從西鐵醒返之後……: 57【True Ending 改變】—真‧結局篇
＊
槍聲響亮傳入耳中，我合上雙眼，已經做好赴死嘅覺悟。
但係，子彈並無預期般射入我體內。
唔係……係應該話，槍聲並唔係從我身前發出，而係從遠方嘅位置發出。
我張開雙眼，發現佟堇新手中嘅槍跌落地上，而佢神情痛苦咁撳住啱啱拎槍隻手。
發生……咩事？
「終於趕得上。」一陣腳步聲從後方傳嚟，我、夏舞同佟堇新三個不約而同望過去。
漸漸走近我哋嘅人，係一個披住黑色斗篷嘅人。
雖然睇唔到佢嘅樣，但從佢把聲音，以及身材同四肢粗幼嚟睇，佢係一個女人無誤。
而且……呢把聲音有種熟悉感。
「你、你係咩人？」佟堇新臉上從容嘅表情已經腿去，而家喺佢臉上只有驚慌嘅情緒。
「我係邊個……唔重要。」黑衣人停頓咗下，「我係嚟改變呢個悲劇嘅結局，給予大家幸福嘅結局。」
啱啱鳴起槍聲嘅係黑衣人手中嘅槍，換言之救咗我嘅人就係佢！
「歷史嘅責任已經完成，而家開始我就唔使遮遮掩掩。」黑衣人將手槍舉起，指向佟堇新，「將你手上嘅聖體交出嚟。」
「哈哈哈！雖然我唔知你係邊個，但你都係嚟注射聖體呀！」佟堇新強忍痛苦咁講。
「唔係。」黑衣人搖頭，「我係嚟幫佢哋兩個注射聖體。」
唔單止係佟堇新，就連我同夏舞都感到愕然。
一個毫不相識嘅人，點解會突然現身救我哋，然後重想將人類唯二嘅聖體交畀我哋？
「講多無益，你只有兩個選擇，交出或者死亡。」
佟堇新咬牙切齒，好唔情願咁將裝載聖體嘅銀箱緩緩放下。
「將個箱推過嚟。」
「將聖體畀你唔係問題……」佟堇新遵從指令將銀箱推過去，「不過要睇下佢哋有無命去打。」
佟堇新從腰間拔出另一把手槍，然後向我哋連開數槍！
「小心！」好彩黑衣人千鈞一髮之際，一手將夏舞抱起，然後向我撲過嚟，我哋三人一同倒在其中一條玻璃管後面。
「啊啊啊！」夏舞跌落地上時壓到手腕。
「有無事？」我即刻緊張地扶起夏舞。
「無事……」夏舞緩緩搖頭。
黑衣人望住我哋兩個呆咗呆，然後將視線轉移返到看台前。
「哈哈哈！你哋三個都唔使指擬打到聖體！」
突然，房間燈光驟然熄滅，然後亮起紅燈同發出警報聲。
就好似第一場遊戲，登上列車時嘅警報聲一樣。
「Dylan隊長，呢度有入侵者，聯同兩名通關者意圖篡奪聖體，你哋快啲派部隊入嚟，將所有入侵者一個不漏殺死！」佟堇新忽然大叫，佢應該係透過電話同緊人聯絡。
急促嘅腳步聲從入口傳嚟，另一方面佟堇新嘅腳步聲愈嚟愈遠。
「就算將你哋兩個殺晒，我都要打到聖體！」佟堇新嘅聲音變得沙啞，「我一生為咗科研，拋妻棄子，將一切事物都捨棄，所以我條命唔可以就咁停落嚟！」
佟堇新嘅聲音隨住腳步聲而消失。
「咁我哋而家點做好？」我問黑衣人，佢係我哋當中唯一明白局勢嘅人，「佟堇新佢帶走咗聖體！」
「追……」黑衣人企起身諗住追，但又忽然踎低返落嚟，「等等！」
砰砰砰——
幾下槍聲從入口傳嚟，眾多身穿軍服嘅人從入口出現。
「你哋三個已被視為入侵者，意圖危害人類未來，如果唔投降嘅話將會格殺勿論。」一道響亮嘅聲音傳嚟，我認得……係呢座機關嘅隊長Dylan！
「事到如今，只好速戰速決！」黑衣人企起身連開兩槍，「你哋快啲追佟博士，我掩護你哋！」
