[傷感愛情] 無語問蒼天: 第二十章 - 意外驚喜

淑嫻嘅事響我心內不斷纏擾左好一排, 但最終我都係忍唔住要再去果間卡拉 OK 夜總會度, 我諗住想搵佢問過明白, 但啲媽媽就話我知淑嫻佢已經辭職無再響度做, 我再嘗試去佢屋企度搵佢, 但佢啲家人又話佢已經搬左出去住好耐, 我試吓打電話比佢, 但電話響左一聲之後就已經轉左做留言, 而我發左無數嘅短訊比佢又唔覆我, 睇黎淑嫻似係有心想要避開我咁。

經過幾次自己 full handling 嘅 job 之後, 得出黎嘅成績亦令公司幾滿意咁, 而我響公司內亦已提昇到設計推廣部主任之位, 年尾嘅時候, 公司每年例必響各部門選出一個最優秀嘅員工獎, 好好彩地, 今年我居然響我嘅部門之中當選左, 成就竟被肯定, 而我就更立志要加倍努力, 無幾耐之後, 又到公司派發年終花紅嘅時候, 驚喜地我居然收到一張為數唔少嘅金額支票, 呢一刻, 我覺得響呢一年嘅努力終於都係無白費到嘅。

呢一日, 我同老細朗奴去左一個公司有份參與推廣嘅新樓盤度視察, 樓盤公司高層帶我地去到某一個約六百多呎嘅單位度參觀, 老實講, 呢種屋苑式有會所嘅高層兩房單位正正就係我心目中嘅 dream house 黎嘅。 

我同朗奴正企響窗旁一齊望住呢個維港無敵海景, 朗奴問我, 「偉倫, 覺得呢度點呀?」 我笑住咁答, 「地點方便, 間格實用, 配套齊備, 用料一流, 管理完善, 我真係搵唔到仲有啲咩地方可以挑剔佢, 不過呢類型嘅海景單位都要成接近千萬, 又真係幾貴吓咁!」 朗奴笑左一笑, 跟住佢就再問我, 「咁你有無夢想過會響呢啲地方度住咁呢?」 我摸住玻璃望住前方嘅海景響度自言自語咁話, 「有呀, 我嘅夢想都係要有間咁樣嘅屋黎同呀爸呀媽佢地一齊住架!」

我講完之後, 朗奴跟住就轉身同果個樓盤公司高層講,「余生, 麻煩你幫呢位張生做個登記吖!」 我Ar 哂頭, 朗奴佢究竟想搞咩鬼呀? 樓盤公司高層走埋黎問我, 「張生, 唔知呢間兩房單位啱唔啱你心水呢? 定抑或你想再參觀吓其他嘅單位之後先至再作決定咁呢?」 



我頭頂上正充滿住問號, 我望住朗奴, 而朗奴跟住就再同我講, 原來我地公司係可以優先內部認購呢度啲單位, 而且仲係有現金即付七折嘅特種優惠, 朗奴再問我, 如果我係決定要嘅話, 公司就會先幫我比哂樓價嘅全數, 跟住之後就會安排提供員工極低息分期供款比我, 而供款額就會響我每月薪金之內度扣除, 而且仲唔使比首期公司, 亦唔需要再響街外搵銀行去做按偈, 亦即係話, 只要等我 say yes, 我而家企緊呢間六百幾呎海景單位就會係屬於我架嘞。

我聽倒之後已經呆左響度, 我唔係發緊夢吖嗎? 朗奴話我居然可以擁有呢間兩房海景豪宅屋苑單位, 響呢一刻, 我即時就諗起呀爸同呀媽, 我真係好想而家即刻就同佢地講, 佢地今生終於都有機會可以搬到去啲豪宅度居住。

呢日收工之後, 我急不及待就帶住呢個天大喜訊去到老人院度搵呀媽, 我捉住呀媽對手講完之後, 跟住我仲應承佢, 除左平日我要番工番學嘅日子之外, 每到假期之日, 我必定會接佢番去屋企度同我地一齊生活, 呀媽聽到之後亦好開心咁捉住我對手黎係咁笑住。
 
第二十章圖述
 

 


偉倫發夢都估唔到自己能夠擁有一間海景嘅單位