[傷感愛情] 無語問蒼天: 第二十七章 - 大難不死, 情花突開
公司內, 哦……., 我呆呆咁做住野, 同事們仍繼續響我背後恥笑住我, 電話響起, 係客人打黎約我一陣食飯時間要落去上次見到詠欣果個商場度傾野, 妖, 又阻住我食 lunch 嘅時間, 商場之內, 同客人正在傾緊推廣會啲埋尾嘅有關細節, 客人要求商場頂上果幅掛飾需要拉番過啲, 我同在場嘅文師傅交帶住, 文師傅話, 「OK, 咁小事無問題啦, 即刻同你上去搞掂佢!」
文師傳開始爬上呢個高空鋁架上, 我向住佢大嗌, 「喂文叔, 個架不如先推去果便你至爬上去啦!」 文叔邊繼續爬邊同我講住, 「個架要成幾個人先至推倒過去, 推得黎都蚊瞓啦, 我上去沿住啲邊位行過去都唔使一陣就搞掂啦, 得架嘞倫仔, 你放心喎!」
呼, 真係固執, 我繼續同個客傾埋啲細節, 但唔夠一陣, 隔離有人指住商場頂上大嗌, 「嘩, 個呀叔就黎跌嘞!」 我望吓上面, 嘩, 咩咁大鑊呀, 我見倒文叔正凌空單手掹住商場頂上啲邊位, 佢似係失足咁跌左開去咁, 我見事態嚴重, 跟住即時就大嗌, 「文叔, 頂住呀!」 死嘞, 點呢點呢? 個架搬得過去, 文叔都已經頂唔順就跌得落黎, 唔理嘞, 爬上去掹住佢先再算。
我嘭嘭聲咁爬上鋁架, 上到頂處, 我即時就知道原來個危險程度係有幾大, 呢度好高, 而啲邊位又咁窄, 但情況危急, 而家已經唔係我要驚嘅時候, 我小心奕奕咁向住文叔方向行去, 文叔已經開始有啲頂唔順咁, 我見咁樣, 唯有就保持平衡繼續嗱嗱林地加快腳步, 「文叔頂住呀, 我好快就到架嘞!」
但文叔已經筋疲力盡咁, 「倫仔, 我….頂…唔…順….嘞…」 文叔四隻手指開始逐漸鬆脫, 而呢一刻我就盡最大努力咁衝住埋去, 文叔終於都支持唔住, 但就響佢四隻手指鬆脫嘅同時, 千鈞一髮, 我及時飛撲埋去就及時扯住文叔佢隻手腕, 我發哂狂咁大嗌住, 「頂住呀文叔!」
我博哂命咁扯住文叔, 死嘞, 邊位四圍都無位借力, 而我亦比文叔嘅重量開始愈扯愈出, 已經半隻腳凌空住, 下面啲人亦已經開始推緊個鋁架過黎, 正當我同文叔處於危在旦夕之際, 下面嘅人群之中, 有個女仔正望到個心已經跳左出黎咁滯, 見佢正掩住咀咁不停地喊住, 「偉倫唔好呀, 偉倫, 嗚…..」
仆街嘞, 我已經愈扯愈出, 「文叔, 我頂唔順嘞, 我要 thing 你埋去, 你就用果隻手掹住個邊位先啦!」 我開始 thing 住文叔, thing 左幾野, 文叔終於都掹到個邊位, 但我同時亦失去平衡咁跌左開去, 「嘩….」下面人群緊張到大嗌, 我眼明手快, 好彩及時亦能夠伸手掹番倒個邊位, 但下面啲人就已經嚇到正不斷大聲尖叫住。
文叔同我正各自奮力單手支持住, 但只要一鬆手, 以呢個高度跌落去, 我地可以講係就算唔跌死都會跌到斷骨, 「文…叔, 頂…住…呀! 個…架…就…到…架…嘞!」 下面啲工友繼續大嗌住, 「快啲嘞, 快啲嘞, 佢地兩個就黎跌架嘞!」 工友們已經將個鋁架推到埋黎, 我等唔切好快一腳踏就住個鋁架, 跟住我再火速擒到過去就緊抱住文叔條腰, 其他工友亦陸續爬緊上黎幫我手, 呼, 終於都無事嘞。
啱啱至爬落番落地面度, 但好快就有個人衝到上前就係咁猛揼住我, 「衰人你黐線架, 你差啲就跌死唀你知唔知道呀? 黐線架, 黐線架….」 我望真啲, 原來係詠欣正在狂揼緊我。
我自己都仲未驚完, 家下個心仲係卜卜咁跳住, 但我就要震住棚牙咁安慰住眼前喊到收唔到聲嘅詠欣, 「架架架架, 傻…傻…妹黎架, 我…而家咪無…無…事企左響度囉, 妳唔好喊啦, 喂, 我無事架嘞,妳唔好咁樣啦…..」 我抱住喊緊嘅詠欣拍住佢個背脊。
正比人攙扶住嘅文叔正面青口唇白咁落到黎, 「倫仔, 多謝你…救番我呢條老命!」 我望住佢點一點頭苦笑住, 詠欣仲伏響我懷中再喊住講, 「衰人黎架, 你仲記唔記得你話過仲爭我一個人情未還架, 衰人….嗚…..」
詠欣情緒仲係好激動, 佢啲同事見到咁就行埋黎同我講, 「不如我地番去同佢告半晝假, 你下晝就陪吓佢先啦!」 我點左一吓頭。
我同詠欣去左附近一間餐廳入面坐低, 詠欣仲係流緊眼淚, 但心情就似乎已經平復左唔少咁, 我望住佢, 繼續同佢講住安慰說話, 「無事嘞, 係喎, 我話過仲爭妳一個人情, 咁其實妳想要我還啲咩比妳好呢?」 詠欣望住窗口出便特登唔望住我, 「喂, 點啫? 講黎聽吓啦, 呢….., 喂呀?」 詠欣依然唔肯啋我。
我繼續努力, 「喂, 咁不如我地去睇戲吖? 定抑或食餐飯好呢? 去唱 K? 定送紮花比妳嘞? 唉點呢? 麥當奴生日會? 咁低能, 蝦, 仲有啲咩好呢…? 等我諗諗先…..」 我不斷係咁氹番住佢, 而詠欣嘅咀角亦開始有番啲微笑咁, 跟住見佢開始正面咁淚眼望住我。
望左我一陣, 詠欣突然開口同我講,「我全部都要呀, 我…仲要埋你成個人添呀!」
心意已表, 埋藏響我倆心內嘅炸彈突然就發生猛烈爆炸, 我同詠欣即時起身上前就相擁住, 詠欣伏響我懷中將我抱得好緊咁講住, 「我以後都唔準你再係咁呀, 我頭先幾驚你真係會跌落黎呀, 我幾驚以後都見你唔到呀, 我真係比你嚇死我呀你知唔知道呀? 衰人, 正一係衰人黎架!」 詠欣又再好激動咁用力揼住我。
我面貼佢頭頂摸住佢把秀髮黎講, 「妳放心啦, 我保証唔會再有下次架嘞, 我同妳都未正式響埋一齊, 咁我又點會捨得就咁死左去呢?」 詠欣即時掩住我個咀, 「唔準講個死字….」詠欣同我正對望住, 望左一陣, 四唇經已緊貼住起黎, 就響呢一刻, 我地已經旁約無人地咁錫到進入忘我境界當中。
第二十七章圖述
偉倫為救文叔而差點兒喪命