遠方傳來痛苦嘅叫聲，有幾名著軍服嘅人俾黑衣人開槍打中！
「快啲！」黑衣人又大叫一聲。
雖然而家槍林彈雨，但係黑衣人係救咗我哋嘅人……我哋只能相信佢嘅決定！
「重跑唔跑得郁？」我問夏舞。
「我……」夏舞愣了愣，然後忽然笑咗一聲，「我重跑得郁！」
「好……我數三二一，一齊跑去前面道門！」我如同最初喺月台時一樣，將佢嘅手拖住，「三、二……一！」
我拖住夏舞一齊跑出去，徑直向啱啱佟堇新打開嘅鐵門跑入去！
沿途係一條長長嘅走廊，裡面同樣燈光驟滅，只亮著不祥嘅紅燈。
「呢度有三條路，應該揀邊條好？」夏舞指住前方嘅分岔路。
「中間呢條，地下有佢嘅血跡！」
我哋徑直向中間條走廊跑去，但前方轉角位忽然冒出一個著住軍服嘅人！
對方發現咗我哋，即刻從腰間拔出手槍。
「同我停低，如果唔係我……啊啊！」對方忽然發出痛苦呻吟，然後倒在地上。
我回頭一望，原來係黑衣人喺我哋身後開槍，將對方打低。
「你……」我發現到黑衣人嘅手臂有處槍傷。
「無時間，快啲追上去！如果俾佟博士打到聖體嘅話就玩完！」
我、夏舞同黑衣人徑直向前跑，但跑到某個分岔路前時，我哋停低咗腳步。
地下嘅血跡喺呢條分岔路度消失咗。
睇嚟佟堇新已經察覺到地上嘅血跡，同埋估到我哋會追上嚟，所以就防止血跡繼續跌落地下。
二揀一……應該點做好……
喀嘞——
後方忽然冒出一道鐵門，將後方退路堵塞！
「咩、咩事！」我慌亂大叫。
此時，另一道垂直嘅鐵門從底下同天花冒出，將走廊一分為二！
「夏舞！」我向鐵門另一邊嘅夏舞伸手大叫，夏舞仍未反應到咩事，一臉驚呆望住我。
「小心！」黑衣人卻拉住我嘅手，「會夾到！」
千鈞一髮之間，黑衣人將我拉返埋嚟，阻止咗我隻手被夾嘅事情發生。
「夏舞，夏舞！」我不停向鐵門大叫，然後又奮力拍打鐵門。
「你冷靜啲先！」黑衣人拉住我，「我知嗰個係……嗰個係你非常緊張嘅女仔，但係而家咁都於事無補。呢度得你哋三個適性人種，就算佢俾人捉到都唔會有事，只要我哋阻止到佟博士，一切事情就會完結。」
「你、你係咩人，點解你知道得咁一清二楚？」
「我……」黑衣人窒咗窒，「我只係個局外人，無咩特別。如果要救返你心愛嘅女仔，就快啲向前行。」
黑衣人繼續向前方前進，而我馬上緊隨腳步追上去。
雖然……唔知佢係咩人，但係我諗……佢係懷住好意嚟救我哋掛……
而且，我感覺到佢有種好熟悉嘅感覺，但熟悉之中又帶有點陌生嘅不同，我唔知點樣形容……
呢種熟悉感重有種違和感，並唔係所謂嘅既視感，而係確實係從某個人身上發出嘅感覺一樣熟悉……
我跟住黑衣人繼續前進，轉咗幾個轉角位，而燈光亦愈嚟愈昏暗。
「停一停先。」黑衣人伸手截停我。
「做咩？」我望住眼前空無一人嘅走廊。
「係個熟悉嘅人。」黑衣人拔出手槍，警戒望向前方。
一道身影從轉角位出現，企喺我哋面前嘅人……正係Dylan。
「你係點樣兜到過嚟呢度？」黑衣人冷靜咁問。
「我係呢座機關嘅隊長，當然知曉一切秘道。」Dylan瞪大雙眼，展現出十分嚴肅嘅表情，「我反而想問你，你係點樣入侵呢座機關？呢度地點隱蔽，而且有十分嚴密嘅監視系統，有入侵者嘅話我應該會發現到先啱。」
「我……係直接傳送到呢度。」
