面攞左兩支汽水出黎, 呢次我就自覺地放低左啲汽水錢響雪櫃面上, 「淑嫻, 我仲記得妳曾經話過, 人地係做生意嘅, 我地點都要比番錢人嘅, 但除左呢樣, 其餘以前我地開心嘅日子, 我都仲記得好清楚, 嗱, 呢支係妳嘅!」 淑嫻苦笑住咁接過我支汽水。

我地兩個人並排咁坐響士多入面靜靜咁飲住汽水, 飲左一陣, 「淑嫻…」 「偉倫…」 兩個人同時叫住對方, 我地互望住咁笑左一笑, 「妳講先啦淑嫻…」 淑嫻開始吞吞吐吐咁講住, 「偉倫…你係咪…仲好嬲我呀…?」 我即時搖住頭, 「無, 淑嫻, 我而家無嬲到妳不特止, 應該話, 我以前仲係嬲錯左妳, 其實我都係想問, 果晚我咁樣鬧妳, 妳仲有無嬲到我呀?」 淑嫻低頭望住手上支汽水搖一搖頭。



又靜左一陣, 我忍唔住再問淑嫻, 「係呢, 你男朋友響邊度識架? 佢對妳…有無以前我對妳咁好呀?」 淑嫻點一點頭, 跟住就好似有啲激動咁話, 「好, 佢對我好好, 佢好錫我, 識佢咁耐, 從來佢都無鬧過我, 我而家啲生活過得好開心, 真架偉倫, 我真係覺得好開心架!」
 
但從來眼睛係唔會講大話, 呢一刻, 我望到淑嫻閃爍中嘅雙眼正顧左盼右咁, 但我就無出到聲。
 
第三十四章圖述



偉倫正等待住掛念中的淑嫻