[傷感愛情] 無語問蒼天: 第十六章 - 委以重任

周未下午, 老人院內, 老媽子正如常同啲院友睇緊電視之際, 「婆婆!」 老媽子望左一吓, 「咦, 詠欣, 做咩妳會黎呢度嘅?」 詠欣行到老媽子身邊, 「婆婆, 睇妳今日精神好似幾好咁喎, 無, 呢度有幾件新衫, 我原本係諗住買黎比我媽媽著嘅, 但點知而家…...」  詠欣有少少嚥住喉咁再講, 「所以.…., 如果婆婆妳唔介意嘅話, 我想將呢幾件衫轉送左比婆婆妳咁啫!」

老媽子望住啲衫, 跟住就捉住詠欣隻手黎講, 「正傻女黎架, 妳咁有心, 婆婆又點會介意咁呢, 不過而家見妳好似無咩事, 咁婆婆個心都總算安樂左啲!」 詠欣開始破涕為笑, 「係呢婆婆, 今日妳個仔仲未黎咩? 聽啲姑娘講妳個仔成日都黎探妳架喎!」 「哦, 個仔無咁早黎架, 佢仲要番屋企照顧我個老野一陣先, 跟住夜啲先至會黎呢度架!」 「嘩婆婆, 妳個仔就真係好孝順呀!」 

一老一嫩正響露天草地上傾左成個下晝, 「好嘞詠欣, 妳都陪左婆婆成個下晝架嘞, 婆婆已經覺得好開心架嘞, 呀係呢, 咩妳今日唔使同男朋友去拍拖咩?」 詠欣靜左一靜, 跟住好快就好似無野咁笑住搖住頭, 「哦, 佢今日無咁早收工, 所以我咪有時間響度陪妳傾吓偈囉, 不過我都差唔多要走架嘞, 婆婆呀, 其實我黎搵妳傾偈我真係覺得幾開心架, 而且同婆婆一齊就好似有啲陪緊媽媽嘅感覺一樣咁, 不如咁吖, 我一有時間嘅話就過黎搵妳同我傾吓偈吖, 好唔好呀?」 老媽子摸住正跪響輪椅旁嘅詠欣個頭笑住。

公司內, 我響電腦上睇緊用左幾晚時間鬥果張樓盤宣傳海報, 我攞住原本果張廢圖黎比較住心諗, 挑, 我張屎忽痕野咪仲正過佢呢張啦, 咁嘅垃圾就話要收成十幾廿萬, 真係呃飯食到唔恨, 我開住呢個圖像 file 檔, 諗住用公司果部高級靚靚彩色雷射影印機影番一張黎比自己留念, Print 掣一按, 一張 A3 size 嘅海布就開始印緊出左, 印完之後, 我攞住呢幅圖黎係咁睇住, 嘩, 果然真係正到無朋友。

睇完之後, 我正想放低張圖就開始做野之際, 身後突然傳黎一把聲音, 「偉倫, 比我睇吓你呢張圖吖!」 弊, 大鑊, 係老細朗奴響背後嗌住我, 我嚇到已經騰哂鳳咁, 「陳生, 對…對唔住!」 呢次死得嘞, 比老細睇倒我用公司部彩色影印機黎印自己野, 「陳生, 我…我下次唔會咁做架嘞!」 原來陳生剛同公司啲 engineer 落黎會計部研究緊啲新 server 嘅安裝問題, 但點知就咁斷正左比佢, 呢舖就真係大檸樂嘞。   



陳生好認真咁望住我幅圖, 跟住佢就再問我, 「張圖係邊間公司架?」 我口窒窒咁答佢, 「張圖…係我自己響屋企整嘅無聊野黎, 唔好意思呀陳生, 我知我唔應該用公司部 printer 黎印私人野, 咁我而家即刻就攞去碎紙機度碎左佢!」
 
見陳生正面色一沉咁同我再講, 「偉倫, 你攞埋幅圖入一入黎我間房度, 倚麗, 同我叫埋東尼佢過一過黎!」 唉死嘞, 早唔印遲唔印, 就響老細好日都唔落黎嘅時候, 而且仲要企正響我後面果陣時先至黎印, 無嘞無嘞, 呢舖就真係整定無野好講嘞。

老細房內, 設計推廣部經理東尼同老細正研究緊我幅圖, 無幾耐, 朗奴就同我講, 「偉倫你過一過黎, 嗱, 你可唔可以試下幫我響呢度加啲陰影, 呢度啲字就同我轉做紅色, 而呢堆字就掉到去左手面呢個位置度, 個物業後方背景你試吓有無方法可以再做得detail 啲, 下面呢度你就再加番一啲樓盤資料響度, 啲內容同格式你就 reference 番原本果張嘅資料, 跟住做完出黎就睇吓個效果係會點樣?」

我聽倒咁即時諗都唔諗就答, 「無問題, 強項黎啦」 我仲拍哂心口好肯定咁應承朗奴聽朝一早就可以交貨比佢, 呼, 仲以為今次入房實會比老細照我肺添, 點知而家反而仲要委以重任比我, 心中團火已經響度猛烈燃燒緊, 所以響呢晚, 我直情棟高床板, 頭紮努力奮鬥二字頭巾咁, 正拼命咁去完成老細比我嘅任務。

搞左一晚通頂之後, 仍然戰意高昂嘅我就攞住個 file 番到公司, 朗奴已經番左黎響房度, 我攞住張已經printer out左出黎嘅完成品入去朗奴間房度比佢睇, 老細好細心咁望住我幅圖, 但就見佢細塊面好似無咩表情咁, 我個心好緊張, 就好似等緊份考試成績到底係會考成點咁, 見老細間中響度皺住眉頭, 一陣又聽倒佢發住沉重嘅嘆氣聲咁,  原本滿懷信心嘅我亦開始有啲好似比啲冷水淋住咁一樣。
 


但突然, 老細居然爆左一句, 「呢幅得, 偉倫 well done!」 嘩, 突然嘅莫名興奮令到我即時就嗌左出黎, 跟住我就開心到伸住隻手黎比老細講, 「Yeah, give me five!」 朗奴笑住咁, 然後見佢亦真係比番個 five 我。
 
第十六章圖述
 

 
一股前所未有嘅戰意突然在偉倫心內燃燒著起來