「啊？」Dylan皺起眉頭，然後拔出手槍，「算喇，你身後嗰個人我唔會殺佢，因為佢係適性人種，但我會喺度將你殺死。」
「睇下點。」黑衣人舉起手槍，然後——
槍聲頓時連聲響起！
我即刻匿去一旁躲避，而黑衣人同Dylan一邊躲避一邊開槍，但都無打中大家。
喀嚓喀嚓——
黑衣人手上嘅槍無晒子彈。
Dylan乘機從轉頭角位探頭出嚟，向黑衣人射出一槍！
但係黑衣人反應奇快，喺手槍無子彈嗰下就即刻衝上前，喺Dylan探頭出嚟嗰下一腳將Dylan手上嘅槍踢甩，另一腳踢落Dylan嘅頭。
但係Dylan擋住咗黑衣人一腳，然後捉住佢隻腳，諗住摔佢落地下，但黑衣人反而一個鉸剪腳箍住Dylan條頸，然後雙雙一同摔落地上。
就喺呢一刻，遮掩住黑衣人臉貌嘅斗篷甩咗落嚟——
一把黑色嘅長髮飄散喺空氣之中——
黑衣人嘅臉貌暴露喺我哋面前，但呢刻呢度無人唔感到驚呆。
「唔好郁。」黑衣人將Dylan撳喺地上，然後拎起佢嘅槍向佢隻腳射咗一槍。
「啊！點解……會係你？」被制伏地上嘅Dylan呆滯咁望住黑衣人。
我舉起顫抖嘅手指住黑衣人，雖然應該係無可能嘅事，但事實就出現喺我眼前。
「你……係夏舞？」我愣望住黑衣人。
黑衣人嘅真正容貌，同夏舞……幾乎一模一樣！
「點解你會喺度著住黑色斗篷……唔係，應該無可能嘅事！」
啱啱我同夏舞重有黑衣人三個同時一齊逃離，黑衣人無可能就係夏舞！
而且望真啲，雖然黑衣人嘅容貌同夏舞幾乎一樣，但細心啲睇黑衣人睇落比較成熟，臉上多幾條皺紋，眼神比天真無邪嘅夏舞比深邃唔少，就好似經歷過唔少事情。
「你係……究竟係邊個？」我問。
黑衣人緩緩企起身，然後講出一句不可置信嘅話。
「我係來自七年後嘅龔夏舞。」
「七年後……？」我瞪大雙眼，以為自己聽錯。
「無錯，係來自七年後嘅未來，我透過當時嘅時光機穿越返嚟而家，為咗將悲劇嘅結局改變，創造出最完美嘅幸福結局。」黑衣人繼續講。
「時光機……悲劇……幸福結局？」我至今仍無法相信所聽到嘅話。
「阿逸，你記唔記得我同你講過，我唔希望你冒住生命危險嚟救我，但係你每一次都唔聽我講，每一次都要咁樣做。」黑衣人將夏舞曾經講過嘅話講出，「所以今次我係嚟救你。」
「救我……？」
「無錯。」黑衣人點頭。
雖然聽落好似好荒謬，但眼前呢個人的確係夏舞，因為佢可以將夏舞只向我講過嘅話講出嚟，做到呢點嘅人就只有夏舞一人……
「你話救我……就係咩意思？七年……未來嘅我而家點樣？」
未來夏舞聽到後頓咗頓，眼神一瞬間露出默然。
「七年之後嘅未來，你並唔喺我身邊，因為你喺七年前就已經死咗，就喺呢度。」
「七年之前就喺呢度死咗……」我好快就明白未來夏舞嘅話。
換言之，我會喺呢度死去。
「我係點樣……」當我問緊嘅時侯，我回想起啱啱所發生嘅事情，然後發現到答案。
「你，本來應該啱啱死喺佟博士手上。」未來夏舞嘅話同我心中答案一樣。
因為啱啱救我一命嘅人，正係未來夏舞。
即係話，喺未來夏舞無出現嘅嗰個世界，我本來就咁樣俾佟堇新殺死。
「我係嚟呢度拯救你，只要可以阻止佟博士注射聖體，將聖體搶返嚟，你同我……唔係，係你同夏舞就可以得到一個幸福嘅結局。」
未來夏舞講出一大堆驚人嘅事情，到目前為止我仍然未能完全相信。
唔係唔相信未來夏舞嘅話，而係唔敢相信眼前發生嘅一切。
「哈哈哈！竟然有啲咁荒謬嘅事情發生。」就連臥在地上嘅Dylan都不禁大笑出聲。
未來夏舞望咗Dylan一眼，然後向我講：「我哋要加緊腳步，如果唔係就趕唔切，如無意外佟博士嘅目的地應該係佢嘅個人實驗室。」
佢講完之後，緩緩轉身向前跑去。
雖然有好多事情想問未來夏舞，但係假如佢講嘅一切係真，咁阻止佟堇新係而家最重要嘅事情。
只不過，我想知道佢轉身嗰一刻，訴說著憂愁嘅目光之中嘅意思。
望住未來夏舞嘅背影，我就喺度諗，呢一刻佢係抱住一個點嘅心情返嚟呢度。
點解事隔七年，你仍然要返嚟呢個地方？
我同未來夏舞沿住走廊一直跑，終於跑到一間實驗室前。
實驗室嘅玻璃門並無關上，我同未來夏舞慢慢行入實驗室。
「嗰盒係疫苗！」我指住前方，地上有個打開咗嘅銀箱，啱啱見過嘅兩支疫苗就喺箱內。
「小心！」未來夏舞截停住我，「嗰盒聖體係假，係佟堇新本來用嚟引你哋入局，所以佟博士先要跑返嚟呢度，因為真正嘅聖體就喺呢度。」
未來夏舞舉高手槍，警戒咁望住周圍。
無幾耐後，一道身影從一旁緩緩行出嚟。
出現嘅人正係佟堇新，佢手上拎住另一盒銀箱，但除咗佢之外，重有另一個人出現——
「夏舞！」我即刻大叫。
夏舞……著住校服嘅夏舞喺佟堇新手上，佟堇新一手拎住銀箱，而另一隻手就用手槍挾持住夏舞。
「嘻嘻嘻！就算你哋嚟到呢度又點，我……」佟堇新見到未來夏舞，露出十分驚呆嘅眼神，「你、你……係咩人？」
就連俾佟堇新挾持住嘅夏舞，都露出一臉愕然嘅表情。
佟堇新愣然咗一陣後，忽然大笑起嚟。
「原來係咁……原來係咁！估唔到我三年前畫嘅草圖，未來竟然可以成真！」佟堇新一邊挾持住夏舞，一邊大笑，「實在太神奇，實在太神奇！」
「同我放低你手上嘅聖體。」未來夏舞舉起槍指住佟堇新。
「而家嘅主導權喺我度，要將手上嘅嘢放低嘅人係你。」佟堇新將夏舞嘅身軀移到身前做擋箭牌，「唔知如果而家嘅你死咗嘅話，咁你又會變成點呢？」
「佟堇新，你唔好對夏舞亂嚟！」我即刻大叫。
未來夏舞默不作聲，然後屈服慢慢將槍放落地上。
「哈哈！咁樣就做得啱。」佟堇新打開手上銀箱，將十字架形狀嘅聖體拎出嚟，「而家重多咗一支聖體剩，我就好仁慈，既然你哋係篩選出嚟嘅成果，而家我仍舊可以俾你哋兩個其中一個人注射聖體。」
「你哋……唔好理我！」夏舞忽然大叫，「一定要俾阿逸注射到疫苗！」
「夏舞，點可以咁樣——」
「阿逸，我終於可以保護你，有機會報答你嘅恩情……所以就算要我死，我都唔會驚。」夏舞微笑住講。
「我唔允許，我哋講過要一齊生存落去！」
「我贊同佢諗法。」喺我身旁嘅未來夏舞開口。
「你……係未來嘅我係咪？你係咪為咗拯救阿逸，所以先返嚟呢度？」夏舞向未來夏舞問，「如果係嘅，你一定要救返阿逸，然後喺佢身邊守護住佢。」
「放心，我一定會咁做。」未來夏舞默然點頭。
「我講過唔需要！既然由一開始選擇咗要死嘅人係我，咁注射疫苗嘅人應該係你先啱！」
「哈哈！睇嚟你哋爭論得好激烈，既然係咁我唔阻大家，而家首先要做嘅係幫我自己注射聖體先。」
佟堇新依然保持一手挾持夏舞嘅姿勢，而另一隻手就將聖體準備拮落頸動脈。
如果佟堇新成功注射聖體嘅話，咁未來夏舞呢一切都會白費……！
「……放心，我唔會俾一切白費。」未來夏舞好細聲講咗句。
就喺佟堇新將聖體拮落去嘅一刻，突然一下槍聲響起！
砰—！
子彈貫穿佟堇新嘅手，聖體從佟堇新手上跌下。
哐啷—！
裝載住聖體嘅十字架狀針筒，竟然十分脆弱咁碎裂，而淡藍色嘅液體則流到一地都係。
「你黐線㗎！」佟堇新驚訝得瞪大雙眼，「你竟然將裝載住可以對抗末日病毒嘅聖體打爛去……」
「我就係想咁。」
未來夏舞趁佟堇新因為驚慌而鬆懈之際，向佟堇新再開多槍！
佟堇新胸口中槍，鬆開挾持住夏舞嘅手，然後倒在地上不停抽搐。
夏舞脫離佟堇新嘅挾持，重未反應到發生咩事，只係用十分驚呆嘅神情望過嚟。
「夏舞！」我即刻向夏舞跑過去，諗都唔諗就將佢攬住。
「阿逸、阿逸？」夏舞先係愕然，然後亦伸出手攬住我，「阿逸……我哋終於無事。」
「你真係傻婆一個！」我忍唔住挪揄道，不過大概我都無資格咁講。
「你都係。」
我同夏舞放開懷抱之後，就望向眼前情景，而未來夏舞亦緩緩向我哋行過嚟。
「雖然我哋成功阻止到佟堇新注射疫苗，但係……其中一支疫苗爛咗。」我望住地上嘅淡藍色液體。
「有無可能可以收集返啲液體……？」夏舞講。
「但係啲液體已經沿住地板罅隙流走……」我講。
「方法總會有，但我哋先帶住聖體離開呢度，好快就有人會嚟到呢度。」未來夏舞講。
就喺我哋拎走咗剩低嗰支聖體，準備離開嘅時侯，我發現佟堇新竟然重未死！
佟堇新雖然胸口中槍，鮮血如同噴泉咁噴出，身體不斷抽搐，但佢隻手好似蠢蠢欲動，唔知想做啲咩……
莫非——
佟堇新舉起手槍對準夏舞！
「一齊落地獄喇……」佟堇新以最後嘅力氣講。
就喺佟堇新開槍之際，我擋喺夏舞身前，將佢抱入懷中。
砰—！
響亮槍聲傳出！
但係，我感受唔到任何痛楚。
係因為我已經痛到無感覺，定係本身子彈射落人體就唔痛？
唔係，都唔係。
子彈並無射中我。
槍聲明明響起咗，但點解子彈無打落我身上？
當我轉身之際，我就發現到真相——
未來夏舞企喺我身前，為我擋下咗呢一槍。
「哈哈哈！一人一殺……」佟堇新猙獰嘅笑聲徘徊喺房間之中。
但下一秒，未來夏舞向佢再開一槍，今次呢槍直接打爆佢個頭，佟堇新呢次真係確確實實死去。
未來夏舞轉過身，搖搖欲墜咁向前傾倒。
我馬上將未來夏舞抱起，然後緊張大叫：「夏……夏舞！你點樣呀！」
「咳咳咳——」未來夏舞咳出一口鮮血。
「佢已經……已經……」夏舞雙眼泛起淚光。
「唔緊要……因為我最後嘅願望已經完成。呢七年嚟，我每一日都毫無意義咁生存，我好多次都好想放棄，但係我無放棄……因為我相信就算結局係悲劇，總有一日一定可以變成幸福嘅結局……」
你身處嘅悲劇，就係失去咗我之後，自己一個生存落嚟嘅結局……
幸福嘅結局，就係指我同夏舞可以一同生存落去嗎？
但係，你忽略咗一樣嘢……
「呢個幸福嘅結局，當中無你嘅存在啊……」
「就算係咁都無所謂，我唔係呢個時代嘅人……呢個時代嘅夏舞將會代替我陪伴喺你左右，走上幸福嘅道路。」
「唔係無所謂……無論係而家嘅夏舞定係未來嘅夏舞，你哋都一樣係夏舞呀！」
「你知唔知道時空穿梭呢件事其實係無意義……因為時間旅行根本唔存在，以未來嘅科技只可以穿越到平行宇宙，所以……我唔會係你認識嘅龔夏舞，你亦唔係我認識嘅佟逸霖，我所認識嘅佟逸霖早已死去……」
未來夏舞抬起頭，一行淚水滑過臉頰，佢伸出手緩緩摸落我嘅臉。
「但係，就算眼前嘅你唔係我認識嘅你，我都係想再見你多一面……原本以為已經唔會再見到你，而家可以見到你一面，感覺已經好幸福……」
「我……」我已經無法講出任何說話，因為淚水已經忍唔住不停留下。
「唔好死……唔好死啊……！」夏舞緊緊抱住未來夏舞嘅身軀，低頭埋喺佢身上不停痛哭。
「傻妹……以後要好好咁照顧呢個諗嘢不顧一切，而且只會為人著想，同你一樣嘅大傻瓜……安穩落嚟之後，你哋嘅生活會係點呢……我真係好期待……」
「期待嘅話點解你啱啱要咁做……點解你要救我哋！」
「哈哈！傻佬，你想一夫兩妻呀？咳咳！」未來夏舞又咳出幾口鮮血，「夏舞，佢有好多唔愉快嘅經歷，但正因為遇見你，佢先會企返起身，所以請你出返去之後，一定要繼繽同夏舞講你嘅故事。」
「我會……我一定會！」
「最後……夏舞，稍微俾我任性一次……」未來夏舞望一望夏舞，然後又望向我，「呢個漫長旅程嘅終點我好開心，但我有句話喺心中七年仍然未有機會講……」
「我鍾意你。」
未來夏舞講完之後，就露出一臉幸福嘅表情睡去。
咁樣喺我哋面前瞓得咁幸福，你真係好自私啊……
但係呢七年嚟，你一定經歷咗好多苦難，所以……就請你好好休息一下。
你嘅願望，我哋一定會實現。
我揉一揉雙眼，然後又幫夏舞抹去臉上嘅淚水，之後再幫未來夏舞好好整理一下佢嘅姿容。
噠噠噠噠噠噠——
一陣腳步聲傳來，而且係好多人嘅腳步聲。
一班著住軍服嘅人進入實驗室，然後舉起手槍警戒咁包圍住我哋，之後有個人拐下拐下咁行入嚟實驗室。
係Dylan，佢俾未來夏舞射傷嘅腳已經包紮好。
佢先望到我同夏舞，然後察覺到碎散一定嘅聖體，之後就發現佟堇新嘅屍體，不過佢無咩特別反應，視線移開後就向我哋行過嚟。
我原以為佢係帶著敵意過嚟，但出乎意料地佢親近咁踎到我哋面前。
「我唔會向你哋出手，其實我一早發現佟博士嘅私心，但因為佟博士掌握住人類嘅命運，所以我不得不遵從佢嘅命令。」Dylan緩緩解釋，「而家佢已經死咗，剩低篩選得出嚟嘅兩位通關者，所以我會以你哋利益行先，盡可能保護你哋人生安全。」
「但係……其中一支聖體已經……」我諗起未來夏舞曾經講過有方法，但佢並無講出嚟。
「咁嘅話就只能從兩位揀其中一位出嚟……」忽然，Dylan疑惑咁望向未來夏舞，「呢位來自未來嘅小姐件斗篷有本筆記簿。」
我翻弄未來夏舞嘅斗篷，搵出一本全黑色嘅筆記簿。
「如果你唔介意可唔可以畀我睇，我雖然係軍人，但實際上亦係一位醫生同科學家。」
Dylan舉一舉手，霎時周圍嘅人即刻放低手槍，莊重咁向我哋行禮。
雖然Dylan曾經係敵人，但我估呢刻佢應該係真心想幫我哋。
我將筆記簿遞畀Dylan，Dylan接過之後開始翻閱筆記簿，途中Dylan嘅表情先係疑惑，然後驚訝，最後一臉更加呆滯。
「如果……呢本嘢講嘅係真嘅，咁真係不得了嘅事！」Dylan瞪大雙眼，「照佢咁講，佢哋嘅世界根本就對抗唔到Abbandon，末日嘅出現係一早預定……就算知道聖體嘅來源都無用，七年後都只能用克隆人去培殖擁有聖體嘅後代。」
「即係話……無任何方法可以製造到聖體出嚟？」我問。
「理論上係，並無方法製造可注射聖體。」Dylan緩緩咁答。
「咁即係——」
「但係呢度有一個萬中無一嘅例外。」Dylan嘅視線喺夏舞同未來夏舞之間徘徊，「佢同呢位小姐，係同一個人。」
「同一個人？咁又係咩意思？」我疑問。
「佢哋兩個雖然來自唔同時代，但係同一個人，並唔係講緊身體、精神定靈魂，而係存在根本完全相同。自己嘅血輸返落自己身上，就自然唔會有任何問題。」
「即係……將未來夏舞擁有聖體嘅血輸落夏舞身上？」
「無錯。」Dylan肯定咁點頭。
唔通……未來夏舞一早就諗到呢點，所以佢先毫不理會佟堇新手上嘅聖體，同埋……
佢從一開始，就已經有赴死嘅決心……！
龔夏舞……多謝你，真係多謝你！
「我哋唔可以白費呢個女仔嘅決心，我哋快啲開始進行手術。」
＊
呢度，係邊度嚟……
天台？點解我會喺天台上面？
「夏舞，好耐無見喇！」一把聲音從我身後傳嚟。
我回頭望，映入眼前嘅人竟然係……阿逸！
「阿逸，點解你會喺度，你應該死咗先啱……你係平行世界嘅阿逸？」
「咩平行世界呀？你白痴㗎？我就係如假包換佟逸霖！」
「佟、佟……佟逸霖！」我即刻衝上去擁抱住阿逸嘅身軀，「呢七年嚟我好掛住你，我每一日都諗住你！」
「辛苦你喇，夏舞。」阿逸輕輕咁撫摸住我個頭，「你唔使再搏命去戰鬥，而家你可以好好咁休息下。」
「阿逸……」
「係喇！今日我又諗到個故事，呢個故事好搞笑，包你笑到見牙唔見眼！」
「真㗎，咁阿逸一定要快啲講畀我聽，唔笑嘅話唔收貨㗎！」
「嗯！」
＊
實驗室內。
我已經完成聖體嘅接種，而夏舞亦完成輸血手術，經由檢驗之後確實聖體已經接種喺夏舞身上。
夏舞依然喺手術室休息，而我同Dylan就望住眼前呢條玻璃管。
「多謝你Dylan，最後可以俾未來夏舞……唔係，俾龔夏舞發最後一場夢，有個完美嘅結局。」
「我可以做到嘅事就係咁多，同埋聽講未來嘅我同佢係戰友，咁而家我都要還返啲恩情畀佢。」
「我哋接種完聖體之後——」
「我會護送你哋去另一個地方，聽講喺香港某一處有個倖存者基地，暫時未受到襲擊，所以我會一個人護送你哋去嗰度，再商討人類嘅戰略。」Dylan拎出黑色筆記簿，「更何況有呢本來自未來嘅日記。」
「咁呢度其他人呢？」
「可以防止病毒嘅戰鬥衣只有兩件，所以其他人會留喺度看守，直到餓死為止。」
「原來係咁。」
之後，夏舞嘅身體狀況確保無事之後，我、夏舞同Dylan就準備出發。
喺離開之前，我哋再一次進入冷凍睡眠嘅房間，睇一睇其他人狀況。
沿途我見到好多熟悉嘅人，駱譯、莉莉、修洛文、鬼仔、詩詩、Ellie、阿曉、古朗、愛兒……
重有倪少賢。
雖然到而家都唔知佢成為監察者嘅緣由，但佢到最後或者係故意俾我同夏舞生存落去。
無論如何，當真正破解到聖體嘅一日，我會返嚟救大家。
「夏舞。」
「做咩？」
「假如無遇上你，我可能唔會生存到而家。」
「我都一樣，嗰日無遇見你嘅話，我早就已經死咗。」
「我諗過㗎喇，就算真係搵唔到其他生還者，都無咩所謂。」
「點解咁講？」
「因為——」
機關大門緩緩打開，我裝好子彈，舉起手槍對準眼前事物。
「只要你喺我隔離，無論遇上任何困難，都唔會成為我哋嘅障礙！」
砰—！
（